ياعـيـونــي

اهداء من الشاعر فايز العزيزي الى منتدى بني عزيز

ياعيوني ليه عيتي تنامي = ليه ودك تتعبين وتتعبيني
لو تطيعيني وتمشين بنظامي = وتاخذين الشور من هاك السنيني
عدت الليله علي برد وسلامي = والتقا جفنينك والنوم يهنيني
واسترح شوفي من عتوم الضلامي = واسترحت من الهموم الي تجيني
يا اله الكون يامنشي الغمامي = الدعاء حبل الوصل بينك وبيني
طالبك يارب وبكل الاسامي = تبعد الشيطان عني وتهديني
ودي اقفي مالحق وجهي ملامي = منك ولا من جيه الطيبيني
لاتنقصني ولا تطرح مقامي = يوم تشهد قبل منطوقي يديني
والله ان الضعف مايدخل حزامي = والله اني في العرب ماني دويني
ان وقفت اقف مواقيف الحشامي = وان قلطت اقلط على الكبش السميني
معتنزبك في قسى والا سلامي = ولا احد(ن) غيرك على الدنياء عويني
مير لي قلب(ن) مطاوله الهيامي = وين مالقيت به جر الونيني
ذاكر الي طاولت فيه السقامي = لاذكرها قال ياوينه ويني
لاطراله صوت مردوع الوشامي = يلعب لاحساس بالجرح الدفيني
غيرها عيت توصلني مرامي = وغيرها لو زينت لي ماتزيني
يوم قلبي عن جميع البيض صامي = قفل الشباك في وجه السجيني
تايب(ن) والذنب لاسامات يسامي = لين ترجعني قبل ترجع قريني
ماني بمعصوم من ذنب الغرامي = انجرف مع كل شي(ن) يحتويني
لجرفني معه ملعون الرسامي = انجرف واقول خلي يحتريني
وانت يالمعبود يامحيي العظامي = المولع لرتخى قلبه يليني
لو توفقني معه يارب عامي = اكتمل ياخالقي عمري وديني
الحياه اسرار مافيها كلامي = تنعرض مابين تفكيري وعيني
قلت شام القلب عن ماضيه شامي = واثر ماها ناقع(ن) من فوق طيني
اشهد انه طارين لحام حامي = كم حزنن منه لازم يعتريني
آه من شي(ن) خذينا منه اثامي = غير السكه عليه سكتيني
ان تركته تاركن كل الحرامي = وان ملكته صرت زين العابديني
وآه من كثر الطواري والحلامي = وآه من ليل(ن) يبي يبحث كنيني
بس نامي ياعيوني بس نامي = السهر يتعب عيون الساهريني