الشيب لاح وعــــارضي مــــا درابه

السلام عليكم ورحمة الله وبركاته

أخواني وأحبابي الكرام في المنتدى الغالي على قلوبنا جميعاً
بعد الغياب الطويل أشتقنا لكم وعدنا وجبنا معنا هذه القصيدة التي اتمنى أن تحوز على رضاكم


اقرب يا ما جد واعتصب بالعصابه
-----------------واسمع وصات العود يا ابن الحراري
اسمــــع كلامــي واحفظه من كتابه
-----------------علم(ن) موضــــــح بالقرار الوزاري
قيل الرجــــــــال انواع يوم المجابه
------------------تبدي على الرجال بعض المواري
الشيب لاح وعــــارضي مــــا درابه
------------------مدري كـــبر والا بياض الوقاري
رجل(ن)يشيب ولا طمـــع في جنابه
------------------يقدر على صكات بقعــا وضاري
ورجل(ن) يحوش المرجل من شبابه
------------------فعله وشوره مثل حـــد الشباري
ورجل(ن) على وضــح النقا ينغزابه
------------------هو محزمك عند الحمول الكباري
الفارس اللي فـــــــــي مقامه مهابه
------------------تقدح عيون كــــــن فيها شراري
والذيب ذيب ولايهــــاب الذيــــــابه
------------------يجرى على سحم السباع الضواري
ورجل(ن)يشيب وبين ربعـــه زلابه
------------------لايقضــــــــي اللازم ولا شب ناري
يبقى حضوره ملتزم فـــــــي غيابه
------------------علــــــى غيابه ما تســاق البكاري
ورجل(ن) عضامه ما تودي زهابه
------------------يخاف مـــن لمس الحبل فالغداري
الثعل والسرحان فــــي وسط غابه
------------------يعرف قوي الحيل وقت المساري
الفرق واضح والبشر لــــو تشابه
------------------الحــــــــــر بيّن والحباري حباري
وباقي الوصوف تشوفها والغرابه
------------------إن عاش راسك ما دفن بالصحاري
والرابح اللي شاف دربه وصابه
------------------ما داج في قاع الوحــــل والخباري
وإعداد ما نذكر فعول الصحابه
------------------يوم المصافق فوق قحص المهاري
صلوا على اللي شاع نوره وجابه
-------------------نبينا اللــــــي لــــه محبه وطاري


وسلامتكم