قصيده عن تغير اطباع الناس (اهداء :الليث)

بديت باسم اللي له الخلق ترجيه...رب كريم كل خلقه ترجاه
نويت بدع البيت بالفكر اسويه....ومن كايد القيفان ساسه ومبناه
الله من هم على القلب كاويه....هم بصدري دايم الدوم يصلاه
الهم واجد والهقاوي تداريه...ارجوك ياربي عسى الهم تجلاه
اسهر مع السهران والليل ممسيه...ياطول ليلي مع همومي وماأقساه
لانيب ضميان ولا الجوه شاكيه...ولا لي مع العشاق راده ومشهاه
انا شديد العزم عزمي مبديه..حسن النوايا فوق والياس مقواه
متحزم قده وقدي مقويه...مقط على راسي عصابه ملواه
حب المراجل عشق والنفس تبغيه..يارب ساعدني عل كل مبغاه
اتوق للعليا وللخير ابا ارجيه...هذي طبايعنا وماهي مباهاه
اللي حفر بالصخر بظفور اياديه...نحت انا بالظفر في كايد صفاه
يوم ارتكي للحمل لو ثقل اعديه...واعز نفسي عن بقايا رزاياه
حرمان في عهد الطفوله معانيه..شبابنا عهد الصبا ماعرفناه
اشقتني الدنيا على كل توجيه...في دورة العيشه شقاوي ونداه
علم المدارس ماعرفته ولا ادريه...والفصل مارحته ولا الباب جيناه
بالذات انا علمت نفسي مباديه...اخذت اطراف علم وقريناه
عصامي بلا فخر للحق معطيه...درس الحياه انواع حنا فهمناه
ذكرت همي باول القول واثنيه...الوقت شين والشين عفناه
وقت غيار وكل شي طلع فيه...تغيروا ناسه وجنسه وممشاه
راحت سلوم الناس والكل ناسيه...عهد الموده والتصافي فقدناه
خطو الولد ابوه شفق يلاقيه...يقول ماشفته له ايام ماجاه
اميمته تبكي الولد وين الاقيه...وليدي ثمر قلبي الا وين بلقاه
مع حرمته قاعد ولا سائل فيه...والام ناسيها تري جاهه ملهاه
والاخو هو واخوه شحناء وتكريه....مطامع الدنيا وكل قطع ماه
الارحام قطعت والطمع صاير فيه...الا وين بلقي لي رفيق مصافاه
رفقة مصالح كم يعطي وتعطيه...مع حبة للخشم والراس وجباه
ياشيب عيني من زماني وطاريه...ويجزا زمان راح واحلو طرياه
في مامضى تلقى المراجل تباريه...عز ومعزه صافي الود وهداه
الكل منهم ينثني دون معانيه...متدين في حشمه الضيف وقراه
خطو الولد من قبل عشرة تلقاه...في دبرت الوالد اذا احتاج يلقاه
بياض وجه وعز لك تفتخر فيه..يفاخر بني جنسه على العز والجاه
والبنت نشميه وكل شي تسويه...طبع امها والعود تاخذ سجاياه
وفي حشمه للزوج دايم تراضيه...وربها وعبادته تطلب رضاه
يا الله ياعالم سري وخافيه..يامحصي خلقه من ادناه واقصاه
انك توجهها على خير وتوجيه...وستر على عبدك بدنياه واخراه
وصلاتي على المختار حق او اديه...والصحب هم والال من يتبع هداه

حب المراجل عشق والنفس تبغيه..يارب ساعدني عل كل مبغاه
اتوق للعليا وللخير ابا ارجيه...هذي طبايعنا وماهي مباهاه

انشهد يابورزن

وسلمت على الاهداء من طيب اصلك يامعلا

لك مني ارق واجمل التحايا

حب المراجل عشق والنفس تبغيه..يارب ساعدني عل كل مبغاه
اتوق للعليا وللخير ابا ارجيه...هذي طبايعنا وماهي مباهاه


صح لسآآن قآيلها

و لا هنت على النقل يالبنيد ..