بكت لنا الارض يوم انا توادعنا

يسري بنا الليل لانادت مواجعنا
ويفرح بنا الهم لاماتت أمانينا

اغراب والحزن في الغربه يجمعنا
اجساد نمشي وتتبعنا خطاوينا

كان الامل في ظلام اليأس يزرعنا
لين الليالي تجي باليأس تجنينا

كنا نعلم جروح الوقت توجعنا
والحزن كنا ناديه وينادينا

نكتب: طريق الموادع مايرجعنا
نقرأ:طريق الموادع مايودينا

نبعد عن الهم نلقى الهم يتبعنا
من وين نبعد نلاقي همنا فينا

كنا.. وهالحين كنا وش بتنفعنا
نادى الرحيل وسرق دربه خطاوينا

رحنا ورى الحب لين الحب ضيعنا
مدري نسينا الزمن والا تناسينا

الين عشنا بلا صوره ولامعنى
ارواح تشبه لنا ظلمة ليالينا

على كثر ماحلمنا ماتوقعنا
ينسى الزمن كيف كنا يوم حبينا

واليوم ماعاد باقي شي يجمعنا
الا الوجع والضياع وحزن ماضينا

شكرا لأحساسنا اللي كان يخدعنا
شكرا لوقتٍ خذانا قبل يعطينا

شكرا لعمرٍ تركنا قبل يسمعنا
شكرا لأيامنا اللي جت توصينا

شكرا لأحلامنا اللي وقفت معنا
شكرا لحزاننا .. شكرا لأغانينا

بكت لنا الارض يوم انا توادعنا

لأن الارض حضنتنا يوم حبينا

للشاعر / محمد الوسمي