ديوان شعري للشاعر الكبير فلاح إبن مبرد الحميداني

ديوان شعري للشاعر الكبير فلاح إبن مبرد الحميداني

عديت

عدّيت فـي راس الطويلـة وغنّيـت=أفرض رضا روحي على مـن كلفهـا
أغضبتها في موقف الطيب وأرضيـت=فكـرٍ علـى درب المعاسـر عسفهـا
ياقـوّ طاقتهـا بمـا شـال وأخفيـت=شيـئٍ عليـه الـروح مـاالله كلفهـا
حاولت أغيّر فـي مجاريـه وأزريـت=ماينخصـم وجـه الحقيقـه عرفهـا
مـع الظّـروف بمقنعاتـه تقصّـيـت=كم حلت به حيلـة تصيـب ونسفهـا
حتّى عليه من الغضـب منـه ردّيـت=ردّة منزّحت السّـرب عـن عطفهـا
لا شـكّ ماصـارت علـى ماتورّيـت=عند الغضب تخطي المصيبـه هدفهـا
جيتـه ليـا جيـت مطـوّع لعفريتـ=يخلي الجسد لاجى والى أقفى خطفهـا
وقفت مالي مـن جـدا إلا التنّاهيـت=ألعـن هكـا الحـزّة وحـظّ عرفهـا
ممّا بصدري سجت رجلـي وسجّيـت=أقنّـع النّفـس العـزيـزة باسفـهـا
ما يرجع اللّي فات لـو قلـت ياليـت=دنيـا تخالفنـي علـى الله خلفـهـا
جلست فـي راس النّبـا واستمدّيـت=وحالي على غيـر أحتمالـي دغفهـا
كنّه لبس جسمي من الجـنّ عفريـت=يوم أرتهج وصفـوح طبلـه رجفهـا
نسنس هـواه اللّـي يهـزّ المنابيـت=صلفـن ليـا هبّـت هبوبـه عطفهـا
هـواه حنّـت منـه روس النّحاتيـت=وتجاوبـت خضـر الجريـد بسعفهـا
قامـت تصافقهـا هبـوب السّباريـت=لين العذوق الخضـر هلـت حشفهـا
ورّانـي الدنيـا عـلـى ماتمنّـيـت=هـدّم مبانيـهـا وحـطّـم تحفـهـا
ضربه يفتّت عالـي السقـف تفتيـت=من أعلى طوابقها ليـا آخـر غرفهـا
يشتّـت المجمـوع بالقـوع تشتيـت=صبّاتهـا كبـر الأظـافـر شظفـهـا
من عابرات ماتمشّـى علـى الزيـت=أحـدث صناعـات الخبيـر اكتشفهـا
فكري موقّتّها علـى الضيـق توقيـت=لو أطلـب الصنـع المحـرم صرفهـا
هيجات فكري تجمـع الحـيّ بالميـت=صنع الخفايا معجـزة مـن وصفهـا
دخلت في مثل الظلام وطفـيّ الليـت=وشـدّ الستـارة بالخيـوط وكشفهـا
أدرج شريطـه بالجهـاز وتحلّـيـت=يمشي على نـون النواظـر سلفهـا
تتابعـت فـزّات روحـي وفـزيـت=وكـنّ الوجيـه الغايبـات تعرفـهـا
تدفقـت عبراتـهـا يــوم ونـيّـت=وجفني غسلهـا بالدمـوع ونشفهـا
في راس مرقاب العنـا ليـن ملّيـت=من عصر لين الشمس كفـت طرفهـا
مع العذاب أبحرت وأحترت وأمسيـت=كنـيّ سفينـة نـوح ممـا صدفهـا
خوفّني الهاجـوس ليـن أستخفّيـت=وفكّ الحصـار وقـال دنيـاك شفهـا
يوم أستهاض وهاض وصّفت واصفيت=نقعـة بحـر لـو زاد ماهـا نشفهـا

الحلم

وش حلّ حلمي يامفسّـرت الأحـلام=للحلم أبي لي من هل العلم تفسيـر
اللّي بلاجنحـان يصعـد ليـا هـام=يحوم في كبد السّماء حومة الطيـر
وش لون حلّ الحلم في حكم الأسلام=لا حمت فوق مركّـزات المعاصيـر
أنـا عمـاً غافـلٍ بلـذّات الأنعـام=وابا أزعج المبصر بعرض التصّاوير
مشاكـل المخلـوق تيّـار الأيّــام=الوقـت هايـج واللّيالـي معاشيـر
يعلم بها اللّي عالمٍ حمـل الأرحـام=المعتلـي منـه وعليـه التّدابـيـر
ماهي بسلعـه بيـن بايـع وسـوّام=فرضٍ من الخـلاّق حكـم المقاديـر
بالنّاس منهو يجمع الكنـس بخمـام=وفيهم من اللّي يصرفـون الدّنانيـر
وفيهم من اللّي يعطب الطّق بلحـام=من ضربته جمـع الحديـدة تنانيـر
بلشت مابيـن الحقيقـه والأوهـام=وأخشى يجي نفع الحقيقـة معاذيـر
في غابـةٍ يلهمنـي الهـمّ بالهـام=بين الـورود الفاتحـه والعصافيـر
غديت أنا ويّا الهواجيـس بازيـام=تفرّني فـرّ المكينـة مـع السّيـر
ضرباتها بالكبد من نبـل الأسهـام=وش فايدة فكـري برفـع التقاريـر
زاد الحساب اللّـي بعـداد الأرقـام=وعجزت لا القا للمفاتيـح تصفيـر

الخيل

يامـا نقلتـي مـن سـلالـه وسـلّـه=صنـع الفرنجـي والعيـال المداهيـش
تغذْيـن مـع شـولٍ تباريـن جـلّـه=ليا جا من الضـدّ المجـاور ختاريـش
لاصاح صيّـاح الضّحـى وفزعـن لّـه=جـرد السبايـا مـع زراج النشانيـش
يجـنّ ايديـهـن يطـرقـنّ الأجـلّـه=ضرب الحوافـر مثـل دقّ المهابيـش
لاباينـن مـع راس حـدبـاً مطـلّـه=وشيف السّلف قد شرعوا به هل الجيش
ورداً مثـل ورد القطـا واقبلـنّ لّــه=وكثرة صوايـح ناقضـات العكاريـش
ينخـنّ شغمومـن علـى عـادةٍ لّــه=عليه جوخـه والمـزرّج غلـب ريـش
ماقـطّ شافـوا لـه بالاكـوان ذلّــه=ينطـح سهـوم مخالفـات النواتيـش
وتواجهـوا كـلٍّ علـى ماحصـل لّـه=بيـن الفـزع ومدوّريـن المعـاويـش
وعندك خبر من هاش مـن دون حلّـه=ماينطحه بالهـوش حمـر الطرابيـش
يقلط على الصّابـور(1) لعيـون خلّـه=لوقدمـه العجـمـان والا الحناتـيـش
هـذاك هـو دورك وراعـيـك حـلّـه=ليا وصلـوا المظهـور والا القناطيـش
واليـوم لـك مابيـن ددسـن وفـلّـه=ما انشدك عن راعيك ركضك على ويش

قالو علامك

قالوا علامـك مـا تقـول القوافـي=وأقول انا ماني بعجلٍ علـى القـاف
كمّ كلمة كثـرت عليهـا الحسافـي=وكمّ ضاع من بين المخاليق ميقـاف
اللّي لمست من أكثر النّـاس كافـي=ياقلّ من فعلـه يشـرّف وينشـاف
بالنّفس عن بعض المواقف عفافـي=عن الطّمان أبدي على راس مشراف
لي مع بعيديـن الهقـاوي مطافـي=ولى دون عوجان المناهيج محـراف
واليا استوى المعنى على رسم قافي=لابد ما يظهر له أنصـار وإنصـاف
من واحـدٍ يعلـم كنيـن الخوافـي=علاّم سرّ الكـون يرجـى وينخـاف
هو خالقـي لـه ذلّتـي وأعترافـي=هو القدير بكـلّ شـيٍّ هـو الكـاف
هو الّـذي عنـد المواعيـد وافـي=وعلى وعيده تلحق اسلاف باسلاف
كم صفصفٍ يرفع عمـاره يشافـي=وكم عامرٍ ساوى مبانيه صفصـاف
تذري عليـه مصافقـات السوافـي=تطرد به السملول من عقب الارياف
دنياً اليا جا فـي هواهـا اختلافـي=من حكمة المولى لها عشق وعياف
ما جت على كيف الرديّ والسّنافـي=ذى قدرة اللّي خالقٍ كـل الاصنـاف

سود الليالي

سود اللّيالـي حدثهـا ماينسّينـي=ماني بتبعٍ حـدث ماضيـه ماهمّـه
ماني رديٍّ ولانـي مـن ردييّنـي=والطيب محدٍ قفـل بابـه ولا كمّـه
من روس ربعٍ مواقفهم تهقوينـي=حبل المواريد مايقصر عن الجمّـه
أفخر بربعي ليـا قالـوا حمادينـي=يوم انّ ساس الردي يكره بني عمّه
اللّي غرس حبّهم طبعي وتكوينـي=فرضٍ على الروح مثل الدين والذمّه
فكري على المنهج الطّيب مقدّينـي=يوم ان خطوا الولد يتبع وصاة امّه
المشتبه ما يجي دينه علـى دينـي=ساس الردي والبخيل وناقل النمّـه

هذه القصيدة من قديم الشاعر فلاح الحميداني

راكب اللّي حرّكت وأستـدارت بالمطـار=شغّلـت بنكاتهـا واستعـدّت للمطـيـر
قابلت للنّـود واوقـف لتزويـد العيـار=وشلّعت تشليعة اللّـي مسابيقـه حريـر
وارفعت سمر العجل يوم ضفّت باشتهار=يوم ضفّت كنها فـرخ قرنـاس صغيـر
من طراز الميج بالجوّ عجـلات الطيـار=لعنبوا سوّاقهـا كيـف فكـره مايحيـر
نجّبوها في لزومي على موجـب قـرار=يوم شافوا منيّ الحال يادهيّـس ضريـر
بلّغ السواق بأمر مـن الحاكـم وسـار=ورسموا له بالخوارط مسافات المسيـر
يوم جا الشعبه ونزلّ كفّرهـا واستـدار=قال وين أنزل وقلت أنت في شغلك بصير
قال كيف انزل على سهلتن مافيـه قـار=قلت ملزوم نزولك لـو المنـزل خطيـر
لازم أشوف الغضي ولو لمحـت بصـار=لين أشوفه في عيوني ويرتاح الضميـر
عنق ريم قادت الصيد في تالـي النهـار=يوم سمع الرمي قاد الجميلـه مستثيـر
عينها عين أشقر من صواريم الحـرار=توّ جا طـرح الشبـك جايبينـه للأميـر
الوصـوف حـزوف وردوف صـغـار=في نظر عينها لأهل الهوا شـرٍ شريـر

يعاذل المشتاق

ياعاذل المشتاق مافيـك تقـوا=ولافي فؤادك مثل مابي حروقـي
لا شك أبا أصبر للدهر والله أقوا=لو أن لذّاتـه تحـش العروقـي
يوم الله أبدا الخلق ربحٍ وشقوا=متصرّفن منه العنـا والوفوقـي
سقوا ليا منيّ تريّحـت سقـوا=عرفت تسعير المبيعه بسوقـي
اكتال من هقوه على من تهقـوا=يرجح بها الميزان عند الحقوقي

خانة الدنيا

خانت الدنيا بهـا أفكـار مـن فكّرتحيـر=من تخاليف الدّواليـب مـا فيهـا قـرار
لو صفت في يوم باليوم الآخـر تستديـر=ما يجي من حلوها كثـر ماتعطـي مـرار
صار ممشاها بها الوقت مع مجرى عسير=غيرت منهاجها الزيـن والوقـت أستـدار
طمّنت روس الحمايـل مدلّهـت القصيـر=الرجال اللّي مـن أول لهـا قـدر ووقـار
وأرتفع فيها رجال أسم والأ الفعـل غيـر=صار طيب اليوم لأهل المناصب والتجـار
كـم تلقّـي وجههـا واحـدٍ مافيـه خيـر=لانصوه أهـل المواجيـب طيبـه بالعـذار
من عجب ماشفت فيها وانا تـوّي صغيـر=آخر الوقت أشترى الخيل ركّـاب الحمـار
قبـل مايقنونهـا إلا مفـرّحـت النـذيـر=لاسمـع فـي سربـةٍ حاولـت هكالديـار
لا توكّد بالخبـر واوصـل العلـم الأميـر=قال خفت يحاولون العرب مأنتـم حضـار
قال لّه علمك وصل وصّلـك ربـي لخيـر=بس مانرحل عن الدار لو راحـت عمـار
من كتبله طولت العمـر ماعمـره قصيـر=ولاتطول أعمار نـاس كتبهـا الله قصـار
يوم ثاني بالضّحى جاهـم الراعـي مغيـر=صاح بأعلى الصوت يالابتي يأهل البكـار
لجّ كلّ النجع صوت الكبير مـع الصغيـر=وأهل العادات ركبوا علـى قـبّ المهـار
جلّعن مثل القطا اللّـي يبـا نقعـة غديـر=صافقه لاهوب صيـفٍ ميبّسـن الخضـار
يوم شافوهم ولحقـوا علـى شـرٍّ وخيـر=اسهمت بمجرّب يوم شاف الجمـع أغـار
ضاريٍ في جدعة الشيـخ باليـوم الكبيـر=لا تلاقـن السبايـا وحـسّ الهيـج ثـار
وارده باللّي تداوي الغليـل مـن المغيـر=مانسى الصيحه وهو يسمع حنين أم الحوار

سلام الله على اللّي هرجته بالحب مكتومه=بصيرٍ بالكلام ولا تنطّـق منطقـه حالـي
يسولف له على ناسٍ ولايدرون بعلومـه=ولا منهم حدٍ يفهم معاني هرجـه التالـي
لأن الهرجه اللّي جابها المملوح مقسومـه=عطاهم مجمل الهرجه وفيها رمز غربالـي
وأنا اللّي مثلهم مايفتهم للرمـز مالومـه=سمينٍ مستريح البال عن درب الهوا سالي
ماهو مثلي شعا قلبي سوالف زاهي أرقومه=بمبدا الهرجه أبعدني وتالي الهرجه أثنالي
مليح الزول حبه بالضماير بانت رسومـه=هجوسي له تودّيني ولاجن أشغلـن بالـي
قعد قلبي يسولف به لو أنّه في حلا نومـه=صحيح القلب ما يلعب به إلا واحد غالـي

سيّرت للشـوخ عنـوان المطيريّـه=نـوادرٍ مايهـابـون المخاسـيـري
شوخ القبيلـه لنـا منصـا وماليّـه=في مثلهم يستـوي قافـي وتعبيـري
دوشان اهل شيخةٍ من سـاس جدّيـه=عيال ماجد من الروس المشاهيـري
ربـع فنـوا قبلهـم وفعولهـم حيّـه=لهم على لوحة التاريـخ اساطيـري
ابطال اهل عـزوةٍ بالضيـق منخيّـه=لاذيّرت مـن مراتعهـا المعاشيـري
يردون حوض المنايـا بيـع وقفيّـه=اخوان جوزاء مكسـرة الطوابيـري
يوم المراكيـض والاحكـام عرفيّـه=ياما ثنوا سربـه واقفـت مدابيـري
مـن البدايـه زعامتنـا دويشـيّـه=في كل عهد لهـا وارث وتطويـري
شوخٍ عليهـا بيـوت العـزّ مبنيّـه=نفخر ونذكر وجيه الخيـر بالخيـري
نصيت هزّاع واهل الطيـب منصيّـه=وصادفت طير السعد راع المغاتيـري
عبـدالله اللّـي بـه الامثـال معنيّـه=قبل امدحه قد سمعت المدح من غيري
ردّ الثنـى حـقّ والاعمـال مجزيّـه=اخصّ من خصّني من دون تقصيري
اخـوان هـزاع مافيهـم دوينـيّـه=نعم بهم من كبيـر السـن لصغيـري
ترحيبـةٍ مـن فـروخ الحـرّ جديّـه=تجلا صدى الكبد من بعض المساييري

هذه قصيده فخر للشاعر فلاح بن مبرد الحميداني
بقبيلته لعلها تحوز على رضاكم

مواقف معجزات الطيـب منـا=عوايدنا و من عـادات اهلنـا
نبين اليا تخفـى كـل هابـي=ليا منه ربض ربضـت مهنـا
مدام اني هل العـادات ربعـي=لك الله غيـر ربعـي ماتمنـا
سلايل سربت ٍ تـرد المنايـا=هـل العـاده مزبنـت المجنـا
فكم من فارس بنحـور ربعـي=بعد طعن القنـا طـاح وتثنـا
قعد في تختخن مافيـه ساكـن=عليه الطير والسرحـان غنـا
سند والمسندي من روس شمر=ينشدهـم ردي العـرف عنـا
حمادينـن مواقفنـا صعيـبـه=منجيـن الدريـك اليـا زبنـا
خفيفين النفوس بوجه مقبـل=ثقيلين النفـوس اليـا دقلنـا
اخذ علمـي وسلملـي عليهـم=اليا منه نشـدك فـلان عنـا
انا في كل دار ارفـع مقامـي=اشيـل الحمـل كلـه ماتونـا
عساهم مثل ماذكـر يذكرونـي=ليا جت ساعـة ٍماسـد عنـا
هبييل ٍ يحسب الطيـب كلمـه=يسولف في هواه اليا استعنـا

قالوا مطيري قلـت افاخـر بساسـي=مبنى شرف ما غيّره كـل وسـواس
للمجد ماخـذ مـن عـدوي قياسـي=نختار من وقفـات اهلنـا ونقتـاس
يوم الوفـا ومصادمـة كـل قاسـي=تعرف مواقفنا علـى قـب الأفـراس
اهل النقا واهل الشـرف والحماسـي=مطير حمران النواظـر هـل البـاس
بنـوا لنـا بالمجـد رقـم قيـاسـي=كسارة الجمعـه بعيديـن الأرمـاس
من خيلهـم بـاد الحديـد السداسـي=وبادت خفوق الهجن من كثر الأمراس
مرسين لو كثـرة علينـا الحساسـي=بين الجنوب ونجـد وديـار عبـاس
وشيوخنـا مثـل الجبـال الرواسـي=شـوخ لهـم هـده ورده ومفـراس
دوشان بشيوخ العـرب مـا تقاسـي=روس عليها وافـي الطيـب ينقـاس
وعموم شوخ مطير تجلـى العماسـي=شقر الحرار اللي حوت كل نومـاس
عوق الخصيم اللي براسـه يباسـي=يهابهـم عنـد اللقـاء كـل مدبـاس
واليـوم بيّـن بالأمـور انتكـاسـي=ضاع الوفا يوم ارتفع تافـه النـاس
وقامـت تعذربنـا وجيـه البساسـي=ويروجون لهرجـة مـا لهـا سـاس
مرضى النفوس اللي تحب السواسـي=نقالـة الشينـه مواريـث الأنجـاس

ياخضير من كثر السّهر ما اقدر اشوف=يومين والثالث مضـى نصـف ليلـه
عفت الكرى من هاجسٍ يطرق الجوف=خيّـم علـى قلبـي يـروح ويجيلـه
ياخضيـر حدّتنـا المقاديـر لظـروف=مقضـاة حاجـه بـسّ اهلهـا قليلـه
من جيت قدّم لـي معاذيـر وحلـوف=واللّـي هقينـا بـه عرفنـا حصيلـه
وصل الخبر منهاه ياخضير وتشـوف=ورّدت للـبـارود نــار الفتـيـلـه
خبّرت من تنصاه شيخـان وضعـوف=شيّـال حمـل اللّـي عجـز مايشيلـه
امجربّـه بالطيـب مانـي بموصـوف=رفيـق دنيـا مـن سنيـنٍ طويـلـه
مازيف الرفقه على شـان مصـروف=ولاعشت مع من طاب حظّـه يجيلـه
لابـد ماتخفيـه الايــام مكـشـوف=ان كـان عشنـا فالليالـي طويـلـه

منقول

الله والله قمــة وقصايد ولا أروع

والشاعر فلاح غني عن التعريف

صح لسانك ولسان شاعرنا ابن مبرد

جهد مكثف تشكر عليه أخوي أبو ماجد

(حـيـن أرى الإبداع في الموضوع والجهد المتعوب عليه والتنسيق المميز اعرف انه بتوقيع وبقلم أبو ماجد ولا يهون الجميع والنعم يا أبو ماجد وبارك الله في جهدك)

عساك على القوة والله يبيــّــض وجهكـ

ما قصرت والله

سلمت ولا هنت


يعطيك العافية



كــُــن بـخـيــــر أخـــــــي



الــفــــــــارس

ابو ماجد الله يعطيك العافية
وتقبل مروري