نايف الطلاحبي

يقول من نفسه تزايد عمسها ..
وتجمعت* في خاطره كل الاوناس ..
على التصبر حيلته والتمسها ..
يعيش يومه مثل ماعاشوا الناس ..
و ﻻفيه خطه ناجحه مادرسها ..
خطة نجاحن درسوها بقرطاس ..
ونفسه من اللي فيه ضايق نفسها ..
ولو زاد ضيقه قال لاباس لاباس ..
لكن يمين الله واللي رمسها ..
مايهتني قلبن عليه الشقى داس ..
ماتهتني بالنوم عينن حرسها ..
همن عسى يجلاه من عد الانفاس ..
لكن تدري سج الاقدام دسها ..
ماعادلي في حزة الضيق مجلاس ..
سجيت رجلي مبتعد عن غلسها ..
في مهمهن قفرن خلاوي من الناس ..
مابه من العربان شخصن جلسها ..
ولا دار فيها كل شاوي وعساس ..
والضو يشعم من فتيلي قبسها ..
عيدان سمرن جالها وقت يباس ..
وسويتلي فنجال يجلي هجسها ..
عليه من ذعذاع ريحه تنساس ..
من طيب نوعه قيمته مابخسها ..
راعي محلن يجلب البن ب اكياس ..
كيف الرجال اللي تدور ونسها ..
لا زار قلبي كل همن وهوجاس ..
اخير من مجلاس ناسن لبسها ..
ناسن تلبس كل حزه بملباس ..
ناسن من الشيطان جاها حبسها ..
ولا يلتبسها كود جني وسواس ..
على الردى متكاتفه في دنسها ..
ومن الجمايل بنكها مفلس افلاس ..
ومن التكبر زايمه في نحسها ..
ومن التواضع مستشكه بالاحساس ..
والادمي كالحنظله لو غمسها ..
لن كان ماله مع هل الطيب نوماس ..
والعمر يفنى والمنايا جرسها ..
والظلم جثه ميته مالها راس ..
والطيب نخلة طيبه من غرسها ..
يجني ثمرها كالجواهر والالماس ..
وازكى صلاتي لرسول التمسها ..
اعداد خلق الله من الجن والناس ..
واعداد رملن بالفيافي ترسها ..
على النبي الهاشمي خير الاجناس ..
**** نايف بدري العزيزي