ديوان الشاعر نايف بن معلي العزيزي

على وين ياحبٍ تربيت بالاعماق..... على وين ياللي فيك الاشواق مرهونه

على وين ياروح الحشا منوة المشتاق..... على وين ياللي ضمك القلب بركونه

على وين لاتكسر غصون الوصل بفراق..... وتترك خفوقٍ فيك ماباح مكنونه

الا يا عذاب القلب يابلشة الاشواق..... والا ياعنا مشاعرٍ فيك مجنونه

ياويلي من الفرقا صعيبه ولا تنطاق..... طلبتك تراجع والشياطين ملعونه

يضيق الصدر يازين وتقفل الاخلاق..... ولا سر نايف غير شوفتك بعيونه

يقولون كيف الكون واسع وصدرك ضاق...... واجاوب واقول انك فضا الخافق وكونه

عطيته غلا مافيه مثله على الاطلاق....... وتربع على قلبٍ يقدره ويصونه

لكن الزمن لمعاند اهل الهوى تواق...... يدور ويغيّر حاله وينقلب لونه

الا يالغلا والحب والولف والاشواق.... عساكم فدا اللي ما تهنيت من دونه

.................................................. .....