( الملحمة )

تتحدث هذه القصيده عن المناطق الحدودية لقبيلة مطير مع حرب وسليم وبعض الأحداث وقد تم

إضافة وتعديل بعض الأبيات نزولاً عند رغبة القراء

بدينا باسم من يسدل علينا نعمـــــــة الأيمـــــــــــــان = جميع الكاينات تعيش ثم تموت باسبابــــــــــه
وجب شكره وتسجد له جباه الجن والإنســـــــــــــان = وصلاةٍ على الرسول اللي صدع بامره ولبابه
غريزه فالبشر من طبع الأنفس تعشق الأوطــــــــان = وحنا من البشر ونعز موطنا ونحيابـــــــــــــه
ومن بعد الصحيح اصبح غلط والصادق الغلطـــــان = توكلنا على الله والصحيح نثبت اطنابـــــــــه
مواطنا الصداير والحرار وحجــــــر والضلعــــــان = من الملحه الى القنّه على المشرق مشينــــابه
ولنا في قرايا حجر ما يخطر على الأذهـــــــــــــان = من الأملاك والأحياء تراث يضيع حسابـــــه
بحي الحصن نزلتنا وحي الصمــــــد والأحــــــران = وحي الدف والمرخة وحي خسلف ورقابــــه
مواثير الجــــدود اللي ورثنــــاها عن الشيبــــــــان = تكفينا مواثرنا سواها ويش نبغابــــــــــــــــــه
بنينا بيوتنـــــا فيها وكلٍ حــط له بستـــــــــــــــــان = وطلعنا كنوز الأرض بالماء تهدر اشيابـــــــه
ولنا يمة الأكحل وفي وادي الفرع بلـــــــــــدان = وفي وادي ستارة مع سليم مطير قضابــــــــه
وطريق الزاير المعروف حد لحرب والمطـــــران = صحيح نثبته والكذب يقعد عند جلابـــــــه
حدود ديار ما بين القبائـــــــل من عصر بـــــدران = وكلٍ دون حده في المواقف ويتعزوابــــــــــه
ودون حدودنا لنا مواقف تشبـــــه البركـــــــــــــان = تخل الخصم يابسة ٍِ شفاه وكظم انيابـــــــــــه
تذكر ما حصل في حم والبطـــح وفي دخنـــــــــان = لها تاريخ في الماضي ما بين الناس يحكابـــه
تعلم مصطفى باشة عن اللي صار واللي كــــــــان = وش اللي صار للأتراك يمّـة حم وهضابـــــه
على ذيبان دون المال سبعــة كلهـــم سلمـــــــــــان = على راس الكليبة شيخ يعدابه ويبدابــــــــــه
وتال الوقت جونا فازعين ارحامنــا الزبــــــــــلان = يبون خشارمة والكل منهم يشعب ركابــــــــه
نسوا شاعتهم اللي بالمســـن وطلعة اللحيـــــــــــان = على جيرانهم ساقتهم الأطماع بطلابـــــــــــه
تحاموا واحتسوا وأرهوا عليها شايب وشبـــــــــان = وأخذناها بحكمتنا وختم الشيخ وكتابــــــــــــه
وأخذنا ختم شيختنا عناد وكيد للزعـــــــــــــــلان = بعد ضاع الأمل في الناس عاد الحق لأصحابه
طلبنا النور قالوا حرب ما تشهد مع المطـــــــران = وختمك يا العزيزي من جهتنا منقفل بابـــــــــه
صبرنا واحتملناها بعد ما عيوا الجيـــــــــــــران = بعد جانا من الجيران شي ٍ ما هقينابـــــــــــــه
وجنبنا عن الدرب العسر والعود ابو دخـــــــــــان = ومرينا على ربع ٍ تدوس الموت ما تهابــــــــه
وأراد الله يوفـقـــــــــنا وبـأمـــره تفتح البيبـــــــان = وقام الحظ حظ الوايلي دايم يحلابـــــــــــــــــه
وأنا ماذم جيران الوفاء وافين فالقــــنــــــــــــــــان = كريمين الخصايل للكرم والطيب كسابـــــــــه
لكن من الطمع ومن الحمية مقتضين الشـــــــــــان = ومن دون الزعامة عاصبين الراس بعصابـــه
حقيقه والحقيقة مر ما تحلى لكل لســــــــــــــــــان = ولأحد يقـرها إلا من عرف ماأخطاه ما صابه
يقوله من تهيض بالمثل مزلب من القرشـــــــــــان = عزيزي ٍِ يقول الصدق من طبعه ويرضابــــه

كلمات الشاعر
مزلب مسلم العزيزي

تسلم يمناك علي طرحك الراقي
صح لسانك يا ابو مولع
يقولـه مـن تهيـض بالمثـل مزلـب مـن القـرشـان عزيـزي ٍِ يقـول الصـدق مــن طبـعـه ويرضـابـه

بيض الله وجهك والله يكثر من امثالك
تقبل تحياتي

صح لسانك