☼ــ الحب كايد والهوى ييبس الريق ♥

خذ من سعه لياك تاخذ من الضيق =ما ضاقت الدنيا الوسيعه باهلها
خذ من سعه لياك تاخذ من الضيق =ماضاقت الدنيا الوسيعه باهلها
يرضيك ما يرضي جميع المخاليق =اللي يجازي كل نفس بعملها
سج القدم والله عليه التوافيق =واليا جفتك الدار دور بدلها
الصبر مفتاح الفرج للمطاليق =ونفس تعدى حدها من جهلها
كم واحد قد ذاق مر التفاريق =وعقب الرضا نفسه تزايد زعلها
عليه مالت غرب عقب التشاريق =وحتى ايش لو مالت على الله عدلها
محد يلوم اهل القلوب المشافيق =الرجل تركض لين يوقف اجلها
الحب هو ساس الشقا للعشاشيق =والناس بالايام ياطول املها
من ذاق عشرة لابسات العشاريق =ما طاعته نفسه لو انه عذلها
الحب كايد والهوى ييبس الريق =واهل التغزل لاهيه في غزلها
تتل قلبي من سخاف المعاليق =تلة دلي اللي حيا من رسلها
والما بعيد بقاعة ام الزرانيق =والقلب لحم ودم كيف احتملها
قمنا على علم وعهود ومواثيق =ما نختلف وارزاقنا الله كفلها
راع الهوى بالليل نومه تخافيق =دار رحل منها ودار نزلها
ترى الهوى قتال ما فيه تفريق =ياكم قتل نفس ونفس عزلها
واصل السبب من هرج بعض المطافيق =اللي يديه من المروه غسلها
اهل الركاب اللي تلف الطواريق =اتكشف اسرار العرب وتختلها
لاهم بخياله ولاهم تفافيق =اتدور الغرات والله فشلها
علمي بها غربي جبال شواهيق =في روضة توه يفرخ حجلها
روضه تضاحك بالزهر والزماليق =يجذب مسافة يوم ريحة نفلها