جديدي ....

وهذي وداعية للهوزهير لابارك الله فيه ,,,

ياناس مثلي بوسط (الهوز)وش جابه=ماصدّق اللي يشوفه في تليفونه

عز الله اني ما احب (الهوز ) واصحابه=ولانيب امرّه مثل ناسٍ يمرّونه

كذاب والعالم اللي فيه كذابه= علاقة الناس به ماهيب مضمونه
البنت تبغا شحن ,والبنت نصابه=وياخوفي البنت مثل الكرت مشحونه

والورع لاشافهن ما يمسك اعصابه=تطيح سعبولته ويطيّر عيونه
شريعته كنها شريعة الغابه=بالضبط قانونها يشبه لقانونه

مالي وماله لعلّه ينهب نهابه=عساه باللي يزورونه يشبونه
لاعادها ساعةٍ دخلت مع بابه=فيه الصور فاتنه والناس مفتونه

سولفت مع (نوف) لـكن نوف لعابه=ان قلت هي صاحيه / وان قلت مجنونه
يانوف انا ماني من الهوز واحبابه=والعشق(فالنت)مااعرف طعمه ولونه

قلبي مع اللي عساني فدوة ترابه=احب داره واحب اللي يحبونه
دخل بقلبي غلاه من اوسع ابوابه=اكبر من الحب / مدري وش يسمونه !

وتقول لي نوف انا حلوه وجذابه=وابوي يامر على الناس ويطيعونه
واقول يا نوف ما في رقبتي طلابه=الهوز ابعلم اخواني يحذفونه

واللي حصل بيننا مايِحسب حسابه =يعني مثل غشمرة ( طارق وهيونه )