مدونتي الشعرية

تعال مل الهم مني ومليت=مليت دنيا مابها غير ذكراك
تعال تكفى قلتها لك وياليت=ليتك تحس بلوعتي عقب فرقاك
تعال محتاجك ولاغيرك أغليت=تعال وأطلب والمعاليق تفداك
تعال أبي شوفك ترى عني أبطيت=تعال وأنظر لهفتي يوم رؤياك

أنا من عذبه وقته وضاقت دنيته وياه=أنا من فارقه خله بوقتٍ كان محتاجه
أنا من ماتت أحلامه على كف القدر تنخاه=أنا من همه بصدره عجز يقوى على أخراجه
أنا من تبكي أشواقه على حاله على ذكراه=أنا من يخفي بقلبه هموم الوقت وأزعاجه
أنا من خطوته حارت على دربٍ نوى ممشاه=أنا من حب من قلبٍ به الأشواق وهاجه
أنا ذاك العزيز اللي هوى عذرى عطاها جاه=عطاها ملكه وحكمه ولبسها غلا تاجه
بعد ماحطها بعينه بلا ذنب طلبت فرقاه=رجع مثل الغريق اللي يصارع بحر وأمواجه
أنا من دنيته شحت وحظه خانه وبكاه=أنا من بعثر أوراقه وفتش داخل أدراجه
لقى صورة لها تضحك وعطرٍ من غلاها أغلاه=جلس يندم على وقتٍ قضى بالحب منهاجه

أنتي مثل منهو بكى ليلة العيد=وأنا مثل منهو ضحك يوم موته
أنتي بكيتي من فراقي بتنهيد=وأنتي طلبتي بعد تركي وصوته
وأنا ضحكت وضحكتي ماهي تفيد=لاشك أكابر والقدر من يفوته؟
أنا فراقي عيد من يبكي العيد=والموت بعدك من ضحك يوم موته؟؟

يامالكة قلبي بزين التواصيف=يامعذبة قلب المولع دخيلك
يازايرتني في حلا النوم بالطيف=يابرق حبي والحنايا تخيلك
يانازعة قلبي بعذب السواليف=تكفين ردي القلب يكمل جميلك
ياخدود وردٍ بينها سلة السيف=ياليل مظلم لاهزعتي جديلك
ياللي ملكتي بالحلا شي ماشيف=ماأظن بالدنيا أبلقى مثيلك
أنتي بهالدنيا حنان المواليف=وأنا تراني مارضيت ابديلك

أستسمحك يآخر ملذات عمري=قلبي على درب التعاسه خطاويه
دايم وقلبي يحرقه طول صبري=أصبر على مر الليالي وأخاويه
قلبي تعود يحرق أنفاس صدري=وأنا تعودت أجرحه وأحترق فيه
العذر واضح آه ياكبر عذري=عذري أشيل هموم غيري وأداريه
لانافعٍ نفسي ولازاد قدري=ولارحمٍ قلبي وأخفف بلاويه

لاتبعثر أحزاني دخيل أمك يكفيني=همٍ كتمته بوسط الصدر ماأبديته
لاتقول فضفض على بالك تنسيني=وشلون أفضفض وهمي منك لاقيته
لاتقول وش فيك ياعمري وياعيني=وجرحي حبيبي بكفك قمت حطيته
دامك تجاهل أجل مهو درى فيني=مادامك أنت الوحيد اللي تمنيته
مدري تمنى بتجريحك تعنيني=وألا تلذذ على همي وحبيته

قاف مر ..وقاف أمر ..وقاف حلواً سلسبيل،،،
وقاف روومنسي ..وقافاً كل مابه همهمه،،،،،

نبي تبااااع مدوونتك ياحفيد عامر بتمعن

واشكرك على طرحك الرااائع


تقبل تحياتي

أخوي نايف شرفتني بحضورك
لاخلا ولاعدم يالذيب
كن بالقرب دوماً
تقديري

البلا لاضاع بالدرب الدليل=والقهر لاشفت بعض المهزله
لاتشب النار في راس الفتيل=ولاتزودها على ماأتحمله
دام لك في داخل عيوني مقيل=لايغرك دام قلبي تدهله
لاتحسبني معك لاملت أميل=لاتغلى وأنت دمك ماأثقله
لاتفكرني غبي وألا هبيل=يوم قلبك بالغرام مدللله
مرخي حبالي معك ماني ذليل=بس أنا أدرى شي قلبك يجهله
آه لوتدري بحالي ياجميل=كان قلبك مارضى اللي تفعله
مزعلٍ نفسك وتاركني عليل=بسألك هو خاطرك وش مزعله
لوحصل مني خطأ لوهو قليل=كان من بدري حسمت المسأله
وأن بغيت البعد وتدوّر بديل= وأنك تحاول غرامي تقتله
والله أني ماخضعت لمستحيل= بآخرك يالعمر وألا بأوله

جتني خجل تمشي وتقصر خطاها=تآخذ من أنفاس النسيم النقاوه
جتني تحدى للقمر من بهاها=وتثبت لقلبي حبها والغلاوه
ريميةٍ عشق الجنون بهواها=وطبوعها زين ودلال وشقاوه
في خدها شمسٍ تجلى سماها=وفي جيدها رمح الهوى بالعداوه
بعيونها دنيا بعيدٍ مداها=وفي حضنها حل الحنان بهداوه
حمرة شفق قبل الظلام بشفاها=فيها أنشغال وطيش فيها قساوه
متمردة مثل الصغير بشقاها=مامثلها عذراء بذيك الحلاوه
جديلها لاهل ليلٍ كساها=وهرجة بدو يازينها من بداوه
هاذي عنا نفسي وهاذي دواها=عطتني أشواق المحبة سخاوه