ديـــــــــوان الشاعر منيع الله داخل

بـــســم الــلــه الــرحــمــن الــرحـــيــم

السلام عليكم ورحمة الله وبركاته

هذه قصيدة تُعَبّرْ عن موضوعها الذي كُتِبَت من أجله ، أتركَكم مع القصيدة

الـحـاجـة أُم الــعِــرف والــشــك زايــل
مــع قـسـوة الأيــام تـسـقـي مـريـره

مـنـهـا عــرفـنا الـلـي فـعـولـه دلايــل
دلايـلٍ لـلـطـيــب صـافــي ســريــره

فـي وقـفـتـه يـسـوى كـبار القـبايـل
بـدّى الـكـبيره كـيـف عـاد الصغـيـره؟

فــي ذا الــزمن قـلـوا عيال الحمـايل
يـاكــثــرهــم لا قـلـت عـرفٍ وجـيـره

ياقـلــهــم لاجــاء نــهــار الـصـمـايـل
تــقــصر خــطـاهم ماتحث المسيره

وش حاجتي فاللي يسوق الهزايل
لاهـو مــرافــقـنـي ولانـي شـويـره

ماهـو من الـلـي يكسبون الجمايل
ولاهـو من الـلـي له فـعولٍ شهيره

يـاجـالـب الـهـزلاء ولـلـشـر شـايـل
مـأنـته خـويـي جـعـل فالأمـر خـيره

أسـعـى ورى اللي طايل لكل طايل
فـيـه أفـتـخـر فـي كـل حـيٍ وديــره

السلام عليكم ورحمة الله وبركاته

يسعدني أن أطرح هذه القصيدة لكم ولك هاوي ومحب ومتذوق للشعر


بــالله يــاهــل الــخــير هاتوا وليفي
هاتوا وليفٍ يــســعــف القلب بدواه

عــن غــيـرهــا ماكنــي ألا كـفيفي
مــاشــوف فــي زين الغنادير حلياه

فــي وصــــها ماشفت مثله وصيفي
يــقـصــر كـلامـي دون توصيف ماطاه

قــلــبــي لــهــا دايم ربيعه مريـفي
مـــربــاعــها بالقلب والقلب ملجاه

حــبــي لــها عــدٍ شــرابــه نـظيفي
صافي زلال أحلى من السكرى ماه

من زود حــبــه صاب قلبي رفيفي
رفـــيــف طــيــرٍ حده القيظ وأضماه


وألاكما صوت السعف له حفيــفي
من سمع صوته يلتفت كلما أوحاه

وألا كــمــا صــوت الرعد بالخريفي
الــذيــب من خوفه تزايد به إعــواه

يالله.. ياربٍ.. خبيرٍلــطـــيــفــــي
ألــطــف بقلبي كلما حل طــرياه

ديوانك اخي الفاضل كنز من كنوز الشعر
تم النشر على تويتر
https://twitter.com/beni_aziz
تم النشر على الفسبوك
http://www.facebook.com/profile.php?...50&ref=tn_tnmn

الأخ القدير

خوي سالم


كلماتك هذه تزرع في نفسي الاصرار والمثابره ، على أن أقدم أفضل مالدي

لـــــــــــــــمــــــــــــــــــــــاذا ؟؟؟

لوجود أمثالك الذين يتايعون أول بأول ماأكتبه ، ولو أنه أقل من ذوائق أهل الشعر ومحبيه



أخي العزيز مرورك شرف لقصائدي ....... وشكراً

بسم الله الرحمن الرحيم

السلام عليكم ورحمة الله وبركاته

أعود إليكم بهذه القصيدة عسى أن تروق لقارئها


إعـــداد نــو السحاب اللي نــشــى وإنتثــر
أحياء هشيم ٍ بلى وأحــيــاء عـروق الثمام

يــا مــرحــبــا يالقوافي يوم شــعــري حـضر
إفــرح وحــي الــمــعــانــي يـاجـزيــل الكلام

الــشــعــر تــمــطــر حــروفـه مثل وبل المطر
جــزل الــمــعــانــي لــها قـدر وغلاء وإحترام

الــشــعــر قــول الـفهيم اللي شًرَح وإختصر
ماهو لحون ٍ تــشــادي نــوح َورق الــحـمام

وأنــا غــطــسـت الــبحر وأظهرت منه الدرر
مـاهــاب مــوج الـبــحــر وألاســواد الظـلام

صخرت عسر القوافي والــمــعاني صــخـر
طوّعت شرد المهار برأس حد الــحــسـام

الشعر يَكتِب وأنا لا غاب ما أكـتـب سـطر
أنا أشـهــد إنــه وســام الــعز حيه وسام

وأنا أشهد إنه عضيدي في عصيب الدهر
وأنا شهد إنـه بـقـلـبـي لـه رفـيـع المقام

تـبـي نـهـايـة كــلام الــشــاعــر المـعتبر
لا تــجــبر الــشــعـر حتى لورقيت الغمام

السلام عليكم ورحمة الله وبركاته

أنصح نفسي المقصرة اولاً ... ثم أنصح كل مقصر .....
إليكم هذه القصيدة عسى أن تنال اعجابكم .....

يـاسـابحٍ بــحــر الــمــلــذات بـأنــصـحـك
ولانــي عــن الــهـفــوات رجل مـعصومي

لاتــتــبــع الـنـفـــس الـرديـّه وتــطــرحك
لـن طـحـت مأنـتـه فـي يــديـن الرحومي

إبـلـيـس لا يـغـــري شــبـابــك ويـفضحك
وإلـيـا فـضـحــك يــقـــول مـالـي لـزومـي

يــغــريـك بـالـشـهــوه ويـــضـحك ويفرحك
قـــصـــده يــصــدك عـن صــلاةٍ وصـومـي

عـن صـحـبــة الأنـــذال ومــزارق الضـحك
أبــعـد تــرى لـلـطــيــب نـهـج وسـلـومي

ولاتــصـحب الـلـي فـالـمـجـالس يمازحك
فــي غـيـبـتــك يـــكـثر عـليـك السهومي

تـــرى الأفــاعــي لـن تـقـفـتـك تـجـرحك
مـاتــصـحي ألا عــقــب بـث الـسـمـومي

أخــلـص مـع الــطيب ترى الناس تمدحك
لاتــذخــر الــمــعــروف عــند الـرخـومــي

إلــزم ســديــد الــراي هوسـاس مربحك
فــي رفــقــتــه تنــزال جــل الهــمــومي

أطلب عسى اللي مصلح الناس يصلحـك
ويـــصـــلـــح لي الـنــيــه وباقي علومـي


منيع الله بن داخلِ

اعجــبني الابداع ولاهـــي غريبه
مريت انا من هون وشفت الفرايد

الليث غامرني بجوده وطيبه

يشتاق له قلبي وكل القصايد

السلام عليكم ورحمة الله وبركاته

أعود إليكم بهذه القصيدة الجديدة ،أتمنى أن تنال أعجاب محبي الشعر ....

الــنــفــس داخــل لِبّها صــار زلــزال
أظــهــر خـفى نزف الجروح الدفيــنه

الــصــبر طــب الــهــم لوهــمـنا طال
لابـــد مــاتــفــرح نـفـوسٍ جــزيــنــه

يـانـفـس لاتـشـكـيـن من ضـيقة البال
إلا عـلـى مـنـجي غـريـق الـسـفـيـنه

ترى الهـوى وإبلـيـس هي طول الآمال
درب الــخــطــاء يــانـفس لا تسـلـكينه

إسعي وراء أهل الدين في كل الأحـوال
درب الــسعــد والــخــيـر لاتـتـركــينـه

يــانــفـــس لاتــبـديــن سرّك لــلأنــذال
أهــل الــخزى وأهــل العـقول المهـينـه

هــرج القـفى والنــمْ هـي شـر الأعـمال
لاخــيــر فـي ذكــر الـعــلــوم الـمـشـينه

تــمـهـلي فــي كــل قــولــك والأفــعــال
قــبــل الــحــســايف والــنـدم والــغـبيـنه

مـــادام ربــــــك كــــاتـــبٍ كـــل الآجـــال
لا بـــد مــاعـــمـــرك يــــودّع ســنــيــنــه

يــانــفـــس تــوبــي بــاقــيٍ عــدة إلــيــال
مــحدٍ قــرأ عــمــر الــفـتــى فـي جـبـيـنه


كلمات .... منيع الله داخل العزيزي

السلام عليكم ورحمة الله وبركاته

أعتذر عن طول الغياب اللذي لم يكن فالحسبان....

وأعود اليكم بهذه المساجله الشعريه اللتي دارت بيني وبين الشاعر الكبير
رويضي بن وسمي العزيزي

أترككم مع القصايد (البدايه عند الشاعر .... رويضي وسمي العزيزي)

قــافــي ياأبــوعــادل يخصْك وينصــاك
دارت بي أيــامـي عـلى غــيــر وجهه

عيْت تجي بالــكــيـف دورات الأفــلاك
والــوقت مايصـفي من الـوقـت بـرهه

مــره على كيــفك ومـــرات يـعــصاك
ويلحقك مع بعــض الرياجيـل شـرهه

الله عــلى جــزل الســواليــف ويــاك
جـزل الــقصيـد اللي من الغث نقـهه

أخــيـر مـن هــــرجــة حـقودٍ ونمْاك
الناب يضـــحـك لك وفالقــلب كــرهـه

هذر الكـلام الــلي على الهزل ينحاك
هـــرجٍ بـلا ثـــمــره ولافــيــه نــكــهه

أســج عــنهـــم يم مثلـك وشـــرواك
لــو هـم دعـوني عنهم الأذن صــقهه

للطيب أسج الرجل لــو دربي أشــواك
مأرضى المكان اللي يجي فيه شبهه

وأنــحا لجــمعة مجلسٍ فيــه يزهــاك
ويحــوش مـنه إمدوّر الــفـقـه فـقــهه

قـال المـثـل ياوارد الــدبــــج مــأرواك
لــو يــنـقذ الهــالــك ويـعــطـيـه نبــهه

إرد الــقراح الــلي لــياجــيته أشـفاك
لــوقــامـو الــعــدوان دونـه بــجــبــهه

أبيات شعرٍ جــعلها تـكــسـب إرضــاك
الـنـفـس لمـداعب مـشــاعــرك ولـهه

لونصّيَت غــيــرك يجـي قـلــبـــه إربـاك
ويـجـيـه فـي تــركـيـبـة الـقــاف بــلهه

عــيدك مــبارك جــعل الأنذال تــفــداك
ودي بــشــوفــك مــيــر الأيـام مــلـهه


(وهناء الرد مـــــنـــــي)

يامــرحبا يــاقاف ياعســــر مــبناك
الشعر يـــفرح بـي وأنا أسـر وجهه

ياشـــعر لاتقـصــر عن الجود يمناك
أسق الهجوس وهــل بالجزل وأرهه

بالــوقت لاتــفــرح لــيا منّه أعــطاك
يكسيك عــجه عقــب ماذقت نـفهه

الــوقــت لــه زلّه وياكـــثر مأشــقاك
مثل الســفيه اللي بــلانا بــســفهه

وجزل القصيد اللي على العــز خاواك
مــن طيب قــولك كنّي أخــذت نــزهه

تشرب قراح وشفت قمري على الراك
وترســم لنا...ماشيــف مثلـه وشـبهه

أخير من مجلس ليا قــمــت يــجــفاك
ســادة على جــوّه مــخـالـيــق كرهه

أبــعــد وخـل إقليّل الـديـــن يـــجـفـاك
لاتــتــبــع الـلـــي بان ضـعـفـه ودرهه

وإحــرص عــلى من دام عـرفه وصافك
وإنــصــح مادام النــصـح للـخيـر وإنـهه

ومــادام رجــلــك للــعلاء حطة إخطـاك
أرقــب عــلى عــرش المــهابات وإزهه

عـــيــدك عــساه يــعود والطيــب ملفاك
إما قـفـلـــت الـــقــاف وإلا أنــتــه أنـهه


منيع الله بن داخل العزيزي