قلبي على ضمتك يسابق يديه .. ويردني طيب أبوي ومرجلة خالي ..!!

بيني وبين الشقا سلام ردية
........................ يفتل جروحي وانا انقضها بموالي

عيّد بي الهم وأثر الدمع عيديه
........................ ولاني بذاخره دام عيوني عيالي

ياعين هلي دموعك كل عصريه
........................ وان لمتك بيوم قولي مالك ومالي

محتاج طاروق له معنى وقافيه
........................ واستبشري خير والشعر يتهيالي

القدح من فكري وفي الراس جنيه
........................ وان حضرت بي كتبت العالي العالي

ماشلتها عرضه ولاهي هجينيه
........................ غنيتها مدري الطاروق غنى لي

بس الوكاد انها قصة غرامية
........................ أبطالها همي وغمي وغربالي

وان قالوا الناس ذا طبع الهواويه
........................ قلت استوى عندي الترياق والحالي

العشق بلوى ونفسي فيه مبليه
........................ خلوني اكتب وافضفض لاتفضى لي

المسأله أكبر من احلام ورديه
........................ الحزن لا من لفى جيته على فالي

حزني واعرفه واعرف ابسط مواريه
........................ ولاني لحالي كثير اللي عرف حالي

ياوجد حالي وجود اللي هقاويه
........................ خانته بأغلى رفيق ولا لقى والي

وياوجد حالي وجود اللي بن آخيه
........................ عن عسر حاله وضيقه داله وسالي

في غيبة اللي تمادى بالأنانيه
........................ وخلاني بوجه حزني واقف لحالي

ياموسع الضيق لا من مر طاريه
........................ كن الوسيعة تضيق إن مر في بالي

وين انت ياللي بعادك مأثر فيه
........................ غايب وأحسك معي وأشوفك قبالي

طيفك اليا مر حاجه لا اراديه
........................ اتبع سرابه واجيه اسابق ظلالي

ياللي من حروفك تغار الرومنسيه
........................ والله قبل لا افقدك فاقدك جوالي

في بحتك شي يشبه حزن مرثيه
........................ ومن غاب صوتك وانا اللي صدق يرثى لي

وعيونك السود اعجاز وخياليه
........................ نادر شبهها مثل ماتندر خصالي

ونظرتك تهدم كياني بكل عفويه
........................ سلهم وشف كيف يبدأ فيّ زلزالي

وعودك إليا مال يالمترف بحنيه
........................ قمت اتعزوى واطوح لأجله عقالي

وقلبي على ضمتك يسابق يديه
........................ ويردني طيب أبوي ومرجلة خالي

تكفون ياللي تمرونه علانيه
........................ قولوا له الموت لامن غاب يطرى لي

وقولوا له ان غيبته ماهي بعاديه
........................ وخلوه يرجع ويشوف بعينه أحوالي

وقولوا له أنه ذبحني لعن أبو حيه
........................ مايرحم الشوق غالي ينتظر غالي

وقولوا له ان صد والصده نهائية
........................ أشوا لي أصد ..لا والله وش أشوا لي..!!

حيل الله أقوى عساها روحه بجيه
........................ وعساه مايبطي ويرجع ويسعى لي

وقولوا له الله حسيبه كان له نيه
........................ ماعاد يرجع لي وقولوا له التالي

حرام كلي ظمئ و يديه وسميه
........................ وحرام مالي امل مادامه أمالي


الشاعر المبدع :محمد جار الله السهلي

ليه البناات يحبون هالشاعر بذات

على العموم

يعطيك العافيه

وتشكرين

هههههههههههه

والله مو عن احبه بس عجبتني ونقلتها لكم

يسلموووو على المرور اخوي ابن صعير

يسلموووو على المرور اخوي ابن صغير

صغير ... والله ماانعرف هالاسم الا صغير الطحش

لكن أنا أبن صـعـيـر

وبدلي الغين بالعين

ومانسمح بهالخطا المطبعي مره ثانيه

هههههههههههههههههههه

اسفه وربي ماكان قصدي ولا انتبهت

امسحها بوجهي ياخوي وجل من لا يسهو

مااهنا مشااكل

صح لسان الشاعر محمد السهلي

قصيدة رائعة

شكرااا

تاج العذارى

واسمحوا لي على التعديل

شاكره لك على المرور

ولاهنت على التعديل

مشكووره على النقل

وصح الله لسان الشاعر محمد السهلي

وتقبلو مروري

شاكره لك على المرور