بنود عقد البيع

السلام عليكم ورحمة الله وبركاته

تل قلبي تل دلوٍ حملها فالقامه=المحال يلج صوته والرشا يجذبها
تجذبه(حمرً)ردومٍ 00حايلٍ00 رزامه=لو يتل خطامها السناي مايقضبها
من زمانٍ ماعرفنا حكمته وحكامه=وهجرةٍ تبحث خفايا كل من عاشبها
الجلوبه غاليه والسوق له سوامه=غير راعيها جحد والوسم في منكبها
والبواخر والسفن فالبحر عوامه=والهدف مجهول والحسبه غلط حسابها
وردةٍ من دونها امواج البحر لطامه= وغبةٍ ماكل من غاص البحر غاصبها
مايجيها الشاوي اللي محتزم بزامه= لو 00ذلوله مع تهاتيه الخلا يشعبها
من جهل ينظر وراه وعلته قدامه=والبلا من خاف له من علةٍ ماتبها
كل رجلٍ حسب مجهوده وحسب اسهامه=احدِ يعدل ميلها المايل واحد ينكبها
من مشى من دون عرف يعيش في دوامه=ومن عشق دنيا الغرور وحبها هامبها
من رضى (ببنود عقد البيع)قبل ابرامه=لايصيح وشرهة اللحيه على شاربها
مستحق اللوم مايشره على من لامه=والنصيحه فرض عين لواحدٍ يطلبها
الرجل دون المصالح يكثرون اخصامه=والذكي في هالزمان من لعبته يلعبها
من تحزم ماعرف رمي الهدف ووقامه=ضاع بين اقسم بها 00 وانقل بها00 واذهبها
صاحب الصنعه اللي يتقن صنعته علامه=هينه عنده وعند الغير يامصعبها
والاوادم في جنوب الكون والا شامه=كل اهل مذهب تشوف الصح هو مذهبها
قالوا اهل العرف( بنت)الرايمه روامه=والاصايل خامس انساب الفحل ينجبها
من عطا درب السنع لو يتعبن اقدامه=الجماله دوم مردوه على صاحبها
الرجل مازينه عند العرب هندامه=يرتفع قدره نهار الطيبه يكسبها
من بغى فرقاك مانته ملزمٍ بليامه=والاوادم صعب نرضيها بعد نغضبها

شاعرنا رويضي

نص فاخر فاق الابداع بجمال مفرداته السلسه والعذبه

صح لسانك حتى ترضى

صح لساانك

ي بووو ناايف ..
شاعر كبير وستاذ شعر

حياك الله يارويضي
قرات الابيات اكثر من مره
يالها من ابداع كن قريب ولاتغيب

صح لسانك شاعرنا القدير
نص فاخر اشيد به اجمالا
لكن لفت انتباهي هالبيت
والـبــواخــر والـســفــن فـالـبـحــر عـــوامـــه
والـهـدف مجـهـول والحسـبـه غـلـط حسـابـهـا

اتوقع انه في خطأ املائي يمكن ان البواخر والسفن فوق البحر والا وسط البحر انا ماني بقريب من التخصص ولا اجزم بالعوم

كذلك
وردةٍ مـــن دونـهــا امـــواج الـبـحــر لـطـامــه
وغـبـةٍ مـاكـل مــن غــاص الـبـحـر غاصـبـهـا

كينونه الورده او ضرفيتها وربطها بالبحر قاب قوسين او ادنى من الغموض

اخيرا
مايجـيـهـا الـشــاوي الـلــي مـحـتــزم بــزامــه
لــو ذلـولـه مــع تهـاتـيـه الـخــلا يشعـبـهـا

الشاوي رمزيا ووسيلة تنقله البريه ربما كان بعيدا كل البعد عن الاهتمام لمثل هذه الامور

شاعرنا
ربما لاتتسع مداركي لذلك فكان مااسلفت قصورا في ذائقتي


اعذب تحيه