مدونتي الشعرية

سألني ساكنن سدي سؤالن سبب لمسراه=سؤاله سامعن سمعه سفيهن سمم أسراره
سألني وأستدار وسج ساقه ساري وسراه=سري سايق هجوسه والهواجس تسبق سطاره

ياهجوسي ولميلي من لحونك ماتهيا=شاعرٍ ضايق مزاجه عقب ضاقن الحنايا
ساهرٍ ليلي وقلبي دك همه قلت هيا=سج ياقلب المعنى مع طواريق وحدايا
قمت أراجع مامضالي من زمانن عنجهيا=سيرةٍ ولت ولاباقي لها كود الشظايا
قمت أصارع عبرتي والدمع في عيني عصيا=وأصفق الكفين كف بكف وأعظ الشفايا
ول ياجور الزمان وول ياسرن خفيا=وول ياسود الليالي لو يبيحن الخفايا
ليت من يعلم بسري لانشدوه الناس عيا=واحدٍ يدري بحالي عارفن كل السوايا

يفز قلبي بين عوج الحنايا=لامن ذكرتك يادفى كل الأحساس
أن كان باقي للمحبة بقايا=ألطف بحالي يابعد كل هالناس

ياللي تناظرني وأنا في طرقتي عابر سبيل=أدخل على الله من عيونك والرموش الجايرة
نظرة عيونك عجلت مسراي يالطرف الكحيل=سريت من قل البخت وعروق دمي فايرة
أحرقت قلبن مابقابه غير لوعات الرحيل=وزودت كل اللي بقابه بألتفاته حايرة
لوكنت تدري عن خفايا رحلة القلب العليل=يمديك ماسلهمت تطعن بالجروح الغايرة

ليت السحاب أن هل وبل ومطّر=بأمرالولي يحي الغصون الهمده
ولأقبل على ذيك الديار وقطّر=يجلى براد المهد صالي ومده
بأرسل قصيد من الورود معطّر=أصلي ومن شركة شعرمعتمده
عندي بكارسمان ماهي فطّر=تجلى الرمد عن العيون الرمده
شاعر على جزل البيوت منطّر=وهبه من الله وأشكره وأحمده
والله ماودي بكسرالخطّر=لكن من يحيي الهجوس الخمده

من قال لك أنك بعيني ولاشي=أنتي بعيني بين جفني والأهداب
لاتحرقيني شوي وشوي وشوي=ماعاد باقي في من حبك أعصاب

ليتك حفظتي سر قلبي عن الناس=ياللي تبدينه على كل سامع
حجتك نثرن للمعاني والأحساس=وتنفيس كربة صدر للهم جامع
لين أطمعوا بي كل واشي وبلاس=سود الوجيه مكترين المطامع

تبين الحق لو أني أطاوع قلبي المسكين=يمين الله لأبيع الكون كله لجل يحضابك
خفوقن شاف فيك اللي أبد ماشافته لي عين=جمالن أنفردتي به وقلبي منه غنابك
ولكن لاذكرت أني أسلم قلبي السكين=أدوس القلب وأحساسه وأغير صفحة كتابك
أعرف أن الهوى رحلة متاهه في ضياع سنين=ولابه غير لوعات المحبة تنقل أتعابك
حكاية قلب من شافك أحسه ضاع ماأدري وين=بها لك يعترف لن الحكاية جات بأسبابك

حسبي عليه الله المعبود سبحانه=وشلون بالوصل يوعدني وينساني
ماكنت أظنه نوى قلبي بهجرانه=ألين قفى على وجهه وخلاني
غرون يصب العسل من هرجة لسانه=والوجه مثل القمر والجسم روياني
ياليت قلبي يطاوعني بنسيانه=لاشك قلبي على نسياه يعصاني

حبيبي لاتطول غيبتك ماعاد فيني حيل=غيابك يحرق ضلوعي وقلبي ذاب بأسبابه
سهرتك حبي وعشقي نسجتك من خيوط الليل=وقلبي ماذكر غيرك إلى طرواله أحبابه
حبيبي غيبتك فيني عذاب وجرح مع تنكيل=دخيلك حس في صوت الجريح ونبرة عتابه
حبيبي يابعد عمري أنا ماأرضى بك التبديل=وغيرك لويناديني فلا قلبي بيشقابه
نهاية قولي أحبك وأحبك حيل حيل وحيل=ولكن الغياب اللي ذبحني وشهي أسبابه