صرخات أعزب

بسم الله الرحمن الرحيم

اقدم لكم هذا الموضوع اقري واحكم علي هالافكار وربي وناسه
غلا المهور هي السبب

يالربع انا قدر الله علي وسكنت عندكم بالحاره ( قال وش حادك على المر ) مير خلوني أعلمكم بعلم إذا عندكم نيه تشوتون الموضوع بقراشيع الحاره عطوني خبر عشان ما أكلف على عمري واكتب هماهو وإذا هداكم الله. بس عاد ردو علي لا تخلوني , مير هيهات أصلا أنا قاعد لكم هنا عظم والله ياواحد يقرأ الموضوع وما يرد علي أبدعي عليه قبل صلاة الفجر وهذا أنا علمتكم بالله وش فيها لو رديت علي , والله ما يكلفك شي مغير أنك تضغط على صندوق التبرعات إضافة رد ومانيب طماع بالحيل , أبد اللي تجود به نفيستك لو تقول لي : يازينك ساكت عادي أبتقبلها بصدر رحب

بالرغم أني سطل جديد هنا وتوني كما ذكرت فرفور وبغباري ( لا يغركم أسمي تقولون هذا رخمه ولد أمه ما يعرف حا من با ) إلا أن ودي أسرمدكم بقدمه لا يشق لها غبار مير أني خايف يغالطكم النعاس همن تنامون وأقعد أبابي لحالي لكن كما قيل خير الكلام ما قل ودل ( أبصق في وجهي أن لم تسرمدهم يالهيس )


السلام عليكم
كني مصيّف , ما سلمت إلا متأخر ( حبذا لو تخش بسالفتك بسرعة لأن فيه واحد هنا متقعدن لك وده يصكك بالفاره بين عيونك ) طيب طيب أبخش بس لا أحد يدفني تكفون أخاف أدخل الموضوع أمشي على جبهتي .. ذكرت علي سالفة واحد من الشباب الله لا يذكره بالخير , يقول وهو والله رجالن تسذوبن أبقع ( طراه يوم اقول أدخل الموضع على جبهتي ) يقول : يوم من الأيام مروني العيال يبي ياخذوني معهم عازمنا واحد من خوينا بمناسبة أستلام أول راتب بعد ما خلص دورة التجنيد بالحرس في كفي شوب , يقول أنا سمعت طاري كفي شوب قلت ما يبيلها لازم أكشخ وأزكرت عمري ولازم أصك أزارير القلاب المهم وانا اللي اسمي بالرحمن وأدخل الكفي اللي هذا زين ريحة بخورهم ويوم أقبلت على الباب وأقعد أسنع من شكلي شوي ويدخلون الشباب قبلي .. خبري بالناس يدخلون المحلات يمشون على رجولهم لكن للأسف أنا ما دخلت أمشي على رجولي دخلت الكفي أزحف على جبهتي الله أبوك قلاب صاكن على رقبتي وماقدرت انزل راسي أشوف الدرج , وعقالي ما رده إلا رجول رجال جالس يطقق باللاب توب وداخل جو بالنت وما جاب خبر العقال وانا اللي أجي أسلم عليه وهو ينتبه لي يحسبني من هاللي يشحذون شماغي على كتفي وطاقيتي بيدي بس ناقص الصك , حط يده بجيبه يبي يعطيني المقسوم , قلت لا والله ما تحاسب بس الله لا يهينك عقالي تحت رجولك طال عمرك ... أنتهى كلامه رحمه الله



أسعد الله اوقاتكم جميعا

مالكم بالطويله يالربع خلوني أدلف بكم في الموضوع

أنا رجال عزوبي وما الله عطاني من الذرية الصالحه موظف وراتبي عليه من الأقصاد الشئ الكثير ( يعني سلف لا تدور مش خشتك ) وتراودني هواجيس هاليومن أني أخربها وأعرس ( تخبرون حنا برد والدفا زين ) يعني تخيلو لو أشوف رجال يمشي مع زوجته أقعد أناظرهم وأصيح و مثل ما أنتم عارفين ( أنتم يالعزوبيه ) هواجيس العرس ملعونه ما تخلي الوحد ينام , بس أتقلب على فراشي يمين ويسار وأطقطقها براسي كم مجموع التكاليف لو جزمت على العرس ..

يوم من الأيام جالس على المكتب وقاعد أكسر حسابات العرس بجوالي وحاط حرتي بالجوال , دخل علي واحد من زملائي بالعمل , سلم علي الرجال ما قصر العادة اللي يشوف وجهي ما يسلم يقول الحمدلله والشكر على العافيه المهم محاتسيكم خاش جو ملعون جدف ما رد السلام , عاد هو الله يصلحه وجه أبن فهره إذا جاء لازم حاجه تخرب أول ما طالعت في وجهه علق جوالي وطفأ أحووول , قال وش تسوي قلت مستظرفا أطير حمام وش أسوي شوفت عينك أطقطق بالجوال قال : والله من المقاطع عطنا عطنا قلت المقاطع خليتها لك أنا ر جال ناوي أعرس قال : خل عنك بس أنت وجهك وجه عرس ( عاد أنت اللي كفو عرس ) قال : العرس يبيله مهر ومصاريف وشبكه و و و , عدد لي حاجات كثيره كنت ناسيها قفلها بوجهي قلت : أرتحت الحين يالبومه يوم قفلتها بوجهي لعنك الله أيها المخنز

بيني وبينكم الرجال صادق , الحين المهر لحاله سالفه طويله عريضه وما يكفيه قسط واحد والمشكله أن بعض هالشيبان عندهم من البنات إلى بكره ولو يجيهم واحد يخطب صمخوه بهاك المهر مع جبهته يطلع الولد مع الباب دايخ ومرتفع عنده الضغط والسكر ومنهار ما تشيله رجوله ويرقد أسبوع في المستشفى إحتمال يطلع وإحتمال لا . يا أخي أرحموا من في الأرض يرحمكم من في السماء والله أكاد أجزم أن ما قضى على الشباب في السعودية إلا مثل هالشيبان ومنهم على شاكلتهم عليهم من الله ما يستحقون ما أقول إلا الله أوكبر عليكم , مير خله كوده يجي يوم نلقاكم باسطين ب بناتكم على الرصيف يا أني أبضحك عليكم وأدق على مكافحة التسول ..

طيب ماهيب مشكله المهر أدفعه مره وحده وأفتك منه لكن المصيبه هي مرحلة ما بعد المهر طلبات الأم وبنتها اللي ما تنتهي نسأل الله السلامة والعافية (عاد تحسبهم يعطون الواحد حقه الشرعي _ النظرة الشرعية _ ويشوف البنت قبل يجازف بحياته) !! أبدن ما يشوفها ولا يشم ريحتها مغير يمشي على عماها أن صابت صابت وإلا يبتل طول عمره في شك أنه متزوج أخو البنت << سمعنا وسلمنا

وبسبب طلبات الأم والبنت , الواحد خبره بعمره يوم الخطبه بحدود ال 27.. لكم الله ما تجي ليلة دخلته إلا وعمره يناهز الستين ربيع أعنبوهم طلباتهم ما تخلص أم البنت مواعين المطبخ مهيب عاجبتها تقول : أنهن موب صين يتكسرن بسرعه ( والله على حسب بنتس ورفالتها ) ,, البنت تكلم المجني عليه تقول له : حبيبي كنبات الصاله لونها يجيب الكتمه وهو بنفسه يقول : والله ما ندري منهو اللي يجيب الكتمه أم البنت تكلم أم الولد وتقول لها : شبكت بنتي ذهب أبيض مرصع بألماس وأنا أجزم لو تحرج على البنت وأمها ما جابو قيمته وصباحيتها طقم ما يقل قيمته عن عشر ألاف ريال ( وجه ماسك راسه من الصدمه ) والبنت مغير تناقز من مشغل إلا مشغل هذا صبغة شعر وهذاحمام زيت وهذا تقشير ( برتقال ) والمشكله شكلها هي هي ما تغير وكل هالمصاريف على ظهر هالضعيف الولد وهو حايس بسوق الغنم يدور على ذبايح
يعني الواحد ماتجي ليلة زواجه وصحة بخير إلا ملعون جدفه هذا غير كيسة الأدوية اللي معه شي للضغط وشي للسكر وشي للمرارة وشي للمرتيزم غير اللزقات اللي بظهره هذا وهو ما بعد دخل
إنا لله وإنا إليه راجعون

يعني وش الراي أجزم على العرس وإلا ما أجزم , المشكله أن طولت عزوبي أكثر من كذا سوف أصبح خطر على المجتمع وأخاف أنحرف وأصير داشر تسلاب ..


المهم وشلكم بكثر الحتسي ( وهاللي فوق وش تسميه , هرطقه !! )

نخرج من الموضوع بالتوصيات التاليه :

1 - تقنين المهر وإدراجه ضمن لوائح وأنظمة حماية المستهلك بمعنى أخر جدولة البنات .. المزيونه الطخمه لها سعر واللي وسط لها سعر والشينه تصرف عمرها ما أطرف واحد , عشان ما يتوهقون الشباب ويدفع اللي وراه واللي قدامه وأخرتها يطلع متزوج رجال كما قال المثل : عاد بخفي حنين ( تكفون واحد منكم يتبرع ويصورني مع المثل هذا )

2 - مصاريف الزواج تقسم بالتساوي بين الزوجين بمعنى أنتي يالبنت الله لا يهنك تطمرين لسوق الغنم وتشترين نص الذبايح , عشان العصمة بيد الرجال ياكل تبن لحاله


3- أما أم البنت يحجز لها تذكرة سفر وإقامة في نيجيريا خلال المدة من تاريخ الخطوبه وحتى بعد ليلة الدخله بثلاث شهور .تخبرون الأم ما تترك بنتها حتى من بعد ما ياخذها زوجها وتسأل عن أدق التفاصيل أهب يا وجهها .

4- يراودني إحساس متعوب عليه أني أبصير خطابه في يوم من الأيام ( وجه يقول لايقه عليك )


هذا والله أعلم

منقووووووول

تحياتي لكم

الله يجزاك خير أخوي بيـرق مـطيــر


يعني الواحد ماتجي ليلة زواجه وصحة بخير إلا ملعون جدفه هذا غير كيسة الأدوية اللي معه شي للضغط وشي للسكر وشي للمرارة وشي للمرتيزم غير اللزقات اللي بظهره هذا وهو ما بعد دخل ههههههههههههههههههههههههههههههههه

والله ماني عارف اضحك وإلا أحزن لظروف الشباب الغير قادرين على الزواج



ما قصرت والله


سلمت ولا هنت

يعطيك العافية

مشكور


كـُــن بـخــيـــر أخــي


الــفــــارس

مشكووووووووور اخوي علي المرووووووور وتعليق الرائع

مشكور يا بيرق مطير

شكرااااااااا

بيرق مطير