قصيدة رائعة هلال بن عايد الطلاحبي (أبوتركي) يمدح بني عزيز

هذه إحدى قصائد الشاعر في أحد مناسبات اجتماع العياضات من بني عزيز المختلفة

يامرحبا باللي بهم ندحم الضــــد=ياعزوتي يوم اصطفاق العلومي
حييت ياصف الرجال الموحـــــد=اللي لنا مثا القمر والنجــــومي
أنتم سلاحي عندما الحبل ينشد=سلاح نضرب به وجيه الخصومي
وأنتم غطاي اللي يدفي عن البرد=وأنتم ذرايه من لهيب السمومي
لن جا المعاند واصبح الجمع يحتد=خصيمكم بأمر الإله مهزومي
وانتم حماة الجار بالجزر والمد= بأمان لو ان الأمان معدومي
وانتم حماة الجالي اللي مشرّد=يعيش معكم دالهٍ ومحشومي
وخويكم ودخيلكم مايهــــــدد=في جوف قصرٍ مايجي به ثلومي
أساسكم ويلان وعياضه الجد=وكلن على العليا يريد القدومي
رجَالكم لو ثقل حمله يســــدّد=يصبح مكفى من جميع الهمومي
يروح مبسوطٍ مع الصمد الأجرد=من جودكم كنه بعالي الرجومي
الله يجمَعكم على العز والــــود=وعسى تعاونكم يطول ويدومي
هذا تعاونكم به الكل يشهـــــد=يومن بعض الناس منه محرومي
تعاونن يبرى به عيون الارمد=ويفرح صدور الطيبين القرومي
وان جا كلامٍ طايشٍ لا حد يرد=حتى يتعدى مايجي له رسومي
ولاهي طبايعكم كثير المعاند=وبعض الكلام اللي مايقضي اللزومي
الله يبعدكم عن اليوم الاســود=وعسى لكم حظن من الله يقومي
وان كان برَاق الحيا عنكم أبعد=زرتوه باذوادن سواة الغيومي
سودٍ ووضح وحمر والوسم بالخد=وتلقى على الارقاب بعض الوسومي
هليلن مع مطرقة والشــــويهد=من اليســـــار وواضحن للعمومي
راع الولع لن شافهن غصبن يلد=معركشات اوبار هزع الخشومي
جرد الرقاب وبالغوارب تساند=وساع النحور موخرات السنومي
اتشوش لين شاهد الخد ممتد=تسعين كيلو تقطعه كل يومي
باطرافها ربعن لنا تكسب المجد=كلن عن الدرب الرديَ معصومي
عاشوا على التقوى وسنة محمد=وباق الفرايض من صلاتن وصومي
وتسابقوا وادن بسيله مـــــــردد=وايام وليان الضعيفة ردومـــي
صياهد خلا ونبتن يتجــــــــــــدد=وسيل على سيلٍ وعشبن يزومي
راع الغنم مابه تحــــــدَر وسنَد=مافيه غير الابل كبار الجرومي
يازينها رتاع في رقرق الخــــد=إليا ارتعت في خاليات الحزومي
وتجمعوا بعد ارتعت بالمواعد=وكلن يجيب اللي حصل من علومي
ولحدن يقول الا الكلام الموكد=والصدق سلمن من خيار السلومي
كلن يخاف من الغلط ويتركـــــد=من خوف لا تلقى عليه الخرومي
والكبش عٍلق والهشيب يتوقد=وكلن يقول اجلس تراك امخدومي
ولا انسى هل العرقاة وقريب الجد=ربعي مطوٍعة العنيد العزومي
وجميع ربعي طيبهم ما يحـــدد=اولاد وايل متعبين الخصــومي
رجالهم يسطى سطاة المهند=واخلاقه اخلاق الأديب الرحومي
ابنصح الخفرات واقول من جد=اللي تريد المجد الهم تشومي
خل الردي يامغيزل العين يقعد=لا يعجبك شكله وزين الهدومي
قطٍع حباله بالردي لا تجـــــوَد=عليك بالطيب وخل الرخومي
وكل القبايل فيهم الطيب يوجد=الكل وده للمعـــــــالي يرومي
يقولها اللي لرضاكم مجنــــَد=وصلوا على نبيكم في الختومي