مرثية الشاعر صالح الوتيش في والده

السلام عليكم ورحمة الله وبركاته

أعضاء منتدى بني عزيز حبيت ان اشارككم بقصيدة للشاعر صالح بن سعد الوتيش
وهي مرثية في والده الذي فارق الحياة في 15 - 3 - 1431 هـ عن عمر يناهز
قرابة 100 عام نسال الله ان يتغمده بواسع رحمته ويدخله فسيح جناته
واتمنى ان تنال على اعجابكم واستحسانكم

شيٍ بصدري مابغيت تعريفه

ولكن باح وبيَّن الصدر خافيه

من عاش في الدنيا وفارق وليفه

يشكي لغير الله محدٍ مشكويه

واحالي اللي راح مثل السنيفه

من هاجسٍ بالصدر ماودي أبديه

حاولت اكنه لين باين غريفه

يالعين هاتي ذارف الدمع هاتيه

هاتي غثاريبه وهاتي نظيفه

فوق الخدود ومقدم الصدر صبيه

صبيه ماهو عيب دمعه شريفه

على عزيزٍ دايم القلب يطريه

عساه عند الله ذنوبه خفيفه

روضٍ من الجنه عطاهيه واليه

عسى له الجنه منازل مريفه

يالله من شرب النبيين تسقيه

أنت الرجا يالله وأنت الخليفه

يالله من حرة زمَهْرير تذريه

وعسى السحاب اللي تلالا رفيفه

على حصاة القبر تمطر مداليه

يوم إن ولد اللاش نفسه ضعيفه

نفسه على الهزله تطيعه وتهديه

أبوي مايرضى لجاره كسيفه

جاره على طول الليالي يداريه

عن غرة الجارات نفسه عفيفه

ماهو على الجاره كثيره مباديه

درب الردى والبوق نفسه تعيفه

يعف عن درب الردى مايسويه

ماهو بمن يضوي ليا شاف ضِيفَه

مايِّـلحْق اللي مايوده مشاريه

وان كثرت الاشوار رايه عريفه
وأن كثرت الأشوار رايه يفديه