راح مني نصف عمري في غيابك

قصيدة جميلة للشاعر سعد علوش

اعرف انك ما تصدق بس والله فوق والله
والله انه راح مني نصف عمري في غيابك

واعرف اني شلت همي تارك[ن] حبي على الله
كني ابعد من نجوم الليل واقرب من ثيابك

يا عساك وياعساني ويا عسانا ويا عسا الله
يا عسى الدنيا تموت وما يعيش إلا ترابك

يا أحبك وأعشقك وأهواك وإلا يفتح الله
ما تعودت افتخر بإحساسي إلا تحت بابك

آيه أحبك والقضية واضحه والشاهد الله
يطرد المظلوم خصمه وانت خصمي يا هلا بك

يا هلا بك يوم تجرح خافقي ويسامحك الله
يا هلا بك يوم تلحق غميتي وألحق سرابك

جابك الله في حياتي يا حياتي جابك الله
ليش مدري وين مدري كيف مدري بس جابك

كل ما قلت ابتدينا في المحبة قلت يالله
ما دريت ان النهاية بين بعدك واقترابك

احسبني كل شي في عيونك يعلم الله
واثر عينك مستعفه ما تحب إلا حجابك

إنظلمت ولا شكيت ولا تركت الامر لله
كان همي انتظر باقي عذابك في عذابك

الله الله انتبه واحذر وفكر والله الله
مثل ما احسب حسابي في هواك احسب حسابك

ما طلبت المستحيل ولا رجيتك شي لله
ما طلبتك ارتفع من حجرتي واسكن سحابك

يصرخ القلب المعذب يالمعذب وكل الله
شاب حبك في عيوني وانت توك في شبابك

رحت شي وجيت شي مختلف يا حسبك الله
تصدق اني ما بغيت اجلس مع حظرت جنابك

غيرك ذاك الزمان ويا زماني منك لله
ليش ما غيرت فيني شي يوم إني أهابك

ليش ما علمتهم عن قصتي وتوحد الله
يعرفون انك سؤال ويعرفون اني جوابك

ويعرفون اني حلفت ولا عرف أغلى من الله
والله انه راح مني نصف عمري في غيابك