ديوان الشاعر رويضي وسمي العزيزي

السلام عليكم ورحمة الله وبركاته

اخواني مرتادي منتدى بني عزيز
انقل لكم هذه المساجلة الشعرية الرائعة بين الشاعرين/ فهد عايض العزيزي و رويضي وسمي العزيزي

البداية للشاعر / فهد

مسندي يامسندي يامزبنة الدخيل=احفظ وصاتي وامانه تعن ودها
هاك ريمه ماتصنف بلوحات ومديل=بنت حرآ مقتنيها واصيلآ جدها
ماشكت في دربها من عضا ولامسيل=ماوقفت قدام ورشات جيب وردها
محتسيها للوازم مع الدرب الطويل=لا حداني ضيق الا يام قمت احدها
ذيب ماتحتاج لوصايتن والا دليل=الجمال ظهورها للحمول وقدها
جهز شدادك وعب المزاهب والصميل=ومع صلاة الفجر فك العقال وقدها
خلها بالزرفله كن صايبها جفيل=تطوي بساط الوسيعه وتاطا خدها
والظهر ميرادها فوق خضره والمقيل=تمسي ام الليل قبل الظلام يلدها
سرها مع ضوء قمرا مثل شمس الاصيل=والضحى تمشي مع الخبت مازين فدها
ثم وردها بريمان مدهال العميل=عند ابن وسمي على الباب نزل شدها
من رجال الجود والطيب والوزن الثقيل=محتمي ميقافها واللوازم سدها
مع رجال العرف والشعر كالسيف الصقيل=يسبح بحور الشعر جزرها مع مدها
ثم لاساقلك فنجالها بنآ وهيل=بالوصايه لا توخر عليه وبدها
قل لبو نايف ترى مطلبي وقتآ قليل=حسبت اليومين ماتقول ينقص عدها
مرحبا واهلين منزلك فالقلب الضليل=طالبك ياصاحبي دعوتي ماتصدها
في ديار مربعه زادها جوآ عليل=مع نشاما طول الايام ماأظهر سدها
طيعني وابشر برد الزياره والجميل=اخذ علمي خل مزح العلوم وجدها

والرد من الشاعر/ رويضي

مرحبا وأهلين ترحيب هيل بدون كيل=حي من يمي طويل المسافة كدها
فوق حمراً يوم تروج مع البيدا تهيل=رجلها تاطا مع البيد ماطا يدها
يوم تمشي كنها فالمناشي تستخيل=مزنةٍ لفح الصبا يوم هبهب صدها
يوم أوصف زولها خصرها ضامر نحيل=وصفها وصف القديمي ليا أدبح حدها
تنّحش من كل روغن وحس وتستزيل=يوم تحرف عينها للخمر وتلدها
يوم جتني مقبلة زولها ماله مثيل=بينت عرقاتها ومغزلن في عضدها
قلت حيا الله ركايب هل المد الجزيل =ربعتن تلطم خشوم العدا وتضدها
مرحبا يالضيف وأقلط على بنن وحِيل=في مداهيلن لمثلك يعجعج ندها
أنت لك واجبك وألا الذلول ألها كفيل=قوم يانواف عش الذلول وغدها
ثم ثالث يوم قربلي الشاصي وشيل=الذلول ورسلت القرم تاخذ ردها
فوق جيبن لاأنحدر شوفته تبري الغليل=كنه أغلى صقور سلطان يوم يهدها
من مديلاتن جديدة موردها الوكيل=هو خلاصة فكرة اللي تميز بالدها
أسهجه لين يتوسط من الحرة وميل=والجبال النايفة فالوطا تعدها
إلف منهو عن دروب النشاما مايعيل=المراجل هي توده وهو يودها
من رجالن طيبها ورث من جيلن لجيل=بالشهامة والكرامة رهين عدها
قله أن العذر في مثل هاذي مستحيل=يافهد للي يمد اليمين أمدها
وعد ماتبدي نجوم السماء في كل ليل=لك تحيه وافين صاعها مع مدها