زائرة الليل

يا محمدغبت عنها اسبوع مـن بـاب التغلـي///// ودي اعرف واكتشف عن حبها لي واختبرهـا

يا محمد سبعـة ايـامٍ عجـاف ابـدون خلـي//// شفت فيها الويل واعيوني ملا زمهـا سهرهـا

سبعة ايام الكدر مـا راح عنـي مثـل ضلـي///// شلت كل اهموم خلق الله وعايش فـي كدرهـا

ادري ان الصبر مفتاح الفـرج وبـه امتحلـي//// مير هي عنها حرم باجماع كل اللـي نظرهـا

رحت ادور للتسلـي ويـن ابلقـاه التسلـي///// اخرج امن البيت والقى نفسي ابرم في قطرهـا

طفت شارع بيتهم ما غير مقبـل بـه مولـي///// الشوارع مظلمـه والقـى بشارعهـم سفرهـا

ودي اسمع ذكرها لـو مـن عـذولاً بالتبلـي//// مو مهـم اللـي يقولـه والمهـم انـه ذكرهـا

شفت اخوها صدفةٍ واقفي يرحب بعـض كلـي//// بعضي الثاني همس بذني تنشـد عـن خبرهـا

قمت اهلى به وانـا خايـف لسانـي لا يزلـي//// شفت شعره في ثيابه 0 قلت هاذي من نثرها

وانكسف مني 0تبسم لـي 0وناظرنـي بغلـي//// قال توي كنت بالصالـون والنـاس اشكثرهـا

قلت فعلاً شفت هالصالـون بالنـاس امتملـي///// والله انه يكذب الكـذاب وانـه مـن شعرهـا

اعرفه من ملمسه من ريحته مـن لونـه اللـي//// مثل لون العود حمـره مـن سـوادٍ يشتقرهـا

شلتها بالدس في جيبي وانا مـا اشفيـت غلـي//// ودي استمتع بملمسهـا وريحـاً مـن زهرهـا

قمـت ودعتـه وليلتهـا عذابـي مستغـلـي//// طول ليلي حاضن الشعره واناجي في صورها

سبعة ايامٍ وانـا فـي داخلـي ربـطٍ وحلـي//// اعزم الفيها وأهون خايـف آسبـب ضررهـا

بعد سابـع يـوم مـن هـمٍ بقلبـي مستحلـي//// اتصل بي واحدٍ ساكت ونفسي فـي ضجرهـا

قلت الو وشفيك ساكت رد يـا جعلـك تغلـي//// كنى اسمع صوت ليمونـه بفمـه يعتصرهـا

واهمست وش سهّرك للحين في وقـت امتتلـي//// قلت طيفك نعلبو جدك وضحكت مـن فخرهـا

واهمست هلحين اجي واخبرك عن دقي وجلـي//// قلت معقوله وقالت نار شوقي ما اقتدرهـا

جت وهـي متخفيـه صبـحٍ بليـلٍ مستظلـي///// كنها تحسب خطاها ميـر يفضحهـا عطرهـا

نفحهـا مسـكٍ ونثـر انفاسهـا وردٍ وفـلـي///// المكان اللي تعـدي منـه يبقـى فيـه اثرهـا

جـت تبختـر ردف يتمايـل وردفٍ يستقلـي//// كنها ترقص على تكة خطاهـا مـن بطرهـا

عنجهية صدرهـا تفتـك بخصـرٍ مضمحلـي//// لا تثنت تنقسم نصيـن مـن خصـرٍ بترهـا

لبسها الجـذاب حـدد جسمهـا سنتـي وملـي//// زادها فتنة حلا وإنمـا فضحهـا مـا سترهـا

قمت ماني في شعـوري كـل مافينـي يهلـي//// كنها المتفضله بانقـاذ روحـي مـن بحرهـا

طوقت عنقي بسيـفٍ مـن سواعدهـا يسلـي///// واغرست رمحين في صدري ولجّمني ثغرهـا

ترتجف فـي قلبهـا خـوفٍ تولاهـا تولـي///// تنفض ايديها ويتقطـع نسمهـا مـن حذرهـا

كلما هز الهوى الشبـاك واحـدث فيـه خلـي//// بسملت واتفزّزت تحضن يديها فـي صدرهـا

قالت انت اشفيك متغيّـب جفـا وإلا تخلـي//// قلت لا هـاذي ولا هـاذي ولا حتـى قدرهـا

مير انا كثـرت جياتـي وخفـت انـك تملـي//// سلهمت بعيونها عضـت عنبهـا مـن قهرهـا

واخبطت بكفوفهـا صـدري ودمعتهـا تهلـي//// قالت اقسم لك بــرب البيـت شوفتـك انتظرهـا

قلت اجل ويش اخرك وانتي لعنوانـي تدلـي///// لا يكون انه جفا؟؟قالت حشا وارخـت نظرهـا

انت تدري عن ظروفي حط نفسك فـي محلـي//// بنت مثلي خارجه من بيت اهلها وش عذرهـا

لو قدرت اليوم اجي والقى عذر مقنـع وحلـي//// مامعي في كـل يـومٍ حجـةٍ لهلـى ابتكرهـا

جادلٍ مـن نسـل شيـخٍ لا يهـاب ولا يذلـي//// فاتنه واجمل بنات الكـون ماتسـوى ظفرهـا

العفـاف ابوجههـا مستقبـل القبلـه يصلـي///// والكسل برموشها جالس يحـذر مـن خطرهـا

وجه مثـل الصبـح يتنفـس بنـورٍ مستهلـي//// والرموش الليل عسعس ليلـةٍ محلـى سمرهـا

طرفها في حـد ذات الطـرف عالـم مستقلـي//// به نهار وليل ، به بحر وسما داخـل حورهـا

جيدها الفتـان نـوراً مـن زجـاجٍ مستجلـي//// لو لمسه ابهامها بصمتـه تبقـى فـي بشرهـا

مـن شفافيـة جسدهـا والنعومـه والتجـلـي//// أي شياً تشربه ينشـاف نـازل مـن نحرهـا

ظامها شـلال دهـن العـود بالجيـد امتدلـي///// الوحيد اللـي جبرهـا تنفعـل محـدٍ جبرهـا

صـار يتمـرد يعذبهـا تلمـه ثــم فـلـي///// ثم ترجع تلفحـه ويعـود مـا يسمـع لمرهـا

ابتسامتها وميـض البـرق فـي نـوٍ مطلـي//// والشفايف كنها قـوس القـزح لونـه غمرهـا

ضحكها معزوفـةٍ يطـرب لهـا قلـبٍ يولـي//// وامنياتي ماجنه ترقص علـى نغمـة وترهـا

إن حكت نفثاً من السحـر الحـلال ولا يحلـي///// تستميل اقلوب من يسمع كـلامٍ مـن دررهـا

لا دنت منـي تبعثرنـي علـى غنـجٍ ودلـي///// وانصهر بنفاسها وإحساسي المرهف صهرهـا

عينها مستسلمـه والرمـش طايـح مستذلـي//// طاح طيحة فارسٍ رمحـه بعدوانـه كسرهـا

والله إن اللي ببالك يا محمد مـا حصـل لـي//// ذبت واروتني عفاف وكـل مافينـي شكرهـا

ما منعني غير طيب اصلي ولي قـدر امتعلـي//// واللي ادهى من كذا خفت اني انزل من نظرهـا

قمت اودعها وانـا شوقـي يزيـد ولا يقلـي///// لحظةٍ هدت فـرح ساعـه وبالكـود افتكرهـا

اوجبت غسلاً علـى عينـي بدمـعٍ مسفهلـي///// قبل تبلغ حلمهـا والرشـد واتمتـع بصرهـا

بعدمـا عاهدتـهـا بالله حـرمـت التغـلـي//// توبه اتغلـى ونـار افراقهـا مقـوى سقرهـا
للشاعر:مستور المالكي