ربعتي ياتاج راسي كل ليله &&& عزوتي يالاد وايل في زماني

ياسلام الله سلام" مرتكيله = للرجال اللي لهم قدر" وشاني
من يعد الحق مادور بديله = وأخذو الحق المبدى في بياني
ربعتي ياتاج راسي كل ليله = عزوتي يالاد وايل في زماني
في ضلال المندهه راع الأصيله = شيخنا اللي مألتفت للسيفهاني
يالوصايف..يالمدايح.. به قليله = مايوصف حبرنا عذب المجاني
طودنا اللي كل ماكبرت نجيله = فكره اوسع من بحورك يالمواني
عبدليا" راس ماله مع حصيله = سجته مع فزعته ريف العواني
من مطير وكل واحد له فصيله = كاسبين الأوله حمر العياني
أن عطينا ماعطينا الا الجزيله = وأن منعنا يشهد القاصي وداني
مأصرفتنا عن منانا مستحيله = لوًها بالشام وسهيل اليماني
ولوتشب النار في راس الفتيله = ماعرفنا الخوف والطرقه ثواني
ماعرفنا الخوف دام العمر ليله = والمنايا ناويه والعمر فاني
مارتضينا في زمنا بالهزيله = ترجموها واعرفوا يأهل المعاني
باب بغداد المسمى به دليله = ودلة الرسلان وريح الزعفراني
والبنادق والسيوف اللي صقيله = هايمه بـ(مطـير) ماترضى بثاني
من بلانا شال حتفه في شليله = قلتها عن فعل وترجمها لساني
من نوانا بالردى ياعزتي له = والدلايل واضحه.. والضد جاني
ياهل المحراب يأصحاب الفضيله = يافلاسفة الزمان اللي بلاني
يادكاترة لهم خبره طويله = في تشاخيص" في علم المودماني
وش دوى من حب ربعه والقبيله = وأستكن الحب في وسط المحاني
حب صادق ماخلق شى" مثيله = أن وصفته ماوصفته ياكياني
حبنا ياذا الدهر محد" يزيله = ماهو بحب الكلام الهيلماني
كاسبين الطيب جله والجميله = وكاعمين الضد ولانرضى الهواني
قاله اللي كل ماشاف الطويله = خصها بجزل المدايح والتهاني
فيك من ربعي وفيك من القبيله = ثابتين.. وما يغيُرنا الزماني
قلتها والكل اذا جمع حصيله = يعرفون الفرق جزلين المعاني

تقبلو تحياتي اخوكم محمد العزيزي