الشاعر سعود جمعان المطيري

الشاعر سعود جمعان المطيري من الشعراء المبدعين

وقد حصل له موقف مضحك قبل فترة قصيرة
يقول سعود إنه وهو بالمسجد بعد ماسلم الإمام قام شحاذ يشتكي أموره على المصلين لعلهم يساعدونه
وهو يتشكى كان مركز بعيونه على سعودجمعان
قال له سعود هالأبيات:

يا ابن الحلال اللي تشكى علينا
حنّا لنا بوضع على الله مشاكيه
كـانـك تـحـرى للعـطـا مـــن يـديـنـا
عزالله إنـك عندنـا مـا أنـت لاقيـه
ماهو ردى بس أرثع الوقت فينـا
ماعـنـدنـا مانـاكـلـه دون نعـطـيـه



ومرة كان سعود جالس بمجلس
وكان فيه شيخ يحدث ويقول من ضمن الحديث إننا بأعظم نعمة بتاريخ البشرية
قال له سعود : ياشيخ أنا عندي مداخلة
قال له الشيخ تفضل

قال سعود هالأبيات:
ياشيخ ......الضحى فوق ثوبك
وانته تروغ عن نحـور الصواريـخ
النعمـة اللـي بـس ياشـيـخ دوبــك
ماتحسـب أكـبـر نعـمـة بالتـواريـخ
وإن كـان هـذا بالتـحـدث أسلـوبـك
فعز الله إنك لقطة غليس ياشيخ


وزماااااااااااان كان سعود طالع من المسجد ولقى وحدة رافعة يدها وتشحذ عند الباب
قال لها سعود:

يابنت ياللي بالمساجـد تطوفيـن
كـفـي يديـنـك قـبـل نـأخــذ ريـالــك
حــنـــا تــرانـــا كـلــنــا مسـتـحـقـيـن
ماهو أنتي اللي مستحقة لحالك
لو لا الحيا شفتي وزانك ثلاثين
أحــد يمـيـن مـنـك وأحــدٍ شـمـالـك
مـرفـعـيــن إيـديـنــنــا ومـتـقـاعـيــن
الموجـب إن أحوالنـا مثـل حـالـك



ومرة بعد جا سعود وفتح له حساب وراح بعد كم يوم يبي يشوف كم في رصيده لأنه مرررررررة مطفر وش طلع له على شاشة الصراف ؟ مع إنه متأكد من رقمه السري

أنــــا لـقــيــت الـبــنــك مــثـــل اخـويــايــه
مايقـضـي الحـاجـة إلــى جــاه مـحـتـاج
أمـــس الـضـحـى مـريــت كــــل زمــلايــه
وكـــلٍ عـطــى لـــه بالـمـعـاذيـر مـنـهــاج
وضـنـيـت بـاقــي فـــي رصـيــدي بـقـايـه
وحركـت نــاصٍ حــارس البـنـك هـجـاج
ودقــيــت رقــمــي صــــح مــابــه روايـــــه
طلع على الشاشة : لا داعي للإزعاج



وسعود ما عمره دخل البنك لأنه يقول


يـا أهــل الوظـايـف قـولـوا الحـمـدلله
علـى معوشتكـم ولـو رزقهـا ضـنـك
أنــا وجنـسـي رزقـنــا لـــو وصـفـنـاه
حوذ الحنك مافيه زودٍ عـن الحنـك
مـاطـاح قــرشٍ فــي يديـنـا قـرشـنـاه
ودايـم طفـارى الله يجـيـرك ويامـنـك
الـبــنــك لـــــولا لـوحــتــه مـاعـرفـنــاه
من قل ماندخل على موظف البنك
مـاغــيــر نــقـــرا لـوحــتــه ونــتــعــداه
وإن قيل هذا البنك قلنا اتركه عنك
لاوا هــنــيـــك يـالــغــنــاوي هــنـــيـــاه
تــرقـــد وحــنـــا بــالــدراهــم نــمــونــك
نفـرح إلـى مـن المـعـاش استلمـنـاه
ويــهـــج مـــنـــا قــرشــنــا ويـتـزبــنــك
والله يالـوتـصـرف ربـــع مـاصـرفـنـاه
ليصيبك السكر مع الضغط والتنـك
ولـولا جهدنـا وجهدنـا اللـي بذلـنـاه
ماتـنـفـخ ذروبـــك وتـمــلأ مـخـازنــك
مـيـر المـقـدر مـالـنـا غـيــر نـرضــاه
مرزقـك مـنـا وسقـمـة أرقابـنـا مـنـك



طبعا والشاعر سعود جمعان المطيري
هو صاحب القصيدة اللي يرددون الناس بيتها الأول دايم
والقصيدة هي
لاصـــار جـــدك مـاتــرك لـــك مـلايـيــن
مـاهــوب لازم تـشـتــري لــــه ضـحـيــه
قـل لـه ياجـدي جعلـك مـن المناجيـن
والله مــاتــســـوى قــيـــمـــة الــبــربــريــه
عقـبـتـنـي لـلـديــن ومــصـــارع الـبــيــن
ومـن زيـن طبعـك كاتـبٍ لـك وصـيـه؟
لو أنت ما أخذ لك من الخد حوشين
يـــوم الأراض بـــلاش وســـط الـعـلـيـه
إن كـان تلقـانـي مــن أهــل الدكاكـيـن
مـطـنــطــخٍ هـالـحــيــن مـــيـــة بــمــيـــه
لــكـــن يـــاجـــدي ضـحـيــتــك بــعــديــن
إن ســهـــل الـمــولــى ثـمـنـهــا عـلــيــه
حنـا بوقـتٍ شيـن وأشيـن مـن الشيـن
فـيــه الـخــوي مــاعــاد يــاثــق خــويــه