جرحن قويته وجرح أبطيت في طبه

احـدن إذا غاب جرح الحب بغيابه
واحدن جروحه تجيك معانقه حبه

منهو يقول الجروح جروح تتشابه
جرحن قويته وجرح أبطيت في طبه

يا من ذبحني وأموت بريحة ترابه
يا ما عطيته وهو ما خاف من ربه

شرّعت بيبان قلبي ولا فتح بابه
يا كثر ما هو مزعلني بلا سبه

إيه أعشقه وأبغضه وأموت وأحيا به
وأشتاق له وأقطعه وأغليه وأسبه

والله ما به شـي ما أهــابـه
لا صرت في بحر حبه والمدا غبه

يا سيدي والجفا لا كشّر بنابه
شمع المواصل دخيل محبتك شبه

لا صرت أقرب قريب لك فلا ولابه
صب الغلا في خفوق معذبك صبه

يا من جروحك بقلبي كنها ذيابه
جرحن قويته وجرح أبطيت في طبه