محاورة نسائية بين الشاعرتين (نوض سدير / ودلال الشمال

نوض سدير

من ديار الوفى والطيب تحديدا ( بلدنا سدير
....................لفينا والسلام يعـم مـن يكتـب ومـن يقـرا

نبي بيت الشعر وافي قوي النظـم والتأثيـر
....................ولانبغى بيوت ٍ مـن معانـي شعرهـا فقـرا


الشاعرة دلال الشمال

ألا يامرحبا بك عد مالجلج خفوقي عِصير
.................... وعد الرمل وشعاب الجزيرة وشبّة السمرا

لفيتك والشعر مني كما لولو ونظمه غير
.................. على صدر الشمالية وسام الطيب والفخرا


نوض سدير

ابي منك اصدق علومك ونثرك والشعر …لاغير
...................علامه صاير ٍ شعر البنـات اليـوم فـي حـدرا

يقولـون اغلـب الشعـار حنـا مالنـا تعبيـر
...................بلشنـا يالشماليـه بشاعـر ضـايـع ويــزرا


دلال الشمال

شعور الشعر من قلب الذي يكتب على التسطير
.................... أبد مافيه من يكتب وينسى العسر واليسرا

وإذا به ناقصات العقل والمعنى مـع التقديـر
.................... فلا يحكم على شعر البنات اليوم من عذرا


نوض سدير

جمعهم كلهم جمله وصرح قال مامن خير
.................هو الوافي هو الناصح هو العالم هو البدرا

الا يالغاليه ماتنفـع علـوم ٍ بلاتبريـر
.................علوم ٍ مالها برهان ابـد ماتنـزل القـدرا


دلال الشمال

علومه ناقصه يابنت واصحي حملة التخدير
.................... وقناعة قولك بفعله تخلي القلب بالجمرا

إذا هو عالم بالقاف فأنا قافي هُنـا نحريـر
.................. بنيّة من ربى حايل تَحلى اليوم بالسترا


نوض سدير

عسى الله يحفظك ياشاعرتنا من عنى التكدير
..................ولايغشى سماكم يابعـد كـل البشـر كـدرا

(حياتي دعوة) اتحييك يامن عانق التطويـر
..................تزيد النور نورٍ.. وانتي بنور الفخـر احـرا


دلال الشمال

تعزوا القاف يوم إنه لفا لك والشعر تيسير
................... من الباري هو اللي يعلم النجوى مع الجهرا

ولكن قلبي اتعذب ونبض القلب كالجنزير
....................ترامى صوته لسمعي وسمع اللي عشق قمرا


نوض سدير

قبل هذا تعزوى واحد قبلك وثار القيـر
................وضيع وجهته بعيونه الفيضه غدت غدرا

ترى لاضاع نبضك يالغلا ماينفع التشفير
................ولكن بدلي حبك بركعه وقـت هالفجـرا


دلال الشمال

أنا حبي .. بقلبي مستكن وسقت له تعبيـر
................... وحروف الشعر من وصفه غدت ماتقدر الصبرا

حبيبي غالي ٍ بالقلب وعن حبّه أبد ما أحير
.................. إله الكون سبحانه .. فكيـف أسـلاه بالمسـرا


نوض سدير

انا معكم وايدكم غلا مايوصفـه تصويـر
.................اعبد ه واسجد لوجه طوال الليل مع بكـرا

عسى الله يفرج الكربه ولايكتب لنا تعسير
................رحيم وهو بضعف الناس يااغلى بشر ادرا


دلال الشمال

عسى الله يقبل الدعوات والسجدات منا تصير
................. بميزان العدل أثقل من جبال الحصى قدرا

وعسى الله يغفر السيّه ويبرّ د خاطري بالخير
................... ويشفي قلوب ناس ٍ من حسدها اليوم تبرا


نوض سدير

قوافي شفتها بعيني تكرر وضعها تكرير
...................ترها تنحسب ضدك بصفحة شعركم عثرا

قوافينا بيدنا فنهـا مايحتمـل تحويـر
...................حروفي يانعه ماتشيب لو نجلس معك شهرا


دلال الشمال

حروفي دايم بصفي أبد ما تنحدر تحدير
.................. بأعالي الشم مسكانه كما مسكان ذا الصقـرا

واذا به ناس ماتقبل فهذا طبعهم تشهير
.................. وأنا ما أرضى على حرفي يذم بداخل الحّرا


نوض سدير

الا يالغاليه بشهد شهادة حق طار الطير
................ولكن هودي لاتصادمين الموج والبحـرا

الا يامن يطلع واحد ٍ ولى بقاع البيـر
................الا ياظنتي لو تنقـذون العـود مايبـرا


دلال الشمال

ألا يا نوض شومي لا تردين العرب للكير
................. وثوبك من حرير ونارها ما تترك الشبرا

يطير الطير ياللي ما هقيت انه عليك يطير
................. ولكن لا تقرّب للحدود وطالبـك حـذرا


نوض سدير

انا نوض السديريه وادمر بيتكـم تدميـر
.................قوافيقكم تهدم سورها من سورهـا قفـرا

حذفتك حذفة الميت ووقعتي ورى خرخير
................بعد ماعشتي بساحة كياني عيشـة الفقـرا


دلال الشمال

انا بيتي من أحجار ٍ كريمه ماتجي تصدير
............. .... ولا طاله ردي القاف والمجنون والهـذرا

شماليه قوية باس .. من رجال ٍ تفل العير
................ ولا أحد ٍ يقرب دياري ..ولا أحد ٍ صوبنا يجرا


نوض سدير

انا ازرع لك ثمر صافي تردي تزرعي جرجير
.................اذا هي خانتك بعـض المعانـي هلـي العبـرا

امررهـا وامررهـا عليكـم يالغـلا تمريـر
.................واشوف البعض من بعض البيوت عيونها صفرا


دلال الشمال

على ساحة اهل الساحه يبي لك يا غلا تمتير
................ وانا ادري بانك اليومه على هذا ولا تجـرا

قصور الشعر تفرق يا غلا عن هفوة التقصير
.............. ولكن يا مصّل الفرض جمعك لا يجي قصرا


نوض سدير

قليبك ياحياتي واش بلاه مجمر ٍ تجميـر
..........تريث يابعد كل البشـر لاتاكـل الجمـرا

ترى لحم الضبى مايشبه بلونه لحم خنزير
.................تعوذ من شياطينك قبـل لاياقـف القطـرا


دلال الشمال

شياطيني معي ماتسير لين إن القوافي تسير
................ يشوش اللي توحاني وكنه شارب ٍ خمـرا

و إذا حرفك تعب يابنت جيتك والمعاني تنير
................. كما نور الصباح اللي شعق من فوقنا قصرا


نوض سدير

تمهل يالغلا ثم انتبه واحذر تعكـس السيـر
................انا اشيل الحمول ان كان شفت اجسامكم فتـرا

ابااعطيك الشعر جرعات لين يصيبك التخدير
................تضيق اصدوركم لكن حشا ماايضيق لي صدرا


دلال الشمال

حروف القاف شابت في كفوفك والشعر تخبير
................ وإذا انتي جاهله باسمي فأنا جيت بوصف شقرا

كثير اللي يسموني قوية بـاس مابـي ضيـر
................. وصدري من صدور أهل الشمال وسلمنا الصبرا


نوض سدير

ترى من سار بالظلمى ولادقق صدم ببعير
...............ومن يحفر لبعض الناس هام وطاح بالحفـرا

انا ماني من اللي بالخفى يمشي بدهن السير
..............الا ياطير ياطيـر السعـد لاتحـل بالوكـرا



اعجبتني وحبيت انقلها لكم

اخي محمد الذيب بيض الله وجهك على النقل الرايع

محاوره حامية الوطيس وقويه
هل يوجد نساء بهذى الابداع الشعري
وياليت يحولن حفلات النساء الى محاورات
شعريه وصفوف نسائيه اجمل من المطربات والدقاقات

كل الشكر اخي ابن الذيب

المشاركة الأصلية كتبت بواسطة برق

اخي محمد الذيب بيض الله وجهك على النقل الرايع

ووجهك ابيض

كل الشكر

المشاركة الأصلية كتبت بواسطة الليث

محاوره حامية الوطيس وقويه
هل يوجد نساء بهذى الابداع الشعري
وياليت يحولن حفلات النساء الى محاورات
شعريه وصفوف نسائيه اجمل من المطربات والدقاقات

كل الشكر اخي ابن الذيب

تصدق فيه شاعرات لو دخلن شاعر المليون ليحصلن على البيرق

اما بالنسبة للزواجات فاالدعوى كلها تقليد لواحد الزواجات يبدى

بمحاورة نسائية بدل الدقاقات فصدقني اللي بعده يسويها

كل الشكر على التعليق الرائع