أب يدعوا على اولاده العاقين(هذا الشاعر: جحيش بن مهاوش رحمه الله) فستجاب الله له....

أب يدعوا على اولاده العاقين(هذا الشاعر: جحيش بن مهاوش رحمه الله) فستجاب الله له....


السلام عليكم ورحمة الله وبركاته


هذه القصيدة للشاعر جحيش بن مهاوش قال قصيدة في عيالة حيث انه دعا عليهم ان الله ما يرزقهم الاولاد واستجاب الله دعاه حيث قيل انهم تزوجوا مرة وثنتين وثلاث ومارزقهم الله بالاولاد وانقطعت من ذلك الوقت ديارهم واخبارهم بدعوة ابوهم عليهم.
بدت القصة يوم ماتت امهم وتوهم صغار، وقام والدهم جحيش بتربيتهم ورعايتهم الين ما كبروا وكان لهم مثل الام والاب يسهر الليالي على تربيتهم وراحتهم وفي النهار يسعى عشان يجلب لهم الزاد وكان في ذلك الوقت صعب الحصول على الطعام الا بشق الانفس وكان يترك عياله عند خوالهم او عند الجيران وعند الاكل كان يحرم نفسه نصيبه ان كان الاكل شوي ويكتفي بشربت ماءوينام وهو جايع ومن حرصه على عياله انه ما تزوج بعد ما ماتت امهم لانه خايف انها تكون قاسية عليهم وتكفل بالحنان والتربية لهم.
ومرت السنين والسنين وكبروا عياله وتزوجوا واحد وراء الثاني وبعد كل اللي سواه لهم ما لقي من عياله الا الجحود والنقص في معاملتهم له، ولا عاد احد منهم يبي يخدمه او يقضي لزومه بعد ما حل عليه الشيب وكل هذا عشان زوجاتهم اللي اصبحن يتوذن من خدمته حتى ان كل واحد منهم صار يطرده من بيته ويصك الباب من دونه.
ويوم شاف هذي الطريقة منهم قال قصيدته المشهورة وبعدها راح يكن باحد الخرابات ولا عاد يقوا على القومة والمشي وضعف بصره وسمعه الين الله توفاه
والقصيدة تقول:

قال الذي يقراء بليا مكاتيب
ياللي تقرّون العمى من عماكم

ياعيال ياللي تشرفّون المراقيب
تريضولي وقصروا من خطاكم

خذو كلام جحيش مابه تكاذيب
مثل السند مضمون للي وراكم

ياعيال وان صرتوا ضيوف معازيب
ترى الكلام الزين ملحه قراكم

ترى البلاسه من كبار العذاريب
ترى البلاسه ما تطول لحاكم

يصير بعيون الرفاقه تقل شيب
ليا منه اقبل قيل هذا بلاكم

المذهب المذهب ترا المذهب الطيب
ترى ردى المذهب يبوّر نساكم

ياعيال ما سرحتكم للمعازيب
ياعيال ما عمر المعزب ولاكم

ياعيال ماضربتكم بالمشاعيب
ولا سمعوا الجيران لجة بكاكم

ياما تمسعرت الخلايق تقل ذيب
من خوفتي ينقص عليكم عشاكم

أحفيت رجليني بحامي اللواهيب
وخليت لحم الريم يخالط غداكم

واليوم شوفوا لحيتي كلها شيب
و شوفو محل اتخوضعي في ذراكم

قمت اتوكا فوق عوج المصاليب
قصرت إخطاي يوم طالت إخطاكم

ياعيال ياعيال لي عليكم مطاليب
عطوني القرضة جزاء ما وتاكم

خوالكم ياعيال من ماكر الطيب
ياعيال مدري هالردى منين جاكم

قصيتكم وسندت وادي سلاحيب
لقيت بالسبخاء مدافيق ماكم

ياعيال بعتوني بصفر العراقيب
ماهي حقيقة سود الله أقراكم

أطلب عسى نساكم لاتحمل ولا تجيب
وتغيب شمس الصبح ويغتم سماكم

ولابد ماهو عاويٍ دوني الذيب
بالقبر افارق طيبكم مع رداكم

ابو محمد

اشكرك على ما نقلت

فعلاً قصيده مؤثره

اللهم اجلعنا من البارين بوالدينا

تسلم يمينك ياابو محمد


والله يرزقنا البر بالوالدين وننال رضاهم

هذي قصة الشيخ القاضي ابن مهاوش من باديه الشام ومعروف القاضي ابن مهاوش وقصته مع عياله العاقين الله لايبلانا
ويوم جوه المقضين يبون يقضون عنده لقوه وحيد ونشدوه وين ربعك وقالهم قصته وقصت عياله ووصاهم يقولون القصيده وفيها دعا على عياله بقطع انسالهم
وقصه مشهورة ومتداوله بين العرب للعبره والعضه
كفيت وفيت يابو محمد
وصح لسان القاضي ابن مهاوش

الله يعطيك العافيه يا بومحمد

سلم بنانك اخوي ابو محمد على ما اوردته لنا بهذه القصة المشهورة التي خلدها الله بالتاريخ ليتعض منها الكثير

ولاشك انها من اشهر القصص التي خلدها التاريخ وان لحقها كثير من الاختلاف حول سببها وان احد أبنائه أراد رمية في بئر وهدده ان لم يكف لسانة عن ابنائه الأربعه بالقصيد انه يرمية بهذه البئر وقيل أنهم تخلوا عن خدمته وقيل أنهم رحلوا عنه وقيل الكثير

ولكن الكلام الذي لا خلاف عليه انها لشاعر الكبير المرحوم جحيش بن مهاوش الهشال السرحاني رحمه الله وأسكنه فسيح جناته من قبيلة السرحين الجوف وكان من الشعراء المشهورين القداما والذين لهم باع طويل في الشعر وقد منحه الله الفطنة وسرعة البديهة وكان يقال له : ( أعمى العيون مفتح القلب ) بسبب إستطاعته الخروج من المواقف الصعبة والحرجة وحسن التصرف

ومن اشهر قصائده ما ذكرتها لنا اخوي محمد





تقبل مروري المتواضع وإضافتي البسيطة
خالص الشكر لك

واصل عزيزي

ابو محمد

مشكور على هذا النقل الرائع واللهم ارزقنا الذريه الصالحه