مدونتي الشعرية

السلام عليكم ورحمة الله وبركاته
أخواني وأخواتي رواد هذا الصرح الشامخ
لقد قررت أن أضع هنا مدونتي الشعرية وهي بوح شعري ومتنفس لي
أتمنى تحوز على رضاكم واستحسانكم
كل الحب كل التقدير لكل من سيمر هنا


هنا سأبوح بكل مايخلد بخاطري من أبيات شعرية تتابعا


هنا سيكون شعري ناطقا عن لساني


هنا سأطلق حرية أشعاري




مدخل:


لوكنت أبي الشهرة تعليت مرقاب.......ماهو غرورٍ لكن القول قولي
ماني من اللي يكتب الشعر لأسباب....حتى أتفاخر وأعجب الناس حولي
أنا قصيدي لاكتبته معي ذاب بيني وبين القاف حبٍ طفولي



تركي العزيزي

يامدورن بعض المعان الجزيلات=هاذي بيوتن صغتها من تجاريب
شاعر وكاسب له من الوقت خبرات=أسمع كلام مجرب الوقت تجريب
أبيات لكن غير عن كل الأبيات=أبيات شاعر رتب القاف ترتيب
الأول افطن لاتفوت الصلوات=ذكرك لخلاقك وخوفه مكاسيب
والثاني أحذر لاتنوش الكبيرات=أسمع لشيبانك وآوامرهم تجيب
والثالث أحذر من دروب المتاهات=وجنب دروبن تجلب العار والعيب
والرابع أكسب مدح كل الجميلات=ودور على الطلات والذكر بالطيب
والخامس أدمح زلتن من رفاقات=وخل الكلام ليا لفى منك تهذيب
والسادس أكرم ضيفك بكل الأوقات=وأطلق حجاجك لانصتك المواجيب
والسابع أحفظ خوة الشهم بالذات=اللي ليا ضاقت يخدم المناديب
والثامن أحذر لاتجيب الضعيفات=وأبعد عن هروج القفا والأكاذيب
والتاسع أبعد عن ضعيف المقامات=قصير باع ولايسد المطاليب
والعاشر أستر من كشف لك بعورات=أستر عيوبه يسترك عالم الغيب
عشرة بيوتن صغتها بأختصارات=ياعنك لاطبقتها فزت يالذيب
وصلوا على محمد ختام الرسالات=أعداد ماهبت رياح وهباهيب

ياللي سألت وقلت قلي من أغليت=مغلي أثنينه وأسكنوا وسط عينـي
أبوي وأمي في غلاهـم تماديـت=لي حقن أفخر في غـلا والدينـي
أبوي لي قدوه وأنا بـه تعزويـت=لولاه ماشلت الفخر فـي يدينـي
وأمي هي القبلة وهي شمعة البيت=ياما لفرحي اتحملت كـل شينـي
ما قصروا جابوا لي اللي تمنيـت=ولو اقدروا حطواالقمر في يمينـي
والله لوأبذل حياتـي فـلا أوفيـت=ربع الجميل اللي كسوا به سنيني
والثالث اللي كل ماضـاق فزيـت=هذاك أخوي وفي حياتي عوينـي
والرابع أنته عقبهم بالغـلا جيـت=ياللي أبيـك وداري أنـك تبينـي
أدري حبيبي لـاللقا كـم تحريـت=وأدري بشوقك كـل ماتحترينـي
بس الوفاء يفرض عليه إذا أوفيت=انـي أحطـك بعدهـم ياظنينـي

أنا شف قلبي ديرتن مابها سكان=ياكود الجوازي تتطرد في مفاليها
فيافي خليه مارعاها صبي الضان=ولاعمره العساس دوج بأراضيها
على جبالها لاأقبل مساها قنب سرحان=ونسنس هواها وأستكن كل مافيها
ورشرش مطرها بين سبلن على هتان=ألين السيول تضك واسع مجاريها
عطاها الولي خضرة ومنظر زهر فتان=رياضن توسع بالحيا صدر ماشيها
وإذا ماحصل ودي بأدوج مع البران=وأسج القدم في ديرة الله محليها
بأسج القدم يوم أتمشى مع البدوان=وأشوف الركايب والرعايا تباريها
وتلقى البيوت اللي تنصب على العمدان=بيوتن بها تكثر تراحيب راعيها
وتلقى الدلال الصفر تركى على النيران=ومحماس بن بكف ذيبن يسويها
ويازين شوف الذود تدحم مع الحيران=على جال عدن من حمى القيض يسقيها
وصوت المحالة يختلط مع صدى الرعيان=رجالن على الشدات تثبت مواطيها
يقاسون ظيم الوقت وملاطم الأزمان=وليا ذرعوا بقعاء تصاغر بلاويها
كتبها الضمير العاشق الملهم الولهان=على شف قلبي يوم أغني بطاريها

أكتبيني ياقصيده كم أنا مره كتبتك=وأشرحيني للحبيبه ليه عنيت القصايد
فهميها عن جنوني لاتولمت وحبكتك=وش خطر في بال تركي غير لبّاس القلايد
خبريها كم بحرٍ جيت أنا منه وقطفتك=ذكريها بالحقوق وبالسلوم وبالعوايد
علميها عن ظروفي علميها لاعدمتك=ليه عيني من عناها حاربت نوم الوسايد
جاوبيني ياحروفي لاتماديت وسألتك=منهو اللي في خفوقي نار حبي له وقايد
ماكتبني غير قافك ماسترني كثر صمتك=كل همي تفضحينه لاغدى بالجوف زايد
تنثرين حروف عشقي كل ماقمت ونظمتك=ماعصيتيني بقافك ماطلبتيني سدايد
بس هالمره دخيلك بس هالمره طلبتك=فهميها ليش تركي كاتبٍ ذيك القصايد

يادلتي ياللي على الجمر أسويك=بقفرٍ خلا مد النظر فيه يحلو
من عقب ماهو للظما والتهاليك=ربي سقاه السيل من صادق النو
حتى طغى عشبه على الجال يغريك=يغريك شوف العشب ومغيّم الجو
يادلتي أطرب يوم أني أراكيك=على الجمر والبن محموس من تو
ريحه يزيح صداع منهو مهاويك=اللي صداعه منك ماجاب له سو
وتبهيرتك بالقيس من غير تشكيك=الزعفران وريحة الهيل تشدو
وليا طبختي زين أزلك وأصفيك=وأصب فنجالي على الليت واللو
وأحسب مشاريعي وأفك الشبابيك=لأحلام صدري لين بالجو تعلو
وليا فضيتي وجاب بطنك لتاليك=أرجع أحلامي سجينة عن الضو
وأقوم أغسلك زين من عقب أفضيك=قبل مغيب الشمس والليل يدنو
وأردك لصندوق عزبة يغطيك=وأعوّدورجلي على الدرب تخطو
يادلتي ماني بشعري محليك=لاشك فيك يعوّد الشعر يحلو

ياوقت صار العز بالمال والشيـك=وألا الفقير رخيص لوهو وليـده
لاصرت راعي مال شبيـك لبيـك=آمر تدلل وأطلـب اللـي تريـده
تلقى البشر في كل مكان تغليـك=وكلٍ يحطك تاج راسـه وسيـده
ولاصرت راس المال ماحط بأيديك=ولاأنته من اللي مايحدد رصيـده
قليل من هالناس تلقى مصافيـك=وفي كل درب تطقها لـك عنيـده
ياوقت فيه أصناف لاماتنشميـك=ولاتنفععك بس همهـا مستفيـده
وياوقت فيه رجال بالطيب تشفيك=لو كان ماعاشوا حيـاةٍ رغيـده
ماأثرت فيهـم مصايـب تحديـك=ابما كتب ربي مشـوا بالعقيـده
الله وأكبر يالزمن كيف أجاريـك=لاصار راس المال هـم وقصيـده

الشعر ماهو هواية أو دراسة ياجميل=الشعر مثل السحر لا من لقيت الملهمه
فيه حبك وفيه سبك وفيه للمعنى فتيل=فيه فزات الخواطر والحروف المبهمه
قاف مر وقاف أمر وقاف حلون سلسبيل=وقاف رومنسي وقافن كل مابه همهمه
وقاف حكمه ماتبي غيره من الحكمه بديل=وقاف تلقابه شجاعه والشجاعه تنهمه
وقاف طاروقه ليا غنابه القلب العليل=هيض هجوس الهواوي والخلايق تفهمه
وقاف نكبه في وصوفه قاف من آخر موديل=شاعرن شاف الفراشه فوق ورده تزهمه
وقاف لوسموه قاف نقول طبعا مستحيل=شاعرن يكتب سوالف حشموه لدرهمه
وفي ختام القول مني هاك يالطرف الكحيل=كل شعري ماكتبته غير بأحلا ملهمه

حياك الله ياتركي

شاعر متمكن لاتحرمنا جديدك وابدعاتك

وخير ماسويت هذة المدونة

تقبل مروري المتواضع

اذا سمحت لي
سأكون ان شاءالله من المتابعين لمدونتك ياحفيد عامر

فجر