من تاريخ القبابنه وسلفتها لها 300سنه تقريبآ

بسم الله الرحمن الرحيم
السلام عليكم ورحمة الله وبركاته

اخواني في أحد السنين أصاب نجد قحط وجدب وكان قائل هذه القصيدة مع جماعته القبابنة نازلين في الغيل وستارة وحراضة وما حولها فشاهدوا البرق أكثر من ليلة على جهة الشمال والدهناء فتشاور بعض القبابنة بيحيلون لتلك المناطق فأشار عليهم الشاعر - وكان حكيما - بالبقاء والتثبت من البروق وش خلفت وخصوصا أن ديار القبابنة بفضل من الله ( مســـاس ) أي أنها مع تتالي الدهور وسنين القحط مايموت الحلال فيها بل يجد ما يأكله بخلاف بعض المناطق الرعوية الأخرى التي عندما تنقطع الأمطار عنها تجدها قاع قاحلة ،،، ولكن يبدو أن هؤلاء لم يستمعوا لرأيه ، فارتحلوا جميعاً للدهناء ، ولما وصلوا إلى هناك وجدوا أن الدهناء مجدبه ولم ينزل عليها مطر كما تصوروا ، يوم اظلم الليل وكل عين امرحت سمع الشاعر ناقته تحّن وتكثر من الحنين، وفي الصباح وجدها متجهه لديار القبابنة الغيل وبرك وما حولها ، فقال هذه القصيدة متمنيا نزول الغيث على ديار جماعته ومتذكرا صفاتهم الحميدة ومكارم اخلاقهم وحدد من خلال القصيدة ديار القبابنة من برك الى الأحمر , اما قائل القصيدة فيقال انه الشاعر حمود بن رهيش الحوازمة القباني وقيل انه عبدالله بن مويجد القباني والأول اقرب يقول الشاعر رحمه الله :




شرنا ولا طاعوا وشاروا وطعنا=والأشوار فيها معي وسمين
نبغا الحيا وتقودنا يمت الحيا=ونتبع دواهيم السحاب منين
وصار الحيا اللي قاصدينه تلزي=وقت ٍ على العالم يشيب العين
ويقول إبن قبان وهو له فاطر=لا جاء توالي الليل تجر حنين
حطت لها معواد البريكه جريره=وأحدها يسار وتروح يمين
تبغي دارها عسى الحيا يم دارها=يومها فيه وهي شاحم بدين
مخيلت ٍ من جر برك إلى الحمر=من جاء منها يذكر السيل رسين
ووادي أبرقيه عقب الخرج سيلها=غاشيه من نو السماك غظين
تسج النعامه في مثاني إرجوعها=ويدنى لها فوق القليب هجين
لا وردت ماهقت إن أحد ٍ يضدها=ومن واردها على الماء يصير عوين
عسانا من الحي الذي ينزلونها=ونجي عليها بالبيوت قطين
ديرة بني عمي هل المدح والثناء=وجيهن لا شانن الوجيه تزين
مشحمة أرقاب السري لضيوفها=هذي جذوعه في الجزوع درين
قوم ٍ تسلي الأجنبي عن لابته=لو عندهم قام أشهر ٍ وسنين
خفاف النفوس إن شفتهم وسط مجلس=وإن شفتهم فوق الأصايل فغضبين
لا جاء النذر من يم قوم ٍ شريره=قالو يالخفرات حطو عقالين
مقياضهم في الغيل في وادي السري=في محضّرات ٍ حيطت بالبساتين
ومرباعهم في الصلب لا زان مرتعه=لا ذكر قفر ٍ ينزلونه جريين
هذا وأنا ما أسقطت حق القبايل=ولا والله أهفي للقبايل موازين
كل ٍ بحده واقف ٍ دون حقه=ولو قلت أنا أطيّب فالقبايل معيين

اما تاريخ القصيدة فقيل انها قبل 400 سنة او اكثر , ومن خلال اطلاعي على ابيات القصيدة ومفرداتها فهي توحي بقدمها وقد تكون قبل 400 عام ولكن ومن خلال المواقف والأحداث التي تحدث عنها الشاعر وربط الأحداث في القصيدة فهي في حدود عام 1200 هـ الى عام 1250هـ خاصة ان الشاعر استشهد بتشحيم السري وهي قصة كرم منقطع النظير حيث ان فيصل بن دخيل الله آل غليظ القبابنة كريم غفر الله له ومن كرمه نفد ماعنده من حلال وخطره ضيوف ولم يجد مايقدمه لهم وكانت النخلة عندهم اغلا من الناقة فأمر العبد يليف النخلة وكل مامره قال زد الى ان قال العبد ظهر قلبها ياعم فقام غفر الله له بقصه وتقديمه للضيوف ولم يخبر العبد بنيته خايف انه يعصاه او يرده لايشحم النخلة , اشتهرت القصة وتناقلها الرواة والشعراء ومنهم شاعرنا وكان وقتها متوافق مع الحملات التركية على بلدان نجد , غفر الله لشاعر هذه القصيدة ورحم الله من اكرم ضيوفه من شحم نخله وعلمت من رواة القبابنة انه انقطع عقبه غفر الله له

اتمنى اخواني ان اكون وفقت في التعريف برجال رسمو ذكرهم الطيب بعلومهم الغانمة من كرم وشجاعة وفروسية وفراسة ,,وتحياتي لكم::
بنت الصمان

اختي بنت الصمان

اشكرتس على هالموضوع الجميل

ولي ان اخذ هذا الموضوع لمنحى اخر ولو انه ليس ببعيد


سالفة البرق والرعود وبالنهايه مافيه مطر

هناك اشخاص استطيع ان اقول هم هكذا >>عساتس ماتواجهينهم بحياتس يابنت الصمان

تشوفين العلوم والسوالف

وانا وانا واقدر اسوي كذا والناس اخر همي وبسوي وبفعل>>هياط الى مالانهايه

لين تحسين ان الموضوع صدق

هنا اقول بروق ورعود

والمطر بينزل الحين


يوم يجي الفعل


ماتلقين الا الخلا الخالي




تقبلي مروري >>اللي مدري وش يبي


فجر

سلمت اناملك على هذا الطرح الرائع

وعلى القصيده الجميله

طرح جميل بنت الصمان

شكرا لكي وتقبل مروري

فجر لا شدعووه مروورتس يسعدني
ويشرفني دووم وعساهاا مو اخر المشاركات
ف مواضيعي
المتغرب وتركي اسعدني مرووركم الدايم ع المواضيعي
وتسلمون ماااتقصرون معااي ومع غيري,,,