دلــــوعـــه عن باقي الـــغيـــد

دلوعة البيت من يقدر يضايقها
يضيق ابوها ليامن جْتِه زعلانه

لو زعـلـتـها امـهـا يـمكن يطلقها
عشان يرضي دلعها زعل اخوانه

تخطي على كيفها محدن يخانقها
تسوي اللي تبي ماهي بغلطانه

مطنوختن نص هذا الكون عاشقها
تلعب على لحية الشايب و ورعانه

ما كل رجلن يجي يقدر يشوقها
لو غاص بحر المحيط وجاب مرجانه

عن باقي الغيد سبحانه مفرقها
تمشي بخانه وكل الغيد في خانه

وقلوب عشاقها بالعين تسرقها
لو كانت قلوبهم بالحب تعبانه

إليا تمشت جميع الناس تلحقها
الله عطاها الحلا والزين بالوانه

وإليا ركبت موترن ياحظ سايقها
اللي علي موتره ويلف سكانه

لو شعشع النور نور الشمس يحرقها
مصيافها بين فالوغه وحمانه

لبيه من خصرها لي حد عاتقها
الله على اللي قطف توته ورمانه

تشرق مثل شمس يوم العيد مشرقها
والعين لا سلهمتلي عين شيهانه

مافيه غيري من العشاق شايقها
البارحه طول ليل الحب سهرانه

تنطرني ازورها وانا معلقها
يدها على خدها تنطر وزهقانه

وان جيت جتني وخطوتها تسابقها
تجي من الشوق مشتاقه و ولهانه

ماقول ماحبها لا والله اعشقها
والقلب يجريلها دمه وشريانه

البنت خلها تحس منته بطايقها
وحافظ عليها مثل ماتحفظ الدانه

وان حست انك تجي لا لاح بارقها
وعينك على شوفها عجله وشفقانه

احسب حسابك مفارقها مفارقها
وماعاد لك في مشاعرها ولا خانه