هنا جدول المحاورات المباشره الاسبوعيه .. تعرف على موعد ليلتك

11-19-2008, 07:45 PM

السلام عليكم ورحمة الله وبركاته

مسااااكم الله بالخير جميعا

عدنا اليكم والعود احمد

كما وعدناكم سااابقا بترتيب جدول المحاوره الاسبوعيه المباااشره

هانحن الان نعود اليكم بجميع الترتيبات موضحين بها مايجب توضيحه ومن لديه سؤال فليتفضل ..

وتكون أليته على النحو التالي .

سوف يكون لكل ليله فارسين من فرسان المحاوره حسب الجدول الموضح ادناه بالتاريخ والساعه

وسوف يبدأ بالطاروق الاول الشاعر الاول ويستمرون فيه بحيث يكون لكل شاعر كمجموع ابيات (8) ابيات ومن ثم يغير الطاروق الشاعر الاخر ويستمرون كذلك في عدد الابيات نفس الطاروق الاول .. ولهم الحريه فاللحن والقاف وكل شي ..

وهذا نموذج فقط حتى تتمكنوا من معرفتها اكثر بالشكل المباشر وهي محاوره بيني وبين الشاعر القدير// عبد الرحمن بن مرزوق في عدد الابيات وطريقتها

الطاروق الاول من قبل الشاعر الاول

سفير المهد

سلام يااهل الدار والديره وانا طرقي وضيف=تسليمتن عن وصفها يعجز لسان الادمي
الليله المعنى ياابن مرزوق حده حد سيف= اما سريت الليل الاسود معي والا تنعمي

عبدالرحمن بن مرزوق

يامرحبا في مرحبا واقلط على هيلن وكيف=ترحيبتن للمسلم اللي مايغر المسلمي
ياشاعر المعنى ترا خصمك ماهو رجلن كفيف=اكرب حزامك والفشق ياصاحبي في محزمي

سفير المهد

دام البقاء وانا اخبرك وقت اللقاء ماانته ضعيف=وانا سفير المهد ابا اصرف لك ذهب من منجمي
حمامة طوقا على الاشجار اشوف لها رفيف=وفروخها ياكثرها ماهمها صوت الرمي

عبدالرحمن بن مرزوق

عطنا من الوزن الثقيل وجنب الوزن الخفيف=وان قام حظك قلتلك مالك شبيه ولاسمي
خلك تحت ظل الشجر ترى الهواء جاله وحيف=ويكيفيك من عندي تماثيلي وخطي بقلمي

سفير المهد

مد الوفاء لاهل الوفاء ياصاحبي ماهو كليف= قرب صحنك اللي معك وابشر بمد الحاتمي
ماعاد فالشجره ضلال ووضعها وضع(ن) مخيف=ويكفيك من عندي ياابن مرزوق كية ميسمي

عبدالرحمن بن مرزوق

الشيعه اللي فالحساء والشيعه اللي فالقطيف=يمكن نسفرهم على ايران عند الخاتمي
لاوالله الا ظلها عامر ومجناها نظيف=والميسم الحامي نرده في قفاك ويحتمي

سفير المهد

لا والله الا بنطت ددسنك في جنب الرصيف= واخلفتها عن دربها بلحيل ياعقول افهمي
افا ياابن مرزوق كيف تصير هذي منك كيف؟=لولا مناقيد العرب قلت لك كلمه من فمي

عبدالرحمن بن مرزوق

ثوبك على جسمك مفصل زين لكنه قضيف=ياللي على باب الحرم بالثوب شفتك محرمي
لايلحقك شكه من الظابط تطمن يالعريف=ماني براضيلك ظليمه وانت منته ظالمي

ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــ

ملخص الطاروق الثاني

عبدالرحمن مرزوق

وشلون ارحب بالعزيزي والعزيزي من مطير=هـذا محلـن للعزيـزي جعلنـا مانفـقـده
الليله الموضوع كله خيـر والدنيـا بخيـر=ارتاح ياقلب العزيزي واشكـر الله واحمـده

سفير المهد

مافيه شك الله يبارك فيك يالوجه السفير=هذا محل اهل الشرف ليه شرف يوم اقصده
انا احمد الله مير بعض العلم والله مايصير= والا ماني مزري عن الملقوف لااكسر له يده

عبدالرحمن مرزوق

الله يعز الدين وبن سعود والقلب البصير=والله يفرج هم راع الهم والله يسعده
انا اعرف الملقوف جاء لنا يبى سمن ومضير=لكن لاجانا نكحل عينه من المروده

سفير المهد

باذن الله ان شدادهم ثابت على ظهر البعير=ويعيش راس اللي على السنه مشيد مسجده
الله اكبر ويش اسوي فيك ياعقل الغرير =شغلتك لامني عطيتك علم قمت تردده؟

عبدالرحمن مرزوق

أنا بعيري مطلقه وألا أنت اعرفك ياسفير= عندك خضير كل ليله فالشعيب مسنده
اليا بلانا الله بمجنونن يروعه الصفير= لازم نجيب له الدواء ونقومه ونرقده

سفير المهد

ماعندي الا انت الله يخليك لليوم الخطير=عليك والله مابغيت اسل سيفي واجرده
وش لون ابتدلين درب الخير ياعين الضرير=هذا الخبر والهرج له ناس وعوارف تنقده

عبدالرحمن مرزوق

الملعبه ردن بسرعه لاتاخر يالامير=ياطيب رجالن كلامه للنشاما فقده
ياطير مكسوره جناحينك ولايمكن تطير= احسن تخش العش وتشيل اللحن وتغرده

سفير المهد

الله اكبر ماعرفته غير فالقاف الاخير= بلسانك تقوله وفي قلبك كلامك تجحده
الطير رفرف فالسماء لاهو ضليع ولاكسير=وان قالها الله ياصحيبي مايضيع له جهده

كمانتمنى من الشعراء الالتزام بالمواعيد وشاكرين لهم على تلبية الدعووه ..

هذا ولكم اجمل تحيات اخوكم // سفير المهد

ملاااحظات ::

* نرجو من الشعراء الالتزام بالمواعيد فالحضور فالوقت المحدد لكل شاعر . كمايجب ابلاغ المشرف القائم على التنسيق بوقت كافي اذا حصل لديه ظرف يمنعه عن الحضورحتى يتسنى له ايجاد البديل فالوقت المناسب .

* سوف تبدأ جميع المحاورات السااعه التاسعه مساءا كما يمكنهم البدايه قبلها بنصف ساعه لامانع اذا كانوا الشعراء متواجدين وسجلو حضورهم جميعهم .

* نرجو من الجميع الحضووووووور والتشجيع والاستمتاع بمايقدمووه شعراءنا المتميزون ولكن في حدود الادب والمنطق ..

* سوف يقوم أحد الاخوه المشرفين بتنسيق ابيات الشعراء وترتيبها بشكل مميز بعد انتهائهم من المحاوره وتنزيلها في موضوع مستقل ...

سفير المهد · 11-19-2008, 09:34 PM

أخوي الغالي سفير المهد

الله يعطيك العافية

الأمثلة واضحه وما قصرت بالشرح يا مدرس<< يحسبوه بمدرسه

أتمنى التفاعل من الجميع

وكما قلنا

أكتبنا مع الصفوف أنا وأحمد

كن بخير

أخوك

نواف بن صعير

سفير المهد · 11-19-2008, 11:58 PM

حياك الله يانواف

لاشكر على واجب يالغالي

والله الله لااوصيك على الصفووووووووووووف

الصفوف عاد عندك انت

وشاكرين لك تواجدك

سفير المهد · 11-20-2008, 02:05 AM

اشكرك اخي العزيز سفير المهد

على جدول المحاورات

وابشرو با الصفوف

سفير المهد · 11-20-2008, 08:48 AM

أخوي الغالي سفير المهد

الله يعطيك العافية

الأمثلة واضحه وما قصرت

وشعاااااااار مبدعين ان شاالله

والله يجملني معك

سفير المهد · 11-20-2008, 11:12 AM

ابو سعدي الله يوفقك مجهود رائع تشكر عليه
وشهادتي فيك مجروحه من مبطي تحياتي لك

سفير المهد · 11-20-2008, 02:16 PM

الله يعطيك العافيه اخوي سفير المهد

على مجهوداتك المميزه

وشعراء كبار

تقبل تحياتي

سفير المهد · 11-20-2008, 02:20 PM

أخوي الحبيب سفير المهد

مشكووور على التنسيق و مواعيد المحاورات

والله يوفقنا مع الشاعر عمر عمران

وشكراً لك

أحمد الوصلي

سفير المهد · 11-23-2008, 12:29 AM

[overline]

السلام عليكم ورحمة الله وبركاته

الله يعطيكم العافيه ياخوي سفير المهد

على هذا التنظيم الرائع وانشاء الله راح نقدم شي ء يليق

بمستوى هذا المنتدى الادبي الذي يضم نخبه من الشعراء

المتميزين 00000 وشكرا ً للجميـــع

[/overline]

الذين يشاهدون محتوى الموضوع الآن : 1 ( الأعضاء 0 والزوار 1)

الإهداءات