عرش بلقيس

البــــارحـه ليلـــــي إهمـوم وكوابيـس
وابعــد من الجــــوزا علـيّ الونــاسـه

ماغير أنا والليـل والثــــــالـث ابليـس
كلٍ علـى الثــــــانـي يبيلـــه ريــاسـه

مدري ظروف او حب وإلا هواجيس
وإلا الثلاثـــــه كلهـن فـــــوق راسـه

أو إن عقلي صـــــــــايـرٍ فيـه تنكيـس
وللعقـــل في بعض الامـور إنتكاسـه

يا لايمي لتلومنـي قبــــــــــل ماتقيـس
والـلـوم للمـيــــــــــــّس يزوّد بيـاسـه

والشمت طبـعٍ للرجـــــــال الهلابيـس
أهـل الهـــــــدف والنمنمـه والبلاسـه

وانا معي عقل ومشـــاعر واحاسيـس
وإعيون وأخـــــلاقٍ وقلـب وشراسـه

لكن حصلـــــي من زمانـي عواكيـس
وعجزت هذا الوقت لعرف لنـــــاسه

هـذا يموّهــــــــــــــا بـهـرجٍ تمالـيـس
وهـذا إيتجاهلهــــــا إعنـاد وخساسـه

وهذا يغـرك مظهـــــــــره بالملابيـس
وهذاك يلبس لبـس ماهـو لبـــــــاسـه

وهذا تذعذع لـه هبــــــوب النسانيـس
وهـذا تقـل إمغمغمِ لـه بطــــــــــاسـه

واليـــــا حصلك من زمانـك كعاميـس
اصبـــــر وللصبـر الجميـل انعكاسـه

إتدرّسك دنيــــــاك مـن غيـر تدريـس
ماهو لـــــــزوم إنـك تـدرّس دراسـه

وللناس بالدنيـــــــا حظـوظ وقواميـس
اللــي غرف ( بدرام ) واللـي بكاسـه

وناسٍ تهجّس في غثى الوقت تهجيس
ونـاسٍ تسايسهـــــــــا وتاتـي سياسـه

وناسٍ تبي عرشٍ مثــل عرش بلقيـس
وناسٍ تبي لو يـوم فرقـــــــا التعاسـه

وترى الردي لو فيك سوى نواميـس
ينقد علـى نفسـه ويرجـــــــع لساسـه

قنعت واقنعنـي كتـاب الوســـــاويـس
لكنّ عقب ما إصـرف لشيك الفلاسـه

وسلامتكم