قصيدة الشيب

من القصائد الرائعه للشاعر عبدالله الشريف

لمـه لمه , يارأسي الغالي تطاطـي للمشيب=أغراك شـيبي يوم قال إنــه وقــارٍ تحمــله
لمه لمه , يارأسي الغـالي وانا أعدك لبيب=يضحك عليـك الشيب يا رأسي وتحمـل مشعله
يبدأ يدغـدغ جانبي بلا رقيب ولا حسيـب=ويبتســم ويقـول هذا العــز , هذي المرجــله
وينتشر مادمت له ياعزوتي الروض الخصيب=مدري متى سمى , ولا أظـنـه بدأ بالبســمله !
لاهـو يخاف من الصيـاح ولا يحن من النحيب=ولا يبالي تمـدحه , وإلا تكــيل الشتــم لــه
لاهـو عـدوٍ تعرفـه ولا تــظن إنـه حبــيب=لاهـو حمـيمٍ تعـذله , ولا خصيـمٍ تقتــله
يقول أنا مثل الصباح , يقول أنا مثل الحليب=يقول أنا كالـزهر الأبيض غايتي ود وصله
وأنا أعرف إن الشوك الأبيض يجرح الكف الرطيب=بعض الزهـور البيض لوجادت تجـود بحنظلـه
الشيب ماخلى ردي , والشيب ماخلى عريب=أقول سـاعٍ ما أظلمه, وأقول ســاعٍ مـا أعذلـه !
الشيب ضيفٍ لو نزل لاهو يمـل ولا يغـيب=وإن حل فـي رأس الكريم يزيد حتـى , يشمـــله
وكل ما زاد البيـاض أخشى سويعات المغيب=ترى بيــاض السنبله , يعنــي حصـاد السنبلـه
الشيب ماهو عيب لكن مافعل بي الشيب عـيب !=لاهـــو يطـــمني , ولــــو طمنـت ظبـــيٍ جفــله
ولوصبغت الشيب خانتني جذوعه مـن قريـب=وأصبحت فـي عين الظبا , غشاش والدهر أهمله
ما أبغى الفتاة تقول وا عماه , يالشيخ العجيب=صوتك يقول إنك شباب , وشيب رأسك يخذلــه
ما أبغى يقولون أنت شايبنا ومحزمنا القطيب=مــدحٍ يكــدر خاطري ماسره , إلا علــعله
من يجتهد يا رأسي الغالي يجد حـظ ونصــيب=وانا أجتهدت , وشيبك يهلهل كياني هـــلهله
ما أبغاك تُحبس في شماغي كأنك الكنز المريب=إذا حــجبتـه معضلـه , وإذا كشفته معـــضله
الناس تثني ع العنــب ولا يذمـــون الزبــيب=لــكن يبقى للــعنب بأول قطـافه منـــزلــه
أبكـي على حالــي ومن يبكي على حاله مصيب=وأضحك على حالـي ومن يضحك على حاله دلـه
يسقي زمانٍ كنت أنا فيه المُخاطب والخطـــيب=أقطف من الزهـر أجمـله وأنظـم من الشعـر أغـزله
واليوم أنا أعـد الخطى وأخاف مـن عين الرقـيب=ولو نظمـت الشعـر أخاف وإن قلــت أجـــزله !
قـد كان لي جـسمٍ نحيل وكـان لي صدرٍ رحيب=أسري ولو غاب القمــر والهــم , أبد , مـالي وله
واليوم أقول إني صحـيح , وماني أبعد من الطبيب=وأقول انا مستـانس , وصــدري حـراك وجـــلجله
كم كنـت أغني ربمـا يطرب لصوتـي العندلــيب=أو ربما أغشى البحــر , ماأخاف البلل والـبلبله
وأجعـل من القاسـي مُـذاب , ولا يذوبني مُذيب=ومنهجــي فـي السابعـه والثامنه فـي الـزلزلــه
ولو نهـاري غـرني أمسيت في ليلــي مُنــيب=ولو زمــاني ضرني كسٌرت بــيدي معـــولــه
ولا يوقفنـي جبــل , ولا يهرول بـي كثــيب=العـاقل اللي مــايقف , ولا يهرول هـــروله
أحد مشـى فيهـا مـرح , وأحد يدب بها دبيب=وانا قصـدت المشـي يكفلني زمــاني وأكفــله
واليـوم غيرني الزمن كني على نفسي غريب=لانـي قويت أمــضي معـه ولا قــويت أفرمـله
آقـف وأنا متمــاسكٍ لكــني أودي وأجيــب=الدهـر وإن ما طيـح الشامــخ , تراه يمـــلمله
حتـى إختراعات الزمان أشوفها لغزٍ عصيب=من فـاته قطـار الزمـان أصبح عــدو مايجهـله
يا رأسي الغالي تشيب اليوم وإلا ما تشيب=اللي يشــوف أتلى الزمـان يقول يازين أولــه

قد كان لي جسمٍ نحيل وكان لـي صـدرٍ رحيـب

لا تبحث عن التميز فالتميز دائما يبحث عنك

ما زاد من روعته هو مروركم الغالي اخي رحال واختي فجر

الله لا يحرمني من طلتكم البهيه

الله الله

صح لسااااااااااانك يا الشريف


وسلمت لنا أنااااملك يالمغترب على النقل المميز

قصيده جزله ووصف دقيق ( الشيب )

تقبل تقديري وإحترامي


أخوك

التميز هو مرورك العطر اخي نواف