درة بن زويبن ياسعود الشاعر عبدالله بن زوبين

ياسعود عل دياركـم عمهـا السيـل=عقب البروق اللـي تكاشـف جهتهـا
عطني جميـع اخبارهـا بالتفاصيـل=عسـى الرجـوع التاليـة سيلتـهـا
لعلهـا دايـم تـصـب الهماللـيـل=علـى الفـروع جبالهـا واوديتـهـا
دار ربـو فيهـا الرجـال المشاكيـل=من ماضي الايام مـا احـد شمتهـا
حمايـة الخايـف وصبابـة الهـيـل=وعوق السمين الللـي تمـوح ذنبتهـا
لو كان ما رجي من وراها محاصيـل=مير الرجـال تحـب مـن سامعتهـا
وفي ضفهـم راع العيـون المكاحيـل=اللـي يـذوب القلـب مـن سلهمتهـا
إلى اقبلت قـام يتكفكـف دجـا الليـل=كـل الديـار المظلـمـة نورتـهـا
وإلى ادبرت غطت جسدها المجاديـل=بيـن الخلايـق لـو تعـرى كستهـا
أن كفتـه مثـل الغصـون المحاميـل=وان فلتـه قــام يتثـنـى تحتـهـا
كنه سبيب اللـي ليـا ماحـت الذيـل=راسـه تعـدى راسهـا وارقبتـهـا
صفرا وهي بعذارها سمعـت الخيـل=اشد من ضـرب الدفـوف أرجفتهـا
وقامت تشيل بنفسهـا بالسمـاء شيـل=وصاح النذير وسبـق الخيـل جتهـا
خيالها دايـم علـى خصمـه يميـل=الـى فـرق رجليـه عـن معرقتهـا
شيـخ مضريهـا لنطـح المقابـيـل=صـوب الخـلا بعنانهـا ماعفتـهـا
تفرح به اللـي ماروراهـا رياجيـل=وصكت عليها خيـل قـوم وخذتهـا
قـوم تقـفـوا جلـهـا والمخالـيـل=اقفـوا علـى خلفاتـهـا واجنبتـهـا
وابطت فـزوع مسحبيـن الشماليـل=وجاء من يرد البـل علـى راعيتهـا
عن كبدها يجلـى الصـدا والبهاذيـل=الى لفت فيـه الصـدف مـن بختهـا
ونادى لهـا يـام الحلـق والخلاخيـل=ويـن اتجـاه القـوم يـوم اقتفتـهـا
وقامـت بذرعـان زهتهـا المفاتيـل=تنعـت وراهـم ليـن وكـد نعتهـا
وقامت تزغـرد بالغنـاء والمواويـل=وجاه الدهاش وشاش مـن غطرفتهـا
ولحق بسيفٍ لمعتـه مثـل الأستيـل=وصفراً إلى جـات الحـلاة أطمرتهـا
وأومى بهم مثـل الهـوى بالمخاييـل=وضاقت بهم جرد السهـال وسعتهـا
من راح ماعود ومن طاح مـا شيـل=قطم الحـذا راجـت عليـه غبرتهـا
فيما مضى واوردتها ضـرب تمثيـل=لوكـان دورات الزمـن كـد محتهـا
دنيا تفرق شمـل جيـل بعـد جيـل=قدامـنـا كــم عـاالـم فرقتـهـا
دارت بنـا الايـام مثـل المحاحيـل=عنهـا نحـت فيـه وعنـي نحتهـا
نحت ولاجتنـي خطـوط ومراسيـل=وإلـى كتبـت رسـالـة ماقرتـهـا
لاكن قـرار الحـب مافيـه تعديـل=لو عشت بالدنيـا إلـى آخـر سنتهـا
يبقى على ما كان لـو طالـه الطيـل=رسـمٍ بذاكرتـي وفـي ذاكرتـهـا
هاض الضمير وقلت من عر ض ماقيل=واخير مـن سـرد العلـوم اثمرتهـا
اخترت ماتصصلـح عليـه التعاليـل=عند الرجـال اللـي تصـوغ أمثلتهـا
بعض الرجال يقابـل الكيـل بالكيـل=وبعـض الرجـال تحدهـا معرفتهـا
والنـاس بالللـي ماتعرفـه جهاهيـل=ويبيـن غيـب قلوبـهـا بالسنتـهـا
وتعـرف فصيلـة دمهـا بالتحاليـل=وتبيـن جنسياتهـا مــن لغتـهـا