ديوان الشاعر رويضي وسمي العزيزي

مجاراة الشاعر محمد مخلد القسامي

قصيدة محمد القسامي

لاحت بروق الوسم والقلب فزي.....................قلبي على شوف الحيا دوم فزاز

يهز قلبي بين الاضلاع هزي.....................هز الذي هزه مع الوقت هزاز

والقنص قرب والخواطر تحزي.....................وخاويت طيري مع جراهيد الابراز

من فوق جيب(ن) لانهمته يفزي.....................من وارد اليابان والنوع ممتاز

لكزس اليا منه عطى الدرب دزي.....................واليا استوى ممشاه بالجايزه فاز

من شان ابطرد هم قلب(ن) يجزي.....................اطرد هموم(ن) سببت لي تنفراز

واسج وسط الروض مع كل حزي.....................في صحصح(ن) خالي به الصيد لي جاز

ابه المها وبه الحباري ترزي.....................رزة غنادير(ن) تسبب لك اعجاز

واهد شيهان(ن) بعينه يقزي.....................يفرح اليا منه سمع صوت اليعاز

يصيد جزل الصيد ماصاد وزي.....................ويشوق قلبي شوفته عقب ماناز

واليا طرد بالجو لصيد جزي.....................مخلابه بضربه على الصيد جزاز

ومن كل صيد(ن) بالحوافض نلزي.....................حسب النضام اللي ولاعاد يعتاز

اليوم اشب النار من غير قزي.....................في وادي(ن) حزه من السيل حزاز

واليا طرالي طاري(ن) قلت عزي.....................للي عن المقناص حاديه معكاز

القنص لهل القنص تاج(ن) وعزي.....................مع طاعة المولى على فتوى ابن باز

وعد الرياح اللي هواها يكزي.....................صلو على اللي لشفاعات هو حاز

بقلم/ ريف النشاما
.
.
.
مجاراة لشاعر رويضي بن وسمي
/

يامل قلب(ن) لزه الهم لزي.....................متلعوز(ن) من شين وقته تلعواز

اليا استوى ضو القمر وابرهزي.....................وانور على حدب الفيافي والاقواز

يخزني من داخل القلب خزي.....................هم(ن) يحايدبي عن الناس وانحاز

بغيت اريح منه والقرم دزي.....................رسايل(ن) تسكب على قلبي القاز

قامت تجي من صوب حي الملزي.....................تشبه صواريخ(ن) تجرز تجراز

ياليت لو(ن) المنى ما يجزي.....................نسج ياراع الرسايل وننحاز

ونصبح مراب اللي اليا شاف كزي.....................واصغى لدرب(ن) عسر ماهوب ينهاز

ودك الجفيل وللعيار استرزي.....................مع العضا قام ايتركز تركاز

يازين رميه شوح ماهوب غزي.....................رمي الدرك ماهوب رمي التهزهاز

بمسلبات(ن) تزت الملح تزي.....................عبرودها منه ايتنقرز تنقراز

وناد المنادي بالعشى واستعزي.....................ولجت حداويهم من اجهاز لجهاز

وتخيرو رجع(ن) من السيل نزي.....................عقب التعب يازين فيه التمركاز

جلسة ونس ماهي مجالس تهزي.....................فيها السوالف والقصايد والالغاز

الشاعر/ رويضي وسمي المطيري
(مهد الذهب)