عبدالحميد الفهمي و مستور العصيمي && الليله الليل ماله غير عبدالحميد

مستور العصيمي

الليله الليل ما له غير عبدالحميد
الشاعر اللي يقود القود برسانها

عطني علومك وأنا بعطيك علماً جديد
ترى العتيبي يدينها ويدانها

عبدالحميد الفهمي

الليله الليل كنه عندنا ليل عيد
الملعبه شوف فارسها وميدانها

العلم ستر الله الخلاق رب العبيد
لكن وش حاجةً نشدتك من شانها

مستور العصيمي

يالشاعر المختبي ما انته بعني بعيد
تراك ما بين شعلتها ودخانها

الليل يا صاحبي ما كل بندق تصيد
وإليا بغيت السلامه عانها عانها

عبدالحميد الفهمي

أنا يا مستور ما هرول ورى كل صيد
مثل اللي تـتعب ورى العصفور كرعانها

لكني إليا لقيت الصيده اللي تفيد
أركيت واسويت حبتها ونيشانها

مستور العصيمي

خلك لحالك طوال الوقت واحد وحيد
روِّح في شانك وخل الناس في شانها

أتريد والله يدبر بأمته مايريد
ما باقي إلا الجنايز تسرق أكفانها

عبدالحميد الفهمي

سنه فرضها الرسول وصار سيِِِِِّد وسيد
أخير من صحبتاً مختل ميزانها

وانت ايش حصلت من صحبتك مع بالبيد
حفت الحضارم وأبت تعطيك دكانها

مستور العصيمي

ما عرف سر الرساله غير ساعي البريد
اصبح وغير كتابتها وعنوانها

انته تمثل فهم ولا من بني يزيد
الله يحفظ فهم في روس ضلعانها

عبدالحميد الفهمي

كلاًً عرف ما بقي ما يعرف إلا البليد
لكن قلي متى قفلت بيبانها

أنا ممثل فهم هذا الكلام الأكيد
أحسب حسابك وكل ديره بعربانها