قصيده قيمه للشاعر أحمد الناصر..

لاتفرح ان الوقت أسعدك وأعطاك..لابد من سود الليالي تبكيك..
دنيا تقلب علها ماتولاك..تمسي عزيز وتصبح من الصعاليك..
الى اقبلت تخفي عيوبك عن اعداك..والى ادبرت تظهر عيوبك لأهاليك..
أغنم من صروف الدهر كانه امداك..قبل اللحد عن ظاهر الأرض يخفيك..
وترى التشكي للمخاليق يشناك..يحط من قدرك ويفرح معاديك..
وكثر التشره يجعل الناس تشناك..ولاعاد تلقى بينهم من يخاويك..
ولاتمادى في زعل من ترضاك..مادام جا عاني على شان يرضيك..
ولاتخاوي من على أبوه بداك..هذاك وان طال الزمن يغدر فيك..
والجاهل احذر لاتجادله يبلاك..في كلمة بين المخاليق تعميك..
والهرجه العوجى لو انه تنصاك..حاول تجاهلها وخله تعديك..
ولاتضيع هقوة اللي تهقواك..مادام جا بين المخاليق ناصيك..
واحذر تهزا يافتى بخلق مولاك..تشوفها بأقرب قريب يواليك..
ولاتفرح بزود على الخلق وان جاك..زودك ترى نقص على حق ذوليك..
وخل القناعه ميزة من مزاياك..مع القناعه كل شي يكفيك..
وان جت لك الدنيا على غير مشهاك..اصبر ترى بالصبر تدرك أمانيك..
لاتامن الدنيا ترى الوقت فتاك ..لاجا القدر كثر الحذر ماينجيك..