هذه بعض من قصايد متعب التركي (1) الموت هين والبلا وش ورا الموت ** عند الحساب يهون سهم المنايا باكر نموت و تصبح قبورنا بيوت ** وعقب القصور بضيقات الـزوايا في جوف الارض وكل من حولك سكوت ** وتعاقبن بالقبر عوج الحـنايا يارب يا منجي نبيك من الــحوت ** سترك وعفوك يوم كشف الخـفايا باكر ليا جينا على داعي الصوت ** شيبان واطفال وشباب وصبــايا ندعي وحنا بين باكي ومبـــهوت ** ورحنا لها ننقاد مثل السبايا يا رب تهديني قبل لحظة الـفوت ** وتغفر ذنوبي يا كريم العطايا اشكيك همن داخل الصدر مك،ـبوت ** وايامي اللي بالخطايا مــلايا ان لاذ بك من كان طايع و مبخوت ** في من يلوذ المرتكب للـخطايا يا رب يا قادر على كل طــاغوت ** لا ياقف اللي وحدوا بك خـزايا رحماك لا منا صحينا من الــموت ** واليا وقفنا عند بابك عـرايا (2) ياسعود لا تنشد ترى ماني مجـيب ** خل الذي خافي له شهور خــافي ان شفتني مغتاظ لي حق ومصــيب ** ياسعود مزعلني جديد اكتشـافي الغالي اللي كان من قلبي قريب ** بيني وبينه صار مثل التجـافي ان قلت زله مثلنا زلته عـــيب ** من قال لك شمس الضحى ماتشافي ان قلت هفوه يمكن اتصيب وتخيب ** كم لي سنه ماشفت فيه اختـلافي وان صار في نفسه بعض شكه وريب ** حتى البحر ماهو على طول صافي صرنا من الصده سوات المصـاويب ** كلن نقل جرحه وقال متعـــافي اصعب فراق فراق عكف الاشانــيب ** ماهو مفارق لابسات الغـــدافي والذيب لامنه عوى جاوبـــه ذيب ** والعلم حامض بس وين الاشــافي دامه لقى له غير قلبي معـازيب ** الله يسمح درب هاك السنــافي يروح لايرجي رسول ومكـــــاتيب ** هو خابر اني ماتلفت خــــلافي واللي تعلى فوق روس المراقـيب ** اكيد ماتسفي عليه الســـوافي رح بشر اللي شال شلفى تريحـيب ** قله تراها كلبوها عـــــوافي اليوم نفسي طابت وباكر يطــيب ** جرحي لو انه من يدين المشافي خلصت والدنيا دروس وتجـــاريب ** سجل يابو عبد العزيز اعترافي (3) لا تنشغل فيني انا بحالي ادرى ** قلبن تعلق فيك ينسى مع الــوقت اكثر من اللي صارلي ويش يجرى ** بين الرجا والياس شفني تعــلقت هاك القصايد لاتضايقت وقـــرى ** شف وش كثر فيها لضحكاتك اشتـقت يامشتهي فرقا المواليف حـذرى ** تبعد وانا من سكرة الحب مـافقت لاطافت الفرصه تحريت الاخـــرى ** وتروح ماكني عليها تشــــــوقت اثر الوفا ينباع عندك ويشـرى ** ماكنت اصدق فيه واليوم صـــدقت ساري لو ان الليل مافيه قمرى ** اشيل من حمل الهوى فوق ماطــقت لاصار حظ اقشر والايام قشـــرى ** مافيه احد عاقل يلومك اليا ضقت صحيح بعض الناس فرقاه بشــرى ** وبعض البشر لاغاب ليله تضايــقت ليتك خذيت بليل الافكار مسـرى ** غربت من كثر الطواري وشــــرقت السيل يبقاله من القاع مجـرى ** ويبقالك التذكار لو كنت فـارقت اشوفلك من وين مارحت ذكـــرى ** لاشفتها صديت عنها ودنـــــــقت ماكل جرح لاخذا ايام يبــــرى ** بعض الجروح يزيد شره مع الـوقت (4) زي لون الطيف والوان الفـراش ** الهنوف اللي شغلني صــدها ان بكت جا دمعها مثل الرشـاش ** وان تبسم ثقرها من قــدها وان حكت كن بشفايفها رعـــاش ** الخجل عن سالفتها لـــدها والطيور اللي جفت حضن العشاش ** ليتها خلت بقايــــا ودها عقبها كل الغصون امست نشــاش ** خاليه عقب الوناسه خــدها كل قلبن في ذراه الحب عـــاش ** فيه طيبه زايده عن حــدها والقلوب ان فارقت صارت هشـاش ** موحشه والذكريات تشـــدها رفرف البرق وزمت بيض الدشـاش ** ومتلا من صافي الما عــدها مابنيت بيوت شعري من قشـــاش ** ليه اخاف ان الرياح تهدها والهجوس اللي من الفرقا عطاش ** ترغب نجوم السما وتعــدها يوم شق النور من ليل القمـاش ** شفت حبة خالها في خـــدها القصيد لمثلها ولا بـــــــلاش ** لو تبي عمري حشى مــاردها (5) اخر اللي سمعته في نهار الــوداع ** دقة القلب مدري صوت عجل الخطــاوي نايف الطول وش سوى بي الا نقــطاع ** صار بين ضلوع القلب كنه يــــداوي بيني وبين ضحكات السعاده نـــزاع ** كني اللي قضى عمره طريد جـــــلاوي امتلي غيض وازعل يوم ورجع بســاع ** راعي الجرح يستحمل عذاب المــداوي وش يفيدك عذابي ياغريب الطبـــاع ** ليه دايم على الملتاع سيلك نحـاوي غالطوني وقالو ليش هالا نــــدفاع ** ازعجوني عليك مفسرين الحكـــــاوي عذربوك بوجودي بالجفا والخـــداع ** فيك حلو الوصايف فسروها مســــاوي التزمت السكوت ورايهم فيك ضـــاع ** لين قالو ترى متعب على البعد ناوي ميت القلب عرضت الغلا للضيـــــاع ** والله اني على قطع الرجا بك مراوي ماتغيرت لين انك لويت الــــذراع ** تحسب اني على الهجران ماني بقـاوي لو تقول انت ماعقب الفراق اجتماع ** عندي اليوم كل اللي تقول متســاوي او يقولون صار يخاف قلب الشجــاع ** من هاك الليله وبيت القصيد متهاوي بين شقر الجدايل والعيون الوسـاع ** اذكر اني فقدت القلب في هالحـراوي (6) هذا الخبر صدمه وحزن وعــلامه ** على محبّة كل الامه لـخطـــــــاب هذا الخبر والهم هذى خيــامه ** شرّع للأحزان النوافذ والابــــواب ألحقت من جاب الخبر لى مـلامه ** صعبه على الانسان توديع الاحبــاب البارحه غابت عن العين قـامه ** قامة رجل زلزل قناعات واحـــزاب ترجّل الفارس وذب العمــــامه ** واستقبل الموت بحفاوه وترحـــاب ترجّل بصمت ووقار وصـــــرامه ** حتى وفاته شى يدعو للأعجــــــاب من يعتبر فقدان كفه وســـامه ** أكيد ماهو لحظة الموت مرتــــاب وجه واهو مسجى بدر فى تمـامه ** ميت ولكنه واهو ميّت مهـــــــاب أومت له كفوفٍ تمنّت ســـــلامه ** بكته الامه قبل تبكيه الاقــــراب خطاب ماهو بس رمز الشهـــامه ** خطاب نجمن فى سما الامه وغــــاب حر شهر والطلع دار الكــرامه ** والحر مايعنيه تحليق الاســــراب فعله فرض على الجميع إحترامه ** واسمه ملا الدنيا بطوله واهو شاب ماكانت الدنيا مثار اهتـمامه ** بالعكس كان لنصرة الدين وثـــاب لو كان يبحث عن نفوذ وزعـامه ** كان امتلا صدره نياشين والقـــاب الاخره كانت على طول امـــامه ** فى هالزمن خطاب واشباهه اغــراب اختار بديار الجهاد الاقــامه ** ومن كان هذى رغبته لازم يثــــاب واختار بالاسلام ذروة سنـــامه ** الصبح ساحة حرب والليل محـــراب يكفيه فخر ان الشهاده ختـامه ** ماحسّب لدنياه ولعمره احســـــاب يارب تغفر له وترفع مقـــامه ** وتعظّم أجر إمة محمد بخطــــــاب (7) توديع الاحباب مثل الموت له سكره ** ادمي جروحي وشق الصدر مــــنيّا والقلب طيرن ضلوع الادمي وكـــره ** لاشاقه الطلع لاسلم ولا حــــــيّا مصير الاحزان تنساني وتفتكــــره ** ماكل الايام بيض وسمحت محــــيّا قل غيرها منت لامجبر ولا مكــــره ** لاصار ماهو غلا مابيلك احــــميّا لوفي يدي شي ماقلت الوعد بكــره ** حزمت حدب الضلوع وقلتلك هـــيّا لوكل غالي تجي دايم علي ذكـــره ** ماصرت اشوفك هناك وحبك هنـــيّا ياليتني لابغيت اكره قدرت اكــره ** ماكان قلبي اليا جيت اكرهك عيّا مادامك معيف رح لكن علي فكـــره ** ماقلتلى ليه دمعك سال منــــيّا (8) حسي بلوعات الليالي والاحـــزان * بعدين حسي بالهوى لابغيـــــــتي وش به يهمك لو يقولون زعــــلان * لو فيك ذره من غلا ماجفيــــــتي ياللي تقولين الخطا زلت لــسان * في زحمة الايام ليه اختفيـــــتي خطاي وان جه مدري الذنب وش كان * ليه انتهى ذاك الغلا وانتهيـــتي وقفت في وجه الزمن قدر الامـكان * وانتي جنح فيك الخيال وغفيـــتي غلطان انا في كل الاحوال غلـطان * اسرجت لك خيل القصيد وسريــــتي جيتي وقلت الجرح يوم اقبلت هان * وانتي على الجرح القديم ارتكيتي قلتي لي ان الحب لابد ينــــصان * واليوم ماكنك دقايق هــــــويتي شافوك حساد الهوى شوف الاعيــان * يومك على رجم القصايد رقيــــتي مابان شي ولا بقا شي مابـــــان * بس انتي اللي غافله مادريــــتي العام لك طاري بقلبي ولك شــان * واليوم احس بغلطتي لاطريــــــتي وان قدر المولى وعشتي بحرمــان * ومن حر لوعات التجافي بكيــــتي تذكري قلبن له سنين شفقـــــان * شوفي بحقه ياكثر ماخطيـــــــتي كل القصيد اللي اقوله على شـان * تهزك الذكرى عقب مانسيـــــــتي (9) ليه وطيت عن خيل القصيد الســروج ** ليه مديت لي عقب القراح الهمــاج لاتكملي الغلطات والعوج عــــــوج ** يضحك حجاج ولاينعقد لي حجــــــاج إصبر شوي وشعلمك تهوج وتمـــــوج ** ميت القلب مثلك مايعرف الهيـــاج ماتعودت اجامل معتلين البــــروج ** الزم العلم قبل يصير هرجك سمــاج المشاعر تجي مثل المعاصير هـــوج ** وانت مالك على هوج الرياح احتجاج جيت وقلوب حسادي تهيج وتـــــروج ** لاصفا جوهم ساعه قفاه العجـــــاج ابتسملك وهمي فوج يقفاه فـــــوج ** من يحبك لزوم يصير مثلك هجــــاج بس قلي وانا غلطان لك ومحــــجوج ** وين يلقون لجروح النواعس عــــلاج القمر غاب وأنت اطفيت نور السروج ** قلت يكفيك نورالوجه لا اصبح سـراج كن بين الضلوع العوج صفقات مــوج ** يوم فاض الغلا والشوق والقلب هـاج ضيقة الصدر لو بين المحاني تلـوج ** كل ضيقه لها عند الكريم انفــراج ماهو الغيظ سبة كل ابوها هـــروج ** بس مالي على بعض السوالف مـــزاج (10) دليل المحبه شوف عيني عليك تغـــــار ** ولاودي الحاسد عيونك يطالـــــعها مع إنك رحلت بعيد لكن بقى التذكـــار ** ليا شافته عيني تسابق مدامـــعها دفنت الغرام بخافقي والقلوب أســـرار ** مشاعر هقيت إن الليالي تضيـــعها فرحت برجوعك ماطلبت لخطاك اعـــــذار ** ونفسي نست ماجرى من تواضـــــعها تهادت مشاعر خاطري لك بلا معيــــــار ** تجاهلتها لوكنت خابر دوافــــعها يقولون جنّب درب مالك معه معبــــــار ** يلومون نفسن بعد الاحباب موجــعها يقولونها قبلي يخون البحر بحــــــار ** والامواج لا هاجت خذت ماتبي مــعها تكاثرت منك الصد وأثر العلوم كبـــار ** لقيتك على نفسي تقلّب مواجعــــها اقوله وأنا اللي شفت ذاك الغلا ينهار ** يشوف الندم رجّال نفسه يطاوعـــها مثل ماضرب جّون خلا غادي محتـــــــار ** يدّوج ورجله مادرى وين موقــــعها تعرض سموم القيض والدار مــــامن دار ** هليك وشعر بالموت روحه ينازعــها جحدت الغلا لين امتلا بالخفوق وثــــار ** قصايد عساها اليوم تطرق مسامعـها غرامك مثل نارن حطبها الغلا النــــار ** تموت وغلاك اللي بقلبي يولعــــها غلاك بضميري واضحن ماعليه غبـــــــار ** تشيل الغلا نفسي وأنا عاجز امنعها يقولون ماودعّك قلت الفراق وصـــــار ** والإنسان روحه تنسلب مايــــودعها هذيك الليالي وين أثر الــــزمن دوار ** خذاها ولاظني زماني يرجّعـــــــها طوتها السنين ولابقالي سوى التذكـــار ** ليا شافته عيني تسابق مدامـــعها