تدري وش اليي يتعب البنت ياسعود ..؟؟ رجل يخون اشواقها والمودّه .. إللي الى احتاج الغلا صار نمرود .. وإليا شبع مما عطاه استردّه .. البنت ريحانة غلا ناعمة عود .. تبي لها رجلٍ ورث طيب جدّه .. رجلٍ فعوله كلها جود في جود .. مايلتفت للي كفوفه تمدّه .. رجلٍ الى جته الليالي بمنقود .. يتكي لها مابيّح الوقت سدّه .. ماهو بخيلٍ مارعى للهوى عهود .. وادناه ماعارض طريقه يردّه .. ولاهوب لاعلّه ولاهوب ملهود .. ولاشكوك وكل طاري يحدّه .. ماأشين من الرجّال لاجاك ببرود .. وان قال له ترف القدم شي صدّه .. تبي لها برّاق طيبٍ له رعود .. ان اجدبت يمطر على ريف خدّه .. وان نادته تكفى لقت عنده الفود .. يشيل عزّتها على قو زنده .. كفه نفل وانفاس صدره لها عود .. وظلاله الضافي بيدها تمدّه .. البنت قد .. وخد .. ونواظر سود .. وريحة غلا ياسعد من شمّ ندّه .. البنت الى ضحكت ثمرها له ورود .. ياخوي مين يقطف نواوير ورده ..؟؟ واللي يهين البنت ناقص و مقرود .. فرسٍ غلا ,,, ماهي حمارة مكدّه ..