قصيدة مدح للشاعر سعد عواض العزيزي : باسم الذي يسلخ نهاره من الليل = وتتابعت في دورةٍ مستديمة أبدأ كلامٍ قبل هالوقت ماقيل = مثله بتنسيقه يامال الغنيمة كلام حكمة فيه موجز وتفصيل = واليوم أقوله بعد جات العزيمة سلام ردة للرجال الحلاحيل = اللي لهم في القلب وزعة وقيمة متوارثين المجد جيلٍ بعد جيل = كلٍ شهد به من عصور ٍ قديمة يوم الهنادى والسيوف المصاقيل = أفعالهم بين القبائل عظيمة وهامات تبلغ قمة الجدي وسهيل = معها تواضعهم ونخوة وشيمة أهل الوجيه المسفرات المهاليل = اللي على إكرام النشامى محيمة وأهل الدلال الصفر والبن والهيل = ومجالسن فيها الطراقي مقيمة والبن الأشقر وسط بيض الفناجيل = والزعفران يبث ريحة عديمة وذباحةٍ للضيف من عقـرن حيل = يوم المجاعة والحياة الأليمة يستاهلون المدح قوم ٍ مشاكيل = أهل السلوم الطيبات السليمة هذا كلام الصدق من غير تبديل = وانا بعمري ما نطقت الظليمة