العلوم اللي تجينا ديرة ممطوره ****علها وبل الحيا تكرار لين اسقاها
والخواطر طيبه ونفوسنا مسروره **** ياعساها كل عام مخضر(ن)مرعاها
لوبعيد الدار جامل حالته مستوره **** لوضحك بالسن جامل والهموم اخفاها
حب داره في ضميره طابع(ن) له صوره****غير حب الدار اهلها لوبغا ينساها
ونتذكر دار ربعه ذكرته عصوره ****زاد همه فوق غمه والحون اقزاها
صخر القيفان تمشي ماتخالف شوره****قادها قود الرحول وسارعت بخطاها
وخطها فوق الورق بحروفها المسطوره****لين صارت بينه للي يبى يقراها
والقمر هو القمر واللي يشعشع نوره**** كل ظلمه لابدى نور القمر يجلاها
والحقيقه واضحه بالصوره المذكوره **** صرت مثل اللي يداو العين بس اعماها
جيت متعني زياره لشمال ازوره**** والله اللي سير الاقدام في ممشاها
والاوادم كلها منهية(ن) ماموره**** بامر منهو سير الافلاك في مجراها
والتوكل والعمل والرجل من مقدوره**** من يدور في حراويها يبى يلقاها
وصار رقمي بالشمال اللي زهى بزهوره **** والشمال بعيد عن ربعي وعن مرباها
وانتحانا والنحاوي لزمان وجوره ****كل ماغنا حمام الورق رد غناها