من قصايد الامير عايض بن زيد المندهه
بنيت لك يا حمود قصر(ن) مهايف
زين المباني في علوّ الشواهيق
أبيك تنزل فيه ما انته بخايف
منـزلك فيه يبدد الهم والضيق
وإن جات ركب (ن) موميات السفايف
حفيا السمار ولاحق اهله ملاحيق
قلط لهم كوما شحمها ردايف
والرزق عند الله ولي المخاليق
خل الضعوف أهل القلوب الغفايف
اهل التلقف والعلوم التلافيق
من العرب ما خلّوا ألا النصايف
يصبّحون الناس مع فكّة الريق
جيش(ن) لهم قبّ(ن) سواة السنايف
هجن(ن) لهم من ضامرات السماحيق
وعز الله إنّا للجماعه ولايف
كم ليلة(ن) عنهم نسد الأراويق