الفلسفه ياللي تتبعت الرواه اعن الرواه .... لو كان كبدك ماهي ابمتشاويه على سبيل النوم اخيرامن الصلاه .... وضع الروايه خير والا الراويه؟؟!! واذا عرفت اصل الخبر من مبتداه .... الفلسفه سلة سوالف خاويه لاشك لايغريك وتغر الوصاه .... خل الوصايا العشر عندك ضاويه لي معك بحروف الهجا واللي هجاه .... حرف انكتب بالكاويه واللاويه من له نظر سته على سته لقاه .... ويصعب على الجهّيل والعماويه بالدرسعي والابجدي للي قراه .... وترميزة الريحاني المتغاويه (سوفر)ولو سافر ذنوبه منتهاه .... يبقى بجاوه ريح عود الجاويه خمسين بعده ستةٍ واللي وراه .... جاك اربعين وجاك ستيناويه المسك في سبع النعايم فاح ماه .... قارورته لازكى زمرد حاويه من منطلق هالعلم واسمع ماتلاه .... واربط ورابط وازهب الشرفاويه دون المعاجم يالاعاجم ذبح شاه .... اطلس طَسا طس العيون الهاويه وجه الخواجات الجديده فاه باه .... يقولها بن مشيط للجلاويه بربوع شرم الشيخ واحضور اشرماه .... ام الثلاث اروي راحت راويه؟؟ لو قالها الاشرم شرم ربي جماه .... الفيل له سجيل جمره كاويه البيت له ربٍ من الريب ايحماه .... والزان والزنزان للزناويه اما حمام الدوح مجروح اللهاه .... روحي على روحه رحاها آويه لو رحت احده عن حواديد احدداه .... ملزوم ارده والمراد اداويه لاشك اخو سلمى سلمنا من وذاه .... يشرب شراب مسيلمه مع ماويه في صفحة التلمود موؤدٍ خطاه .... لو كان بالقران امه هاويه روحه هلاليه ودساس احتواه .... عرق النفود اللي سوته الساويه مداد والملحاق مايلحق مداه .... ميرالبلا (بعضوده)المتهاويه في سد مارب سد عينه من خلاه .... يعرج على رجله ورجله قاويه هدهد سبا جاب النبا قبل النباه .... بلقيس بالمعواد ماهي مراويه بنت الزناتي كان مرعي مارعاه .... تونس غدت معزوفه ابروناويه ثامود عاد وعاد ماعاد ايعداه .... مير اعقروا ياقوم صالح واويه والبحر لا سطح الفضا غطى فضاه .... وارست سفينة نوح عن ملاويه واذا عليك استشكل العلم ونباه .... يامعاير البلجيك والبرناويه تعال اسولف لك عن ارضه من سماه .... لاشك لاتهتال بامر الهاويه راع الكنانه غير يستلحق عصاه .... من شان تهدى اهل القلوب الغاويه قد قالها الحجاج واحرج من نساه .... بحضور بن مروان وابن امعاويه اصغارها بالعكس عكس الاتجاه .... واكفوفها بكفوفها متخاويه موائد التقبيل باعتاب الولاه .... تحت الولاه ابلا ولا متلاويه فيها من اصناف المشاوي والمشاه .... تاكل بها الشيخان والشواويه هذا على هذا وهاذاك ايهذاه .... ذلك كذلك والف ذالك ناويه احدٍ درس علم الحياه من الحياه .... واحدٍ درس(ضيق)الفضا والزاويه احدٍ عن حدوده حداه اللي حداه .... واحدٍ من سعوده عروشه خاويه اجل بعد واشلون؟؟!! هذا اللي نراه .... والخافي اعظم والمصايب داويه الكل منهم قد عرفنا مستواه .... واقفايته واقبالته متساويه ابراي لله وابرأ امن اللي براه .... ذنبه على جنبه وجنب مخاويه سهمي رميته كان سهمه مارماه .... بشتي لبسته كان بشته طاويه سلمي على سلم الرجال اهل النجاه .... وسلمه على سلم الكلاب العاويه مانيب عمٍ له ولا اعمم عماه .... ولا يلاليلي ولا له لاويه ولاهوب عمٍّ لي ولا عمي كماه .... عمي وخالي كان قمت امعاويه