جريت ونه وسمعوها الخلايق= وقامت تلفت العرب من ونيني . قالو علامك وقلت أنا الصدر ضايق=ودمعات عيني بيّحت لي كنيني . هموم قلبي سببت لي حرايق = نار(ن) لظاها بالحشى يكتويني . كل ما ذكرت الزين صرت امتضايق= أذكر جميل(ن) صار بينه وبيني . أول إذا شفته غدى البال رايق=أشتاق له وأبيه وهو يبيني . أقضي معه ساعات كنها دقايق=ضحك وسواليف وغزل مع ضنيني . شاء القدر ثم صار دونه عوايق= ودّعني وقفّا وتركني حزيني . وين العهد مابيننا و الوثايق؟= طار الوليف وراح قدام عيني . مدري أعيش أحلام وإلا حقايق= يارب تلهمني الصبر يا معيني . من بعد ماهو راح زين الخلايق=همّي بقى في داخلي مبتليني