يا مرحبا وأعداد ما هلت أمطار=وسالت بثرها كل شعب(ن) ووديان
على رجال العز والجاه والكار=فعل الكرم صيفه طويلين الأيمان
حي الكتاب وصاحبه تاج الأخبار=شهم(ن) كريم(ن) مزبنن كل مزبان
وسيع جال ووبال ووصافه كثار=ملازم(ن) للمجد في كل ميدان
أبشر بعزك والمطر يقتل النار=نبذل جهدنا لك على قدر الامكان
والوقت ما يمنع عن الناس الأخطار=ولا يمنح أهل الطيب للطيب تيجان
والغيب عند المقتدر رب الأقدار=واللي قسم به والي العرش ميزان
اشرح لي الموضوع بالضبط وش صار=للطيب ماريه وللخط عنوان
ما ينفع أهل الطيب لاجوك معذار=ولاجاك راعي الشان تقضيله الشان
وأدق في روس المعادين مسمار=ما نجحد أهل الطيب لو كان ماكان
ياللي فعايلكم ليا شبت النار=ليا ولع البارود شعله ودخان
حماية الميقاف تكرار وأمرار=لاقام يرقص للمعادين شيطان
عدوهم من ريبهم يدخل شهار=خسران من يجحد هل الفعل خسران
ربعن لهم فالوقت مارد ومصدار=وان جيتهم بالطيب ما هم برديان
حييت يا لي فالجزالات تختار= والمعذرة لن كان بالقول نقصان
وأختامها مني تحية ومقدار=إعداد ما تنطق حروف(ن) من لسان