ياسعود شب الضو واشعل سناته=اطرح حطب سمره وخل سلمتها
واحمس بعد تطيح كل اجمراته=حتى تجي شقرا غريبه صفتها
لايقرب الشعله وتخلف صفاته=اما احترق ولا الهبوب الفحتها
خله على كيفي وكيفك سواته=في دلة تطرب لشرب قهوتها
فنجالها ترتاح له من حلاته=ان ساقوا الفنجال من مبهرتها
ماها قراح من المطر وجهزاته=قطرة مطر من مزنة نزلتها
على الهضاب اللي نظيفه قلاته=ماهو بخبرا وردها غثبرتها
من هضبة حمراء رقوها رواته=قدامهم مافيه ورد ارهجتها
واليا استوى الفنجال ياسعود هاته=بالدله اللي ليفها برقبتها
وسوقه على اللي تعرفه ببركاته=ان جات حاجاته تعرف بركتها
على الرجال مفتلين شنباته=اهل الصدور الواسعه من سعتها
ان شافوا البردان ضفوا عباته=وليا بدت من قالة سمرتها
اهمه جنود الحق واهمه دعاته=اليا تولت قالة عالجتها
تلم شمل القوم قبل شتاته=واليا انعقد عسر الحبال انقضتها
تنقض عقود الحبل من مبهماته=تنقض معاجزها بعد برهنتها
بالحق تنقضها وبمعادلاته=وان كان دعوى فارغه همشتها
وان مخط الدرب تطحن رحاته=ضد الطليب اقوالها ركزتها
على يدين العارفه من قضاته=اهل الحقوق اللي كبيراً بختها
وليا عصى ماهم بتحت ارحماته=ماهم تحت عجز العصي ورحمتها
ان كان في فكره ينفذ خطاته=يلقى مجانين العرب وجهلتها
لو يستغل العنف ومحاولاته=يلقى رجال فايقه مقدرتها
تحكم له الدعوى مثل معجزاته=يبلش ماصرف شي من معجزتها
مايدري الايام من وين جاته=ضده صناديد الرجال احكمتها
احكام حبل البير على جباته=من خوف دلوه تنقطع بكربتها
ياسعود جدك عود واسمع وصاته=ارفع مقام النفس عن مهزلتها
ليا نزلت السوق ومجوهراته=اترك معادنها وخذ جوهرتها
ترى الذهب موجود ومنوعاته=لاتنخدع في معدنه وذهبتها
جالس خيار القوم واترك حتاته=واترك رجال ناقصه معرفتها
قوم تعلج الهرج علجة غراته=جهالها تامر على عاقلتها
ليا سمعنا الهرج ومنازعاته=قلنا جيوش المشركه دمرتها
دايم قليل العرف تكثر وحاته=يحط صادرها على واردتها
صوته يرج الروس بمهايتاته=تكسر الجدران بمهايتتها
وليا جراله شي اكلك ابشماته=وليا تولت قالة مشكلتها
تقرا الكتاب ولاتقيد باياته=حتى قوانين العرب ضيعتها
اخذ الكلام اللي ثبات ثباته=حتى المذاهب والقيم ميعتها
صديقها ماتعرفه من عداته=قشران واجواد العرب بالشتها
كل مطرف للقرابه قناته=والا البعيد تخاف ماوردتها
لو تنهر الرجال طش بعصاته=واستسلمت وعصيها سلمتها
الشكل هذا مثل موته حياته=لازايده قوما ولاناقصتها
من مثلهم لاتنتظر في حراته=ان كان مبرمت الحبال ابرمتها
ينشب لسانه وان هرج في جماته=وتمرها الجابات ماثمنتها
لو تنصحه قام وحذفك ابحصاته=وقدام فيده جابلك عازبتها
اعتز برجالاً ثمينه عزاته=ان كان جارحت الشعور اجرحتها
ليا رفع يمناه توجع هواته=وليا تكلم كلمته بثمرتها
سيف تعدي عن نصابه شباته=ليا تنازل خبلها ورخمتها
واختم كلامي بالسلام وصلاته=على شفيع الخلق يوم ابعثتها