منتدى بني عزيز الرسمي من مطير - مرثية حاتم العداه في جده عقيل بن مدله

هذه مرثية في فقيدة القبيله كلها ذلك الرجل العظيم الرجل الشهم الرجل الذي اشتهر بكرمه الحاتمي الرجل الذي اشتهر بنخوته وشجاعته وحب قبيلته وحب جيرانه الرجل الذي عز نفسه مرفوع الراس حتى وافته المنيه ...( المرحوم عقيل بن مدله بن صلال العزيزي )
رحمك الله ياابو بدر ياطويل الذراع والله على الزين .

وهذه القصيده لحفيده الشاعر حاتم عبدالله عايض العداه الذي طلب مني تنزيلها في هذا الموقع

العبره اللي صكت الحلق ماجـــــــــــات = الا سبب كبر المصيبــــه علينـــــــــا

واصدري اللي فيه كثر التنهـــــــــــات = بالصبر والسلوان ياللــــــــــه تعينــــــا

ودعنا أخو عقلا زبون المهمــــــــــات = هذا القدر وش في يديه ويدينــــــــــــا

مرحوم ياراس الكرم والجزيـــــــــلات = يادايم الضيفه بجزلن سمينـــــــــــــا

فيك الكرم فطره ولا هو مضاهـــــــات = وتكرم هل الحاجات والقاصرينــــــــا

كلن يعزى فيك غيـــــــر القرابـــــــات = ولاينقطع ذكرك بطول السنينــــــــــــا

نذكرك لاجات المواقف عسيــــــــرات = لانك لها يالليث درعن حصينـــــــــــا

ويبكيك من جاته من الضد ميــــــلات = يافرحة اللي جاه ضيم وغبينــــــــــا

راع الهقاوي والعـــــــزوم القويـــات = سوا يزين الوقت ولا يشينـــــــــــــا

محدن يهوزك يازبــــــون الثقيـــــلات = يالصادق الصامل رفيع الجبينــــــــا

وكلمة عقيل عن صكوك وشهـــادات = وله فعل دايم باللوازم يبينــــــــــــــا

من نسل عودن جابوا المستحيـــلات = اللي على ضرب الخطر صاملينــــا

عساه فالجنات فاعلى الدرجـــــــات = وياخذ كتابه راضيا باليمينــــــــــــا

ولومت ياجدي لك الذكـــر مامــــات = في عيالك اللي منك متعلمينــــــــا

وهذا طريقن مالنا عنـــــه صــــدات = من ودعوا حنا لهم لاحقينـــــــــــا