البارحه قلبي تلفه هواجيس=تلف من بين الضلوع الحواني
تلف قلبي مثل لف القراطيس=الليل كله ممرحه لو ثواني
هاجوس تفحيطٍ وهاجوس تطعيس=وهاجوس لا أول ولا هو بثاني
وهاجوس جس النبض من هالعواسيس=لعل يلقاله بقلبي مكاني
ماهو بداري ويش خلف الكواليس=مايدري إن الحب بيح كياني
راحت شراييني لقلبي محاميس=مثل الملاعق بينها الهم لاني
لانت وليسها على القلب تلييس=تليس جدرانٍ بناها يماني
والقلب خبط من جميع الأحاسيس=من الهموم اللي كفاني ماجاني
ولاينفع التقميص والا التكاييس=القلب يمه ياأبو نايف خذاني
حب الوليف اللي عيونه نواعيس=اللي بوسط القلب حبه غشاني
وله في صميم القلب بيت ومجاليس=وله مسكنٍ فالروح طول الزماني
هذاك له قيمه وحشمه بلى قيس=وأغليه كأنه واحدٍ من خواني
حفظت حبه عن هواء الناس وإبليس=وحفظت حبه عن هذاك وهذاني
لين أصبح معلم وأنا كتاب تدريس=قلبي كتاب الحب رمزاٍ وباني
وخزنتله فالقلب أربع قواميس=حب وفاء وتحقيق كل الاماني
ومعزةٍ إتفوق كل المقايس=ومن ثقلها تحسب بوزن الطناني
لكن لا هبت هبوب النسانيس=وش حيلة اللي من غيابه كواني
لاشدة الذكرى قريب الغطاليس=ذكرت لي خلٍ بغيته وجفاني
اللي عروقي من غيابه ميابيس=من هالزمان اللي حداه وحداني
موعد وعد والوضع جاء فيه تعكيس=وعرفت من هو بالخيانه نواني
خسران لو ماهي خسارة مفاليس=خسرة شيٍ منه للحين أعاني
ولاهي خساره فأسهم البنك وإدريس=العلم واضح ماتبي ترجماني
إلى هنا والفكر ضارب تغاريس=ويلزم علي الصمت حان الاواني
خوفٍ من الجاهل وخوفٍ من الهيس=وخوفٍ من اللي ما يحفظ اللساني
وختامها قفلت كل المحابيس=وضمنت تقفيلي عليها ضماني