منتدى بني عزيز الرسمي من مطير

جت ثايرة متوترة قلـت الحلـو زعـلان ليـه//// الله يجازيهـم حــرام يزعـلـون المتـرفـه

رفعت حواجبها وزمت رمشهـا والمـوت فيـه///// قالت بكيفـي والسبـب ماهـو بـلازم تعرفـه

شي ما يخصك سيبني في حالي الحزن اشتهيـه//// احد اشتكى لك يووووه يا بعض الخلايق ملقفه

قلت انت لو ما تشتكيـن الهـم قلبـي يشتكيـه///// من يوم اشوف الحزن من تحت الرموش المورفه

وشلون ما تبغيني اسأل ليـش همـك تحمليـه//// واناابتهاجاتـي عـلـى نفسيـتـك متوقـفـه

زود انفعالاتـك يؤثـر بانفعـالاتـي واتـيـه///// تأثير يتناسب تناسب طـردي ابنفـس الصفـه

لو اعـرف اللـي زعلـك والله للعـن والديـه///// وإلا يجي لك يعتذر غصبـاً عـن اللـي خلفـه

قالت علىبالك تتريق؟؟ يا برودك يييييييه ييـه///// احر ما عندي هو ابرد شـي عنـدك والطفـه

قلبتها ليه فيزياء وانـا احسـب انـك سيبويـه//// اقول لك حـره وبرضـك ماتسيـب الفلسفـه

مدري انت تستغبي معي وإلا مسوي لي نبيـه///// وإلا انت فاكرنـي لهـذا الحـد انـا متخلفـه

لا لا حبيبي مو بنا اللـي يخدعـه مـا تدعيـه///// مبروم ما يفتل علـى مبـروم لعبـك بكشفـه

تقتل قتيلك ثـم تمشـي فـي الجنـازه تقتفيـه//// من يوم آعرفك وانت ما تترك معـاي اللفلفـه

قلت اذكري الرحمن واعطيني سبب واحد وجيه//// يعطيك حق انك تدينينـي لـو انـك منصفـه

قالت لي اسأل نفسك اش سويت بالحب النزيـه///// منهو الذي مشغول جوالـه ودمـي استنزفـه

ثلاث ساعات اتصل مشغول يـا مستـور بيـه///// مدري تفاوض بوش وإلا انهـا بدايـة معرفـه

طبعاً مطنشني وداخـل جـو لكـن وش عليـه//// مانـي بزعلانـه علـى شانـك ولا متحسفـه

ليه الحسايـف دام قلبـك بـاع قلبـاً مشتريـه///// إلا خساره فيـك دمعـاً فـي غيابـك بذرفـه

قامت وراحت واتركتني قلت معذاري اسمعيـه//// زمت شفايفها ولفحـت شعرهـا فـي عجرفـه

لحقتها قلت افهمي الموضوع قالـت مـا ابيـه///// قلت انت حره واتركتني آآآآآآه ياهـي مجحفـه

اسبوع يامحمد لا زادي ولا النـوم اهتنيـه//// احب هالمجنونـه اللـي فـي عذابـي مسرفـه

من يوم راحت والسوالف كلهـا لهجـة سفيـه//// وذكرياتـي لجـل يسكـت كلهـا تستحلـفـه

والوقت باسط كف قابض كف يفرك في يديـه//// له عين يتشمت وانا اللي كنت بالضحـك اتلفـه

ان كان مر اسبوع ماجانـي اتصـالاً محتريـه//// بطلبك يامحمد خدمه كـان مـا فيـه اكلفـه

اطلع شهار وقول عندي شخص ربـي مبتليـه//// واحجز سريراً زين في غرفه فسيحـه مشرفـه

ومر وصلنـي عسـى الله لا يهينـك يالوجيـه//// تلقاني اتحـراك لابـس ثـوب نـوم ومنشفـه

للشاعر :مستور المالكي