بديت بإسم اللي على الكون متعال=رب قدير ويعلم الخافياتي
يوم أدرجه سيء النوايا والاعمال=رزقك على اللي يرزق الحايماتي
بعض البشر يسعى على قطع الآمال=في الوارد الماضي لهم سابقاتي
وأحدٌ على الشدات لك حرز وظلال=وإن صار زلة حطها بالخفاتي
وأحد رسم للعز سبقه وفعال=فعال للمعروف والواجباتي
وأحد هبيل وزاده الكبر بإهبال=سين علومه بالملا فاضحاتي
وليا سمع سيئة نشرها بالإرسال=وليا علم حسنة كتمها ثباتي
يمشيبها المغتب في كل محفال=يقصدبها الخايب عليك الشماتي
يفرح بعثراتك ليا أخطيت بأقوال=اللي علومه وإن هرج ناقصاتي
وليا نشدته زود الطين بأبلال=بالعكس ماقاله ردي النواتي
جاله على الباطل زعامة ومحوال=صبرٌ على التكرار فيه إجرحاتي
بلاك باللي فيه من نقص وإخبال=ماشاف نقصه راعي الهافياتي
راعي التهزي والبلا كره محتال=إن ما وقف يعبا له الرادعاتي
لو كان ما ميلت له للخطأ مال=شين المبادئ طبعه المنكراتي
إن كان ماينفع ليا حدك الجال=وقت الرخى ماتطلب إمسانداتي
إسلك طريق اللي على الخط ماعال=ماميلت نفسه على التافهاتي
خلك مع اللي صافي القلب حلال=حلال عقد إعقودها المبهماتي
رجل ثقيل العقل بالحق مازال=يثبت كما تثبت حجر ثابتاتي
وليا إحتار فكرك في النشايب والأقوال=شاور رجال تقدَرْ المحرجاتي
وجنب عن اللي وإن نطق خبث البال=اللي على الشانات فيه إنهقاتي
الشرس مابه خير في كل الأحوال=وجه بغيض ولا كسب عالياتي
مالك ومال الضيق يا طيب الفال=أبعد عن المسموم في الواسعاتي
واختر جليس مايجي منه الازعال=اللي عليه نفوسنا راضياتي
وخلك حليم وطيب النفس حمال=في الأوله وجه له الناصحاتي
لو كان بعض الصبر شر على الحال=لكن عاقبته تجي نافعاتي
وخلك مع الطيب كما شرب الازلال=وعامل أهل التنكيد بالموجعاتي
كم واحد حليت كربه ورى أقفال=وجزاك بالانكار والباطلاتي
جدر بليا ساس لابد ينهال=لن كان مايبنى على راسياتي
وأخذ الحذر بالقول وأخذه بالافعال=والسر حطه داخل المقفلاتي
مايبدي أسراره على الناس رجال=كود الذي مايعرف المخطياتي
لاتصير كفن ليا جاء الهواء مال=تلعب بك الارياح والذارياتي
وافتح طريق الخير بالقول والمال=واطعم نفوس بائسة جائعاتي
حتى تفوز بجنت الخلد وأبلال=بأنهارها وقطوفها مذللاتي
وصلو على من وضح الدين ما مال=في سنته وآياته البيناتي