الدمعه اللي لي اسبوعين خانقها=طاحت قصيدة غرام بروح مرثيه
وانا عشان أمسح الدمعات اوثّقها=عسى دموعي تخفّف حرّ مافيّه
لو كل الاحلام نحلمها نحققها=ماكان شفت الفراق وجبت طاريه
فارقت مجبور مافكّرت افارقها=لاشك حكم القدر مايعرف النيّه
من قبل ما احب ضحكتها وارافقها=من قبل نار العنا تطغى على الفيّه
يوم ان شمس المعرفه لاح بارقها=حسّيت فيها دلع طيبه وعفويه
وبديت أرتّب من ابياتي وأذوّقها=واقول من ذوقها ماهي طبيعيه
لين سرقتني غلا واصبحت سارقها=وبدا غلانا يزود شويّه شويّه
شهرين لين استوت فيني مطارقها=وقيمة شهر من غلاها دور حوليّه
ونكّست كل البيارق من بيارقها=تفنى بيارق غرام لعين مهويّه
صارت تشفّق لوصلي واتشفّقها=ونبادل الحب حنيّه بحنيّه
لكن ردا الحظ ضايقني وضايقها=يوم ابتدت قصّة الحزن الحقيقيّه
يوم اشتكت والبكا والدّمع مغرقها=وبان الخبر ياهي الاقدار مخفيه
حاولت اخفّف حزن روحي واروّقها=محروق لكن بكاها زادني كيّه
وصدّقت في حاجةٍ ماكنت اصدقها=كيف الاوادم تموت وبعدها حيّه
أو كيف تفلت من يديني وانا اعشقها=أو كيف تعشقني وتفلت من يديّه
أو كيف ابن عمها يقدر يعلّقها=ياعل ابن عمّها تفنى مساعيه
تأخيرها حاجةٍ ماكنت طايقها=وشلون ابتحمل الروحه بلا الجيه
وشلون ابلقى بهالارض ومناطقها=من فيه عقل الملاك بحسن حوريّه
منهو يعوّض خفوقي حسن منطقها=منهو يزيد الحكي لمسات سحريه
يوم اتبلّى على نفسي واضايقها=تقول ياعل مافيك يحصل فيّه
ماني بقاوي عقب هذي مفارقها=ولاني بناقص تعب والروح مبليه
ولاني أناني واقول الله يوفقها=واحيان من حبها كلّي أنانيه
احيان لاجيت لجل الحشمه اعتقها=تصيح في داخلي مليون جنيّه
ياعل منهو فرح فيها يطلّقها=حتى تردّ ونعيش احلام ورديه
والكلمه اللي بتحرجني وابنطقها=ماينفع البدو حب بدون حريّه
ولو الرجل ماتهزّه بنت عاشقها=ماكان دمعي يطيح لخاطر بنيّه